Kerwespruch 2025
Ich heb moi Gloas, hoch iwwer de Kopp,
gugg zu moim Watz, dem arme Tropp
unn gugg aa zu de, Borsche all,
wie se do stehe, oan unserne Hall.
Unn woann ich des do alles seh,
denk ich mer, woas is des schee.
Weil ich waas, es is soweit,
endlich wirrer, Kerwezeit!
De Chef bin ich, prägts eisch gut oi,
ich bin de Migga, unn ich trink gern Woi.
Bier trink ich aa, ein jeder kennts,
weider heiß ich, Lewerenz.
Mer kennt mich kenne, koann ich eisch soache,
letztjoahr, hoann ich Schwarz getroache.
Vum Watz zum Vadder, mussde erstmol bringe
unn dich zu, Manieren zwinge.
Geroamt hoatts dies Joahr, beim TVB,
Erst, Zwott unn Dritt abgestieje, des tat weh.
Mer tun net verzaache, des is ja wohl klar
mer hoatte trotzdem, e schee Hoandballjahr.
Biddelberner Hoandball – e Institution,
hoatt bei uns, e loang Tradition.
100 Joahr Hoandball, des wurd gefeiert
wie woann de Kaiser, Willerm heiert.
Trikotparty, Jugendturnier unn Bundesliga Flair,
mords Highlights im Ort, woas willste mehr?
Kerb unn Handball is wie Bonny unn Clyde
unn des aa schun, e Ewischkeit.
Obacht, horscht zu, de erste Klopper kimmt jetz.
heert all mol uff, mit eierm Geschwätz.
Jetz werd gefeuert, aus alle Rohrn,
die beste Bosse, gibt’s jetzt uff die Ohrn.
Woann ehr eisch wirrerfind, orrer oaner erkennt,
doann net geflennt, unn zu de Eldern gerennt.
So wie’s do steht, so isses bassiert,
aach woann mer sich doann, halt geniert.
Des is halt Spass, unn den muss mer mache,
uff dere Welt, gibt’s sunst nix zu lache.
Ob Kriesch in Gaza, orrer die Politik,
es is zum groine, do werrste verriggt.
Mer werrns oafach, besser mache
unn e Woch lang: tringe, feiern, lache.
Jetzt lasst uns singe, was sunst is e Sünde,
ehr Buwe legt los, die Kerwehymne.
(Lied: Kerwemarsch / Mer Biddelberner Kerweborsch)
+++
Bei de Gemoa, gibt’s scheene Sache,
woas die do alles, zamme mache.
So gibt’s hier, de Seniornausflug,
mol raus ausm Ort, des dut gut.
Unsern Boijemoaster, war bereit,
fer die Tour mit, dreißisch Leit.
Mim Busje gings doann, endlich los,
die Laune, die war grandios.
Rüdesheim, des war ihr Ziel,
sie wollde Bootsche fahrn, mit Stil.
E Kaffeefahrt, zu Schiff sollts soi,
oannerthalb Stunn, schee uffm Rhoi.
Do wars subber, des is klar
bis doann, Kaffeetrinke war.
Im Voraus bezahlte, se veel Geld,
doann hoatt mer netmol, Stiehl gestellt.
„Ehr Leit misst zahle, fer Kuche unn Woi,
des is im Preis, halt net mit droi.“
Do seegt die Hilde, zu ihrm Klaus:
„Kumm, mer mache’s Beste draus.“
In Kölle am Dom, wurd net meh gelacht,
woas macht die groß Kersch, in Bacharach?
Ehr Leit, woas is doann, do bassiert?
De Maggus, hoatt sich, schee blamiert.
Er wollt uubedingt, es Boot noch krieje
unn allemoann, falsch eugestieje.
Statt Flusskreuzfahrt, fer e korz Zeit,
uffs Linieschiff, unn des fährt weit.
Fünf Stunn speerer, warn se erst zurigg,
die Stimmung war, schun asch bedriggt.
Oamol korz, net uffgebasst
unn vun dreißisch, Leit gehasst.
So war es Übel, schnell bassiert,
er hoatt sich halt, net konzentriert.
Unn wie bei viele, in de Politik,
fehlt moanchem mol, de Üwwerblick.
+++
Tornfest in Leipzsch, des war schee
unn meddedroi, de TVB.
Die Tornabteilung, fast komplett,
richte im, Quartier ihr Bett.
Torne, speele, unn so Sache,
nur oa Fraa, hoatt nix zu lache.
Ihrn Huf dut weh, unn zwar wie Sau,
die Achillessehne, is schun blau.
Weil se e, Entzündung hoatt,
is se nach, fünf Meder platt.
Sie humbelt Stunne, dorsch die Stadt,
ob oaner woas, geije Schmerze hoat?
Sie freegt: „Wer hoatt do, woas debai,
ich brauch jetzt dringend, Arzenei.
Die Oanner koan helfe, is doch klar,
„Ich hoabb moi, Wundermiddel da!“
Des Zeisch wird, Nitrospray genannt,
des nimmt mer, woann es Herz is krank.
„Awwer ich hoab doch Fuß, unn nix mim Herz,
woas soin doann des, fer bleede Ferz.“
„Ruhisch moi Mädsche, lass mich feddisch verzähle,
sonst werste dich, noch ewisch queele.“
„Des wirkt aa vun auße, des koannste glaawe,
mer koanns aa uff die, Haut ufftraache.“
Oam Moijend kriegt die, Humbel-Liese,
noochm Uffsteh, schun die Krise.
Gestern hoattses, Spray benutzt,
gar nix net, hoats net genutzt.
„Moin Fuß gibt immer,noch koa Ruh,
jetzt is mer aa noch, schlääschd dezu.“
Ihr is kotzüwwel, sie is garnet fit
unn ihrn Kreislauf, speelt net mit.
Sie freegt die Oanner, vun dere ses hat,
Irgendwoas, leeft do net glatt.
Des goanze Sprieje, hoatt nix gebracht,
do hoab ich mer, halt so gedacht:
Ich sprieh noch fünfmol, hinnerher,
woanns wirke soll, brauch ich halt mehr.
Schmegge, dut der Krom aa net,
ich leg mich wirrer, in moi Bett.
„Bist du des Wahninns?“ wurd se gefraacht,
„Hoaste der des Spray, ins Fressbrett gejaacht?“
„Des derf net ins Maul, woanns Herz is net kroank,
du hast doch net alle, Tasse im Schroank.“
Sie hoatt sich doann selwer, wer hätts gedenkt,
ihrn goanze Kreislauf, weggeSprengt.
Zwoo Doach autscht, die oanner als,
des musst halt uff de Fuß, unn net in de Hals.
Woann de gesund bist, sei uff de Hut,
Medikamente fers Herz, tun doann net gut.
Unn die Moral vun der Geschischd:
Zeisch fer die Fieß, geheert net ins Gesichd.
Zum Dokter zu geh, des macht schun Sinn
unn net zur Hobby,-Apothekerin.
Fer unser Fraa, mim Herz woas rennt,
singe mer zamme, vum Herz woas brennt.
(Lied: Mein Herz, es brennt)
+++
In de kalde, Jahreszeit,
isses fer viele, baal soweit.
Zum Skifoahrn ab, nach Österreich,
schnell uff die Piste – geiler Scheiß.
En Trupp Halbstarke, aus unserm Ort,
die woarn diesjoahr, zamme fort,
Ischgl war ihr Ziel der Wahl,
ohne Schnee wärs rischdisch kahl.
Oogekumme, unn ab uff die Bredder,
hoffentlich, hälts Kaiserwedder.
Glei noochm Skifoahrn, des is klar
geht’s direkt, zur Après-Ski-Bar.
Dort isses kumme, wies kumme muss,
wenisch gegesse, awwer veel Suff.
der oa war so voll, er musst ins Bett
wie er hoamkumme is, des waas mer net.
Wo soin die Buwe, hoat er sich gefreegt,
unn sich, uffs Canapé gelegt.
„Jetzt lasster mer, all mol die Ruh,
die Aache falle, mer schun zu.“
Soin Schloof war doann, goanz schnell vorbei,
geweckt werd er, vum laude Schrei.
Er guggt verkniddert, dorsch de Raum
unn traut seine, Aache kaum.
„Do steht e Fraa, in moine Bud,
woar der Oowend, gestern gut?“
Die plärrt unn kreischt, unn flippt voll aus:
„Moin Moann schmeißt dich, em Fenster naus!“
Ich will eisch aa net, weider queele,
woas do war, tu ich verzähle:
Unsern Kerl, im soinem Suff,
wacht im falsche, Zimmer uff.
Langsoam wurd es, ihm dann klar,
statt soine Jungs, schläft hier e Paar.
Wie er ins fremde, Zimmer kumme,
wurd bis heit net, rausgefunne.
Oam nächste moijend, ihm gings net gut
Kam de Manager, mit voller Wut:
„Ihr seid en scheene, deppe Trupp,
macht hier de Leit, ihrn Urlaab kabutt.“
Unn woas ehr alle, noch net wisst,
er hoatt aa noch, in de Gang gepisst.
Woann de lebst, so ungeniert,
is doin Ruf, schnell ruiniert.
Ehr keent jetzt soache, ich wär kleinlich,
awwer des war, werklisch peinlich.
Drum soach ich eisch, damit ehrs rafft,
Mer soll nur so veel saufe, wie mer aa schafft.
+++
En Jungrentner, bei uns im Ort,
fährt gern emol, mim Rädsche fort.
So kloane Tourn, die macht mer schnell,
heit fährt mer elektrisch, unn net manuell.
Drum denkt sich unsern, alde Athlet,
ich fahr bissje weider, unn gugg woas noch geht.
So will er fahren, er macht koan Spass,
von Breme aus, in die Hinnergass.
Vier Doach sollt, soin Trip dann dauern,
mit veel Sunn, und wenisch Schauern.
Er fährt zamme, mit soim Bremer Kumpan,
zu zwott, do lässt sichs, besser fahrn.
Zuerst mim Zuch, hoch nach Breme,
um moijends doann, es Rädsche nehme.
Doch wies halt so ist, er kennt soi Gligg,
de Zuch fällt aus, er radelt zurigg.
Er luppert in de App, vun de Deutsche Bahn,
vun Kölle det, noch oaner fahrn.
Net loang iwwerlescht, unn doann oan Klick,
es Ticket kaaft, ich werd verrickt!
“Wie kumm ich nooch Kölle? Wer soll Fahrer soi?”
Do fällt em hoalt, nur oaner oi.
Oa Gligg hoabb ich, jo en Sohn,
den ruf ich oo, der fährt mich schon.
Schun fast in Kölle, guggt er uff soi App,
unn seegt genervt: „Ich glaab, ich werd depp!“
Do hoat die Boahn, es wirrer vollbracht,
der Zug fällt aa aus, wer hätts gedacht?
Er scheißt oafach, uff die Bahn,
soin Bub soll en noach, Bremen fahrn.
Gesagt, getan, los geht die Fahrt,
unn moije fährter, endlich Road.
“Jetzt geht nix meh schief” - doch korz vor Kassel,
passiert em doch noch, en Schlamassel.
De Vadder seegt: “Des koann doch net soi,
moi Akkukabel leit dehoam, im Schränksche droi.“
„Koannstes Kabel, net vun doim Kumbel nemme?“
„Des basst doch eh net.“ dut er flenne.
Weil, des hoab, ich glei erfasst,
dem soi Kabel, eh net basst.“
Zurückgedüst, nooch Biddelborn,
beginnt de goanze, Spaß von vorn.
Vier Stunne extra, fers Akkukabel,
des war fern Toank, net so rentabel.
Owwe ookumme, erstmol woas schnabuliert,
unn doann aus Spaß, mol woas probiert.
Sie maches Kabel, vum Kumbel dro,
unn pleetzlich geht es, Display oo.
“Vadder, oans kannste mer glaawe,
es nächste Mol, lass ich dich laafe!”
Ehr alle wisst, was jetzt geschieht,
mer singe jetzt, es Fahrrad-Lied.
(Lied: Ja mer soin mim Radl do)
+++
Öfter mol Dunnersdoachs, gibts goanze Ort Gas,
Deckname: Genussmarkt - eigentlich Training am Glas.
Hier trifft sich die Elite, ob rot orrer blau,
mit de Herkunft, nimmts do koaner genau.
Schauplatz is press, vor de Boijemoasderei,
desweije is der, immer als Trainer debei.
So war’s aa diesmol, bei dem Maad,
nur is der bissje, ausgeaaart.
Es war längst rum, paar konnte noch steh,
es Team Boijemoasder, wollt oafach net geh.
Doch wo solle se hie? Sie wollte sich setze,
es heutige Training, nachbeschwätze.
Drauße geht nix, weil mer beim Schnookespritze spart
unn die Schnook, sich mit de Tigermigg paart.
Do hoat de Maggus – extrasmart,
aa glei e Mords, Idee am Start.
Mer gehn niwwer, in die alt Boijemoasderei,
des zählt als Sitzung, woas is do debei?
Korzerhand eröffnet, die alt Rathaus Bar
Wirt: Bürgermeister Bürgernah.
Dass do ebbes schiefgeht, des war so sicher,
Wie e Versicherung, bei Hugo Fischer.
So wars doann aa, die Bar musst schließe,
de Wirt war blau, unn soi Gäste schliefe.
Zugeschlosse, unn all raus geje Zwaa,
Fast all, bis uff die blooseschwach Fraa.
Weil die hoatt uffm, Klo gesesse
unn wurd vum Rest, oafach vergesse.
Im Rathauskerke,r eugesperrt,
Unn hat se noch, so laut geplärrt,
Koaner hoatse, rausgelasse,
nur weije dem oane Forz, dem nasse.
Sie is doann raus, dorschs Bleigloasfenster,
Flucht vorm Woigeist, unn de Ratsgespenster.
Als Highlight kenntermer, noch glaawe:
Die Fraa war vun Waller, unn is hoamgelaafe.
+++
Die nächste Absätz, wärn all leer,
ohne unser Feierwehr.
wie sollt ich, um Gottes Wille,
die Löcher do, im Text doann fille?
Geschischde gibt’s, uff dere Welt,
dass mer vum Gaul, fast runnerfällt.
Stichwort: Neibaufeierwehr
„Nach einer kurzen Schankunterbrechung erfahren Sie mehr.“
Korz de Schoppezeehler, mol gedreht,
jetz uffgebasst, wies weidergeht.
Sie krieje e nei, Gerätehaus
unn derfe ausm, Ortskern naus.
Doch bevor mer, rumsinniert,
geheert die Ploanung, finalisiert,
doann die Erdarbeite, abgeschlosse,
unn letztlich, Fundament gegosse.
So war’s eigentlich geploant,
Doch kimmts stets oanners, als mer moant.
Die Schalung war druff, de Beddong schnell drin,
dass do woas verkehrt war, hoatt koaner im Sinn.
Am nächste Moijend, es Fundament kontrolliert
unn glei gemerkt, des is schepp beddoniert!
Die oanner Seit gemesse, in die gleich Richtung krumm,
des war gestern noch net, mer soin doch net dumm!?
So en schläschd verdichte, Unnergrund,
is fer schwere Beddong, uugesund.
Noachts hoat de Borrem, unner dem Gewicht,
sich oafach selwer, noochverdicht.
Alles is schepp, de Abriss fällt schwer
Die uugeplante Koste, werrn als mehr.
Im Gutachte steht’s doann, schwarz auf weiß,
erst brauch ich en Schoppe, in meum Hut steht de Schweiß.
Halt eisch fest, unn basst gut uff,
weil aufm Zettel, do stoand druff:
„Es Erdreich do unne, des wurd mit Nichte,
verdicht, mit de rischdische, Gewichte!“
De Tiefbauer wollt, die Koste minimiern
unn dut nur mim kloane, Rüttler planiern.
So e schwer Rüttelplatt, die war wohl zu deier,
fer die Firma Erdbau – Geiz und Geier.
Also Abriss, diesmol rischdisch abgerüttelt,
an unserme Geldbaum, noch geschüttelt,
unn doann vun vorn, die goanz Geschischd.
Moral: Erdreich unn Männer, seid gut dicht.
Ihr liewe Leit, des wär’s gewäse,
die letzte Zeile, soin verläse,
macht eisch net rum, unn stoßt mit uns oo,
doann soin mer all lustisch, doann soin mer all froh.
Mer soin oam End, genuch geschwätzt,
gelästert, gelacht unn aa gehetzt.
Gemecker, Vörschlääsch orrer neie Geschischde
Bidde an, die Spruchschreiber richte!
Des wars vun mir, ich klink mich aus
unn geh zu meiner, Kerwemaus.
Ahoi, Cheerio unn Salut,
zum Kerwemarsch schwenk ich moin Hut!
(Lied Kerwemarsch / Kerweborsch seun lusdsche Brüder)
- Aus der Feder von
Max Kraus und Jan Schneider - Kerwevadder
Mika Lewerenz - Beivädder
Tobias Daum und Tim Ickinger - Kerwewatz
Fabian Kraijnovic - Schmuddels
Vincenz Grieß, Leon Behre, Luca D' Adonna, Jan-Peter Jockel, Lennard Anton, Florian Hirsch