Kerwespruch 1961

Und endlich esses wirrer so weit,
mer honn unser Kerb aussem Groob befreit.
Heit ess woss los heit werd woss beborre,
dess segta on de Kerwerolle.
Die Tradition homma gelosse wie jedes Johr,
unn desjohr werds bestimmt wirra klor.
Woss vorkumme ess dess homma dreu,
dess soll 18. Tuwwak schunn so gewäse seu.
Losst des Örtche so gross seu wie ess will,
ess ess alles do mit Maulkorb orra Brill.
Ei jeder ess gewesche gekemmt unn in de Reih,
um zu hern die Kerwelitanei.
Drum seid mer gegriest er Leit kreiz un quer,
vumm Norde un vumm Oste,
vumm Weste un vumm Süde her,
vunn unserm Weu do sollter koste.
Er Musikante nemmt die Hörner unn seid net mied,
blosst eneu dass ess rauscht wie ess Ele im Ried.
Trinke wolle mer vor alle Dinge,
Kerweborsch losst die Gläser klinge.
Unn die Musik speelt mit Kraft,
dess Lied vumm edle Rebensaft.

Lied: Trink, trink Brüderlein trink

Ich mecht sich jetzt un bunten Bildern,
dess letzte Johr in Verse Schildern.
Halt eich fest unn kriegt mer net de Kromm,
ess ess desjohr allehond uffem Programm.
Um eich net long uff die Folter zu spanne,
mecht ich glei vunn vorne ofonge.
Des letzte Johr hatta jo eich in oocht genumme,
awwer hinna die Schlich seun mer schunn jedesmol kumme.
Do ess als erstes die Bittelberner Gemoo,
die bringt verdammt veel uff die Boo.
Sportplatz Kinnergate unn andere Dinge,
solle uns die richtig Kutur beibringe.
Am Sportplatz ess jo alles droo,
bloss fehle do e Kehelboo.

Unn dessjohr er Leit woss hott dess geräjend,
mer ess jo nur noch Räjescherm begäjend.
Dess halwe Ort war unner Brie,
Evakuiert hott mer dess Federvieh.
Ach woss dess wirra Schitt ess hert net uff,
nix wie die Hinkel uff de Borrem enuff.
E moncher hott aus Verzweiflung geläse die Biewel,
Liesje mach fort unn holl Gummistiewel.
Alles wurd weniger die Milch unn die Butter,
wa jo ko Wunner bei dem nasse Futter.
Selbst im Hof er Leit er liewe,
warn üwwerspült die Futterriewe.
Sogar vumm alte Wouwwe die Deichsel,
mer hatte Wasser soveel wie in de Weichsel.
Unn selbst im Haus im Keller drunne,
hoste vor laurer Brie nix me gefunne.
Der Schoure war ziemmlich enorm,
net allo in Bittelborn.
Im gonze Lond unn in de Nachbarstaate,
musstese dorchs Wasser waate.
Kartoffel Riewe Mais un Frucht war alles üwwaflosse,
die gonz Gemarkung war mit Wasser vollgesoffe.
Zu alles Uglikk - kam die Kunde hinnedruff,
in Darmstadt seun die Schleuse uff.
Unn die Feierwehr war gonz varikkt,
die hann en scheene Stich vadrikkt.
On Feierwehrmonn - en ziemmlich junge,
war vor laurer Eifer in de Kennel geschwumme.
Ess war de erste Eusatz in seum Läwe,
er war aus versaäje inne Loch gedräre.
Gottsei donk kenne mer des Wärra net mache,
unn die die nix hon kenne als wirra lache.
Er Musikonte bringt eier Instrumente in gong,
am 30. Mai ess de Weltunnergong.

Lied: Am 30. Mai ess de Weltunnergong

Unn weil mer äwe beim Wasser wan,
do war jo oner dorches Vihadukt gefan.
Unn, wie dess war muss ich eich varrore,
mirreme Schlepper - eme rorre.
Er derft net glaawe der war bedeppert,
er ess sauwer dorches Hochwasser gescheppert.
De Dotsch war im Wasser, die Boo uffem Tonk,
er ess dorchkumme Gottseidonk.
Bei dene Sache lisst der sich net long foppe,
dann 50.- D-Mark dess ess Geld fer die Schoppe.

+++

Unn jetzt gehts weira mit de Bauern,
glaabt jo net dass mer eich bedauern.
Der o was immer net richtig wossa soll,
betrochts eich do hinne uff de Roll.
Unn e jeder Mensch der errt sich,
spritzt doch der de Kappes mit U 46.
Unn wie er jo all wist,
dess Mittel nur fer Ukraut ist.
Unn äwe der der dess gespitzt,
mirreme geliejene Schlepper zum dorchfahn flizt.
Die Rärrer harra braat montiert,
unn uffem Acker essem dess passiert.
Beim sommemache harra scheunbar gedöst,
jedenfalls hott sich draus a Rod gelöst.
Ess ess en gure Kerl ess ess kon Stümper,
de Schlepper hing in de Riewe wien varrobbte fimfer.
Unn er Leit mer solls net mone,
ich seun immer noch bei dem one.
Fremme Mädcha warn bei uns zum Tonze,
vor laurer Juchhe hanse de Buss verpasst die Plonze.
Unn äwe der vor laura Greem,
fährtse mit de Roll schnell hom.
Do kennste greune - genoocht Settche,
er hat se sicher homgebrocht bei die Motter ins Bettsche.
Ich wern jetzt erst meu Kehl wirra Ele,
donn dun ich klei wirra weira vazehle.
Unn die Musik macht jetzt de Tolle,
blosst dass mas hert bin in Golle.

Lied: Mein Herz das ist ein Omnibus

Unn die Bauern dess mecht ich eich souwwe,
die leije mer heit besonders uffem Mouwwe.
Er Leit mer solls net glaawe,
Maschine aller Fabrikate.
Dess ess jo heit ko Seltenheit,
bloss wos Geld herkimmt - dess freje sich die Leit.
Wend eier Blicke de Houwwerode zu,
do bringta vor Staune dess Maul nemme zu.
Dess war dess grobbe vunn de Landwirtschaft,
jetzt misse noch e paar eneu dasses kracht.
Fährt oner enaus zum dreche mit froher Miene,
ich glaab ess war Lonz - en griebe.
Er war om Acker schunn omol erumm,
do werdem doch die Sach zu dumm.
Er hott vagewissert - der Raker,
wara doch om falsche Acker.

+++

Dem nechste Bauer war ess a schlecht ergonge,
der hat awwer om richtische Acker ogefonge.
Mer hotts gesäje er fuhr im Trabb,
seun Medrescher hatt dieselbe Fabb.
Er hott gemeht mer konns vumm weirem säje,
blos hat dess Sieb owwedruff geläje.
Unn seun Pattner dess ess en schlauer,
wie konnste donn so meje - du Bauer.
Ich hobb emol wirra genug geschwätzt,
erst werd emol oner ogesetzt.
Die Musik speelt jetzt ohne Bedauern,
dess Lied vunn de Bittelberner Bauern.

Lied: Geht homm er Bittelberner Bauern

Die Bauern wolle mer jetzt e bisje schone,
mer hon jo ach noch onnern Hondwerker bei uns wohne.
Do homma oner dess missta eich merke,
der dut als die Kieh die Huf auswerke.
Der geht rann an die Erwert - wien Büffel,
dess gonze Johr mirrem Rod unnra Dasch voll Schlüssel.
Neilich harra on getrunke hier im Ort,
er kimmt on seu Rod unn die Luft war fort.
Er hat on in Verdacht - na warte Genosse,
der kriegt vunn mer a die Luft raus gelosse.
Er schleicht sich ons Auto, er dut sich net deische,
unn liest gonz sachte die Luft entweische.
Er trikkt donn hom unn merkt erst spera,
dess war jo garnet dem seun Schlera.
Er steiht donn uff im Morgengraue,
mit de Luftpump in de Klaue.
Unn pummpt enau er liewe Leit,
dass des Auto wirra fahrbereit.
Jetzt wära veruzt - do kriegste die Gischt,
horsch na woss die Luft wirra zischt.

+++

Am drei Ländereck wird moncher gerollt,
do seun a zwaa Nochts homgetrollt.
Uffem Homweg seunse bis on die Londbach kumme,
pletzlich war der o vumm Erdborrem vaschwunne.
Im Wasser horra geläje der ame Tropf,
der onner zu Hilfe nimmten beim Schopf.
Er kriegten net richtig zu fasse - woss e Ding,
schluppdisch leije se alle zwaa im Wasser drin.
Sie hatte awwer ko Zeit zum fische,
ach woss dut die Londbach rische.
Doch dass mer beim trinke im Trenning bleiwe,
muss ich mer klei die Kehl eureiwe.
Die Musik speelt jetzt feu,
Kommt Brieder mer trinke noch eun.

Lied: Kommt Brüder wir trinken noch ein

Wer schlecht so spät durch Nacht und Wind,
ess seun e paar Monn die besoffe sind.
Sie kumme vunn Klo Gere gewälljert,
unn hon er Hose in de Hond geschlenkert.
Sie hann Gesichter wie des leide Christi,
unn honn sich er Schmerze getaalt fifti fifti.

+++

Unn on Sivester war oner vaschwunne,
sie honnen gesucht unn net gefunne.
Des trinke hatten ogeekelt,
im Auto essa longsam in Schlummer gesegelt.
Dort harra sich Meuns selwa uffgewekkt,
die Tochter hatten als erster dort entdeckt.
Unn donn vor de Aache noch dess geflimmer,
fährta dorchs Ort mit de Roll wie immer.
Er ess jo fleissig wie so moncher oner,
doch ons - e Milchkann ess kon Abfallomer.

+++

Noch ons er Leit ess war vor e paar To,
do warn e paar in Berkoff allo.
Dort hanse die Berkoffer Kerb helfe feiern,
um Mitternocht honse ogesetzt sich hom zu steiern.
Donn honse noch zu gura letzt,
e Roll vakehrt erumm uff die Gass gesetzt.

Neilich hott oner de Parre umgerennt,
der hett beinoh nemme in die Kerch gekennt

Ess schalt durch Deutschland grüne Aue,
de Staat der det Paläste baue.
Die denke nur vunn heit uff moje,
die wolle blos er Beamte vasäuje.
Die Bosse kumme uns gonz schee deier,
desshalb bezohle mer a die fehle Steier.
Dess Herz dut om im Leibe weh,
womma sieht die Paläste steh.
Ich hobb jetzt baal genung vazehlt,
noch ons heit werd a gewählt.

+++

Unn beinoh hette mer jo vergesse,
unserne Mäfcha die Ehr oso messe.
Gukkt ma wiese wirra blinke,
unn homlich mit de Röckscha winke.
Wosse spitze dun er Meilscha,
unn gukke noch unsane Geilscha.
Unn monch o die werd schunn wirra denke,
wer vunn dene werd mich heit Owend homlenke.
Die o ess dünn die onner rund,
sie wieje all iwwer 150 Pund.
Er kennt grod mache woss da wollt,
zum Tonze werda doch wirra geholt.
Er braucht net so brille braucht net so leiern,
mit uns missta doch wirra Kerb feiern.
Unn die Musik speelt jetzt wie die Araber,
jede Katze brauch ern Kater

Lied: Jede Katze brauch ern Kater

Mer seun jetzt longsom omm Enn o kumme,
hoffentlich krieje mas net Üwwel genumme.
E paar Kriffelbisser die gibt's immer,
des werd jedesjohr schlimmer.
Awwer mer Kerweborsch mache uns do nix draus,
die Hauptsach ess ich hobb meu Red jetzt haus.
Machts Prtmane uff unn lost die DM rolle,
sunst sunse eich doch bloss ess Finanzamt holle.
Ich hern jetzt uff meu Kehl dut weh,
unn unser Geil kenne a nemme steh.
Unn jetzt mit Hallo die Kerb gefeiert,
wonn a moncher wirra schree hom steiert.
Esst trinkt Tonzt unn seid froh,
die Biddelberner Kerb ess wirra do.

Lied: Kerwemarsch

  • Aus der Feder von
    George Hirsch
  • Kerwevadder
    Horst Wilkel
  • Beivädder
    unbekannt
  • Kerwewatz
    unbekannt
  • Schmuddels
    unbekannt