Kerwespruch 2001

Jubel, Trubel, Heiterkeit,
endlich wirrer Kerwezeit,
ess werd gesunge unn gelacht,
die Noacht, die werd zum Doag gemacht.

Bei uns in Biddelborn im Ried,
werd on Kerb koan Oane mied,
denn als de Herrgott uns gemacht,
gab er uns en Mund, der lacht…

... unn in unser Blut enoi
gab er allerfoinste Woi. -
Drum gibt´s bei uns nur lusdische Leit,
wie nirgenwo Oannerst - weit unn breit.

Ich bin diesjohr die Hauptperson,
als > Kerwevadder< - die Attraktoin,
vum Scheitel bis zur Sohle - steh ich gut im Lack,
mit Stiefel unn mit Bändcher - unn moim Schabbo Klack.

Etikette bawahrn,dess fällt mer net schwer,
bin stets graziös unn niemols vulgär,
bin galant unn charmant - komme woss wolle,
en Kerwevadder wie ich, fällt nie aus de Rolle.

Moi > Beivaddern < unn moi > Kerweborsch <,
sinn drahtisch unn knackisch, dorsch unn dorsch.
Moi > Schmuddel´s < unn de > Kerwewatz <-
Sinn die begehrdesde Männer vum Kerweplatz.

Hobt ihr schun unser > Kerwemädscher < geseje?,
die Miss Germany ess en Dreck degeje,
Vum Aussehe schun, konn mer erahne,
die sinn allererste Sahne.

Noch Oaner meecht ich besonders erweehne,
für 15 Johr Treue bei uns in de Szene,
hot immer fer jeden en Spruch parat,
unsern > Superschmuddel < - e Unikat.

Hebt nun Eier Gläser unn stimmt mit mir oi:
Die Biddelberner Kerb muß unser soi!

"Auf Mussigger!" - losst de > Kerwemarsch < erklinge
mer wolle all gemoinsam singe…

+++

Ja, so monches Aktuelle,
werd vergesse off die Schnelle,
doch wonn es en Witz belebt,
aus Vergongenem erhebt,
konn ess noch in spätre Zeide,
Freude unn Genuss bereide.

So ob unn zu hob´ ich geheert,
ein Loch sei net der Rede wert,
deshalb Leute hergeheert,
wer so denkt, der denkt verkehrt:

Wie einst > en Monn < zu späder Stund,
vollgesoffe, mied wie´n Hund -
vim Dämmerschoppe hoamwärts zieht,
unn e rot-weiss Absperrband net sieht.

Er laaft wie immer, Hond on de Wond,
oan Fuß vorn oannern oam Stroßeroand,
gonz zielstrebisch dabbt er fatal,
ins > diefe Loch < fer de Kanal.

Er hot probiert, sich hoch zu hiefe,
aus dem dunkle Loch, dem diefe.
"Helft mer doch", hot er geschrie,
hot gewunke, gab sich Mühe… ,

doch Koaner kam in dieser Noacht,
vorbeian diesem dunkle Schoacht,
Zum Glick, dacht er noch, hob ich ja,
moi Telefon, des Nokia.

Unn hot als letzte Chanc´ gesehe,
en Notruf oan soi Fraa der Ehe.
Worauf die Gute zu ihm eilte,
Verweis unn Tadel noch erteilte:

"Du heerst mer zu, in aller Ruh,
sunst schnebb ich dieses Loch hier zu!"

Sie tadelt weiter mit harte Töne,
er soll sich´s saufe abgewöhne,
Nur um endlich gerettet zu werden,
versprach er ihr den Himmel auf Erden.

Drum speelt die Mussig fers Unglickgesicht:
"MARMOR, STEIN UND EISEN BRICHT…"

+++

Fastnoacht derf im Spruch net fehle,
drei Geschichte muß ich erzeehle:

Woann de Sekt in Ströme fließt,
mer ess Lewe voll genießt,
woann mer die liewe longe noacht,
oa Dummheit noch de oannermoacht,

woann mer donn oam nächste Doag,
plötzlich net meeh lewe moag,
weil de Schädel brummt unn kracht,
unn mer im > Kroankehaus < uffwacht,

unn garnet waas wo mer doann ist,
aus Versehn aach noch ins Zimmer pisst -
unn sieht im Spieschel soine Wunde,
Beine,Arme offgeschunde,
unn de goanze Kobb verbunne
> Weiberfassnoacht <- scheene Stunne.

Für diesen Fassenacht-Patient,
den ehr all Minoanner kennt,
speelt die Mussig, des ess Pflicht
"NACH HAUSE GEHEN WIR NICHT…"

+++

Off die Geschichte hier fürwahr,
fraan mer uns schun seit Februar,
dess war en Heiterkeitsausbruch-
herzlich Willkommen in unserem Spruch:

Bredder die die Welt bedeude,
werd die Bühne oft genoannt,
mer steht vor em Haufe Leute
ruckzuck werd mer weltbekoannt.

Dies doachte > Moann unn Fraa <-
als plötzlich folgendes geschah:

Im Volkshaus bei de BCA,
die Prunksitzung läuft wunderbaa,
es Orchester bleest de Auszuchsmaasch,
lauthals singt die goanz Bagaasch,

so ein Tag, so schön wie heute,
vun de Bühne zieht die Meute -
unn hinnerm Vorhoang - oh welch GRAUSS,
packt de Moann soi Nudel aus -
unn > nudelt < dess ess Fakt,
soi Fraa > im dreiverdel Takt <.

Drum speelt die Mussigg ohne Fraach:
"SCHIEBE NACH, SCHIEBE NACH…"

+++

Die zweit Sitzung - oa Woch speeder,
gab´s bei uns e morz Gezeeder:

Unsern Träner, schreit goanz laut:
"Wer hoat die > Tornerfoahn geklaut? <,
dess war´n sicherlich die RODE-
orrer oannern Vollidiode!"

Doch so e Sitzung läuft net ohne
Kerweborsch unn Sportskanone,
drumm honn mer mir veel Fondasie,
e Foahn gebaut - froocht net wie!

E Dischdeck unn en Besenstiel,
brachte uns zu unserem Ziel.

Es Publikum war hell begeistert,
jubelde off de Disch unn Stiehl
super Männer - toll gemeistert,
Eiern Offdritt, der gefiel.

Unn unsern > Träner < voller Qual,
sterzt zu soiner Fraa im Saal -
unn erzeehlt ihr goanz verhohle:
"die henn unser Foahn gestohle!"

"Ei Schatz, ich glaab jo du bist Kroank,
die Foahn, die steht > de Hoam im Schroank <!"

Drum speelt die Mussigg fer den Moann:
"GEH`ALTE SCHAU MIE NET SO DEPPERT OANN"…

+++

> Prinz Porno < - alias Möchtegern,
woann verheierde Männer laafisch wern,
off em Parkplatz bei verdunkeltem Licht
hot mer´n > beim Tät ä Tät < erwischt…

…im Auto vor em Resdoroa,
fing diese Geschichte oa:.
En Gast hot es Hotel verlasse
Unn konn´s of oamol garnet fasse,

"Woss hör ich hier für Töne?,
Gequitsch unn Gestöhne?"
Woss em do zu Ohren kimmt,
dess war net fer ihn bestimmt!

Der Prinz gestand mit wenisch Worte,
soi Mitgift wärn soi Fastnachtsorde-
unn körperlich wär er Topfit,
soi Liebestechnik wär de Hit.

Worauf die süße kleine Maus,
dem Prinz soi Instrument packt aus,
bläst de Narrhallamarsch zum animiern,
ess macht ihn Spaß ihn zu verführn.

Er bittet um ne Zugabe
unn spendet ihr Applaus:
"Mach bitte etwas schneller jetzt-
ich muß um zwölf nach Haus!"

Die gonz Geschicht ereignet sich-
paar Woche noch Sylvester
unn seitdem gibt's in Biddelborn
> TOP SEX <, des neue Blasorchester.

Die Mussigg speelt fer den Verein:
"DU KANNST NICHT TREU SEIN…"

+++

Bei sogenannte Gruppereise,
gibt´s immer super Sonderpreise-
unn veel Veroine - aus unserm Ort,
fahrn sehr gern als Gruppe fort.

Spanien war das ferne Ziel,
der > Männer Eins < unn es gefiel.

Endlich dorr unne angekomme,
hon e paar Jungs glei en Drink genumme,
Sie saaße vorm Hotel - off de Terass,
unn blitzschnellwarn se drebbelnass.

Getroffe vun der > Wassermasse <
Soviel wie en > Oamer < konn erfasse.
Warn alle Gäste, die unne saße.
off der Terass, vor de Straße.

Mer dachte, do ess e Rohr kaputt,
unn schun kam de nächste Schutt.
De Kellner hoad die Hoand gehowwe
Unn warf en beese Blick noch owwe -

denn diesmal traf es ihn noch krasser,
er hat de goanze Mund voll Wasser…

... paar Minude speeter, es dauert net loang,
stond de Kellner, de Chef unn Bolizei im gong
unn klobbe oan Zimmer funfhunnertacht,
doch die warn dess net - die hoans nur betracht.

Die sponische Bulle hatte Schloagstöck in de Hoand,
die zwaa Biddelberner warn weiss wie e Woand:
"Bei uns ess koan Oamer, koa Schissel, koan Dibbe,
mit dem wo mer Wasser enunner koann kibbe!"

"Mer Zwaa - do kenne se jeden hier frage,
würde uns so woas im Lewe net wage!"
Doch diese Chefs, henn koa Erbarme,
unn glawwe koa Wort, dene zwaa Arme.

Sie verweise die Beiden sofort zur Kasse,
um oam nächste Doach dess Hotel zu verlasse.

Zum Trost speelt die Mussigg fer die Zwaa allein:
"KOMMT BRÜDER WIR TRINKEN NOCH EIN…"

+++

En Verein, hat e Reise ausgeschrewwe,
doch leider war´s Intresse ausgeblewwe.
> De Bus < der war schun längst gebucht,
die Haltestell war ausgesucht,
s Hotel wurd zeidisch oabbestellt,
des ging gut, goanz ohne Geld.

Es kam dann, wie es kommen musste,
Abreisenoacht, die goanz bewusste:
Der us, der stand um verdel noch zwaa
On de evangelisch Kersch, doch es war keiner da.

De Busfahrer war oam iwwerleje,
weit unn breit koan Urlauber zu seje,
wird ich vielleicht gefilmtoff der Gass,
bin ich oam End bei: Verstehen Sie Spaß?

Nein, Herr Busfahrer - falsch gedacht,
de > Vorsitzende < hatte en Fehler gemacht!:
Noja, es konn schun mol bassiern,
das mer > vergisst < wos > zu stoniern <.

Unn wisst ehr, wie dess weidergeht,
der > Clubbeitrag < wurd donn > erhöht <.

Drum speelt die Mussiggunter Qualen:
"WER SOLL DAS BEZAHLEN?..."

+++

En > Kerweborsch < zog´s in die > Staade<
Weil die dort alle off den waade.
Er will Kultur eniwwer bringe,
mit denne Kerwelieder singe,
will die lerne Hoandball speele,
unn vunn Biddelborn erzeehle.

Oam 9. August, ess war noch fast Noacht,
hoann se de Bub oan de Fluxhplatz gebrocht,
Mama, Baba, Froindin, > Froinde <
Stande in de Hall´ unn groinde.

Die traurische Abschiedseskorte,
ess off em Weg zur Parkhauspforte,
bis off zwaa vun diesem Haufe,
sahmer se all in oa Richdung laufe

Diese zwaa paakte off Paakdeck drei
Unn hatte nur > 7 Mark 50 debei<.
Doch de Paakschoi-Automaat,
bestoand off soine 15 Maak.

Also ginge se on Kasseschalter
zum strenge Parkhaus-Geldverwalter.
Der hatte zur Aufgabe aufzupasse
Unn ohne bezoahle - koan rauszulasse.

Er riet dene Buwe ruft de Hoam oann,
damit Eier Mutter - Eich Geld bringe koann.
Die > Mama < ess donn noch Fronkfert gescheest
Unn hoat die > zwaa Buwe ausgeleest <.

Unn die Mussigg speelt hier vorn:
"MIR ZWAA BUAM HON ZORN…"

+++

Hoabt ehr doann schun moal bedoacht,
woass > en Vadder < alles moacht?
Noach em Boade soamsdoachs speet,
der Baba off den Balgon geht,

steckt sich e Zigarettsche an -
unn steht so da, als nackter Mann,
als plötzlich hinner ihm die Dier,
ins Schloss fiel vun soinem Quardier.

Nun stand er da, zitternd unn keift,
die Nachbarin zum Hörer greift…

…unn ruft die Fraa vum Nackde an:
"Du, bei Dir steht en > nackde Mann <,
> off em Balgon <, der will wohl sponne,
hot hinne nix unn aah nix vorne,
ruf Bolizei, goanz schnell jetzt - bitte,
oam beste gleidie vun de Sitte!"

Jedoch in de Zwischezeit -
De Sohnemoann - Babba befreit!

Unn als Doanke - woass en Hohn,
gab´s Prügel feer den brave Sohn,
Hausarrest unn noch veel mehr,
die Kinner howwes werklich schwer.

Drum speelt die Mussigg im Gewimmel:
"WIR KOMMEN ALLE IN DEN HIMMEL…"

+++

> Drei ortsbekonnte Flasche-leerer<,
sogenoannte Spätheimkehrer,
zoge vun Kneibe zu Kneibe im Ort,
off oamol warn zwaa Stück fort.

Alloa gelosse unn versetzt
ess er aus de Kneip gewetzt,
off´s Fahrrad droff, ab dorsch die Mitte,
Richdung nächst Kneib, wie dess so Sitte.

Vun weidem Sah er off wacklische Sohle,
soi zwaa Kumpane beim Klimmstengel hole.
Er rast wie en Erre, die Hauptstrosse enuff,
de Abstond werd geringer, er holt rieschdisch uff…

…er fraat sich unn denkt, glei hoob ich´s geschafft,
ess war schun zu spät - er hoat nix meh gerafft:
er will sofort bremse unn tritt zurück,
doch dobei hat er leider koa Glick…

…denn oan dem > Fahrrad < vun dem Mann,
warn > koa Rücktrittbremse < dran.
Ess hot goanz ferchderlich gescheppert,
der oane guckt total bedeppert,

dem oannern hoats die Fieß weggezoche,
de Roadfahrer ess iwwer de Lenker gefloche,
es Blut es gespritzt, die Knoche gebroche,
der Heile hot glei mit de Verletzte gesproche:

"Mer sinn jo heit noch net besoffe -
Wos moant ehr Jungs, die Kneip es noch offe!"
Dess war so ehr Leit, dess ess ohne Worte,
es gibt solche unnsolche unn onnere Sorte.

Drum speelt die Mussig gonzgenau:
"HEUTE BLAU UND MORGEN BLAU…"

+++

Jetzt kumm ich hier zum heiße Fall,
ich glaab, mer fraan uns werklich all,
das dieser > Mister Fehlerfrei < -
diesjohr aah im Spurch debei:

En Fehler det ihm niemols bassiern,
er wär jo net bleed, det sich net blamiern
er erhebt sich goanz oafach vun dieser Masse
er sei ein Mensch "über" erster Klasse!

Hinner solche dumme Sätze,
sollt mer e Froachezeiche setze!
Wie schnell hoat mer sich doch verdo,
heert Eich die Geschicht hier oo:

Es stellt die Stiftung Wassertest:
Vor Jahren objektiv schun fest,
dass > Kohle < zum Grille sehr begehrt,
> fer Mülltonne net empfehlenswert <.

Doch unserm Mister Fehlerfrei
War dess alles oanerlei,
Noch em Grille war er satt
Unn wollt noch mol schnell in die Stadt.

Vorher, so wie sich geheert,
werd de Kohlebehälter geleert.
Die Kohle henn net meh geglieht,
wie er dess als Fachmann sieht,
unn schüttet voller Wonne,
die Kohle in die schwarze Tonne.

Zum Glick gibt´s Nochberschaft im Gaade,
die sehe Rauch vor de Tomaade,
unn wähle gleich die oons-oons-zwoo,
ruckzuck sinn die Blauröck do.

Doch´s Feier war bereits gelescht,
meisterlich unn fachgerescht,
vum Noachbersbube goanz geschickt,
wurde die > Floamme < oafach erstickt.

Drum speelt die Mussigg dess ess klar:
"DA KOMMT DIE FEUERWEHR, TATÜ TATA…."

+++

Vor korzem bei em große Fest,
> Art Oiweihung < mit veele Gäst´,
laabte sich Zwoo oan Schnaps, Bier und Sekt,
unn weil´s dene alsfort besser geschmeckt,

troanke se EX - Gloas um Glääsjer
die Aache glänzde, goanz blass warn die Nääsjer
donn war´s genuch dess > speiüb´le Spiel <,
denn woas zuviel ess, ess zuviel. -

In oaner Stunn, warn die so megabreit,
so soin se- > unser Zimmerleit <.

Dess Lied VUM WATZ DER HINNERM DOR LEIT….

+++

> E Kerwemaid < aus unserm Ort,
wollt > Hose kaafe < aus weichem Cord,
Sie fuhr noch Gere in e Budick,
oa Hos hatte die noch, wos e Glick.

Als erstes wurd ess Preisschild studiert
Unn donn dess Höösje oaprobiert.
Der Oablick im Spieschel wurd tierisch genosse,
denn die Hose sitzt, wie oagegosse.

Doch ehrlich gesoat ess der Preis veel zu deier,
fer so wenisch Höösje- dreihunnert Eier -
unn zu allem Iwwerfluss,
> klemmt < aah noch de > Reißverschluss <.

Im Liege, im Sitze, im Hibbe, im Steh´
Der Reißverschluss will net uns verrecke uffgeh.
Die Verkäuferin kimmt unn probiert alle Trix,
doch on de Öffnung, öffnet sich nix.

Sie wird sichtlich nervees unn fängt oa zu schnaufe:
"lieb Fraasche, sie misse die Hose hier kaufe!"
"Dess seh ich net oi, ehr spinnt jo in Gere -
aah ich bin genervt, hol endlich ne > Schere <!?"

"Oiatme, Luft anhalte - bitte!"
en grode Schnitt, quer durch die Mitte,
mitte durch dess Cordbeinkleid -
unn schun war unser Mood befreit.

Die Mussiggspeelt dezu la la,
das Lied der schönen "BONDULA…"

+++

Wonn mer e groß Plantasch besitzt
wo Unkraut wächst, obwohl mer spritzt,
rührt mer als echter Bauersmann,
dess Unkraut besser garnet an,

sondern schickt zum > Unkraut jähde <,
seine > Schwester < in die öde.
Er gibt ihr e Hack mit festem stiel,
die ess gonz nei unn sehr stabil,
unn en gute longe Reche,
mit em Teil zum Unkraut steche.

So fährt se los ins Feld enaus,
fängt sofort oa, rebbts Unkraut aus,
fachgerecht unn gonz exakt,
wird´s Unkraut on de Worzel gepackt.

In Ritze unn in tiefe Spalte,
dut sie sich ungestört entfalte.
Dort werd niemehr Unkraut spriese,
nur noch Salate unn Gemüse.

Heim fährt Sie nach getaner Arbeit:
"Lieber Bruder, ich bin soweit,
ich hob ess Unkraut ausgerobbt
unn in große Sack gestoppt.
Jetzt siehst du nur noch Blumekohl!"

"Lieb Schwester WAS?, - Ei, bist du hohl?
Ich kenn als junger Bauernborsch,
moi gonze Pläzjer, dorsch unn dorsch,
unn kenn moi gonzes jung Gemies,
kenn jeden Stohhalm uff de Wies,
du konnst mers glaawe,verdammt nochemol
mer hatte noch nie Blumekohl,

Doch jetzt ess es eh zu spät,
du host em > Nochber soi Unkraut gejäht <".

Drum speelt die Mussigg in aller Ruh:
"DAS KANNST DU NICHT AHNEN, DU…"

Ehr liewe Leit, heert nun moin Schluß
Lache ess besser als Verdruß,
nehmt ess Lewe net so schwer,
unn trinkt mit mer die Gläser leer.

Ich load Eich oi - in unser Hall,
ich zähl uff Eich - ehr kummt doch all!
Singt, trinkt, unn donzt etliche Runde
Bis in die friehe Morgenstunde.

Doch jetzt load ich Eich herzlich oi,
moi Kerwegäst zu soi,
bei Steuselkuche und Hefeschnecke,
losse mer uns de Kaffee schmecke.

Noch mol will ich mit Eich singe,
liebe Mussigg - bitteschee:
losst de "KERWEMARSCH" erklinge,
die Biddelberner Kerb es wunnerschee.

  • Aus der Feder von
    Astrid Gremm
  • Superschmuddel
    Markus Müller
  • Kerwevadder
    Dominique Haese
  • Beivädder
    Bernd Scheuermann, Sven Senßfelder
  • Kerwewatz
    Daniel Ruhland
  • Schmuddels
    Guido Krämer, Mirko Bott