Kerwespruch 1983

Grüß Gott ihr Leid, er werds all wisse,
es gonze Ertche es heid froh,
es höchste Fest mecht koner misse,
des es unser Kerb sie es wirrer do.
Ich grüß euch all, egal woher,
ob Bekonnte orrer Fremme,
heid geht's bei uns gewiss hochher,
do lernt mer wirrer mochen kenne.
Sie kumme vum Süde vum Norde vun Oste vun Weste,
des es jo ach koa Wunner,
die Büttelborner Kerb es doch die beste,
die geht im Läwe net unner.
Wos ich so säg, vun do howwe meum Gaul,
lauter scheene Dame,
ihr Kerweborsch seit net faul,
die dunn nur of euch wade.
Seid net zu de Mädcher un donzt recht fleißigh,
geht dro un sogt net no,
ob 15 orrer 35,
es es fer jeden o do.

Bevor ich jetzt mit dene Sache beginne,
die so im Ertche seun gelafe,
muß ich erst vun mer wos bringe,
denn ich seun jo ach kon brav,
es war so schee die gonz letzt zeit,
mit de Astrid mit meum Schatz,
wo ich gonge, warn mer zu zweit,
im Bett un ach om Essensplatz.
Letzt kum ich hom, war gonz fidel,
un voller scheene Gedonke,
Donn wie erschrocke, wos es jetzt los,
die Gesichter hon bis of de Erd gehonge.
Ei Bub stell der vor, war es erste Wort,
du werst zwa garnet fasse,
deun Schatz die Astrid die es fort,
sie hod uns grod verlosse.
Warum ses gemocht hod, was ich net,
mer war net gut zu Mute,
jetzt bin ich wirrer allo im Bett,
un muß mer schnell e onner suche.
Wonn ich jetzt meu Gloß dunn hewe,
dut die Musik gonz longsom spele,
es es net geloche un ach kon scherz,
aus de Panneflicker de letzte Vers.

Lied: Panneflicker

Jetzt kumme so zwa des seun ko Blödel,
sieht aus wie im Märche vun Hänsel un Gretel.
Sie hon gedrosche krit des war gonz doll,
die Rolle warn bis zum iwwerlafe voll.
Es hod Frucht gäwe es war e Pracht,
denne zwe hods Herz gelacht.
Jetzt fahrn mer hom, ich mach de Schiewer bisje hoch,
daß du de Weg finst, du fährst hinnenoch.
Sie kumme hom, die Freud war nemme doll,
weil seun Bub had ach e Loch in de Roll.
E Spur vum Acker bis in de Hof,
do kennt er eich denke, do war wos los.
Jetzt mecht ich gern trinke e Gläsje Woi,
denn die Spur führt grod in Wasserschmitz eneu.
Un die Musik spelt ver die zwa Blödel,
des Lied aus em Märche vun Hänsel un Gretel.

Lied: Hänsel und Gretel

Do hon ich auch on, des es e Luder,
wonn mich nix täuscht war des meun Bruder,
fährt of e Fest ich was net wohe,
seift sich die Kutte voll es war nemme schee.
Un wie es so es, wenn mer richtig besoffe,
dumm om alle gute Geiste verlosse.
Nochfühle kon ich sem, ich hobs ach schun erlebt,
wonn mer mim Arsch offem Ronsto klebt.
Eugeschlofe warer, gonz tief und Fest,
die onnern hon geklabt, er leid schun im Nest.
Es war schun Mojend und bal hell,
helt e Auto vor ehm of de Stell,
es warn die Bulle, die gute Genosse,
ei den Kerl kenne mer doch net leie losse.
Sie trogen ins Auto, un die papierne raus,
ei der wohnt jo in Büttelborn newer de Kersch in dem Haus.
Sie fahnen hom es gab kon Donk,
legten in die Kich hinnern Dich of die Bonk.
Un wie er ofwacht vun seum hadde Nest,
horrer geklabt er wer offem Stroßefest.
De Dich war gedeckt mit Worscht un Bodder,
Do hod se awwer gekresche die Modder.
Ab ins Bett, un los dich net henke,
wonn des ons sieht wos solle die denke.
Un die Musik spelt, ich eel meun Hals,
des war de Jäger aus Kurpfalz.

Lied: Der Jäger aus Kurpfalz

Noch Frankfurt fährt e mords Madom,
zwa Farbe had se offem Kopp,
ich was net me, wies war un wonn,
sie ess gefahrn wie im Kalopp.
stellts Auto ab, un schließt ach zu,
und in die Festhall fort,
des Schild hod se net geseje,
und parkt om falsche Ort.
Sie kam zurück ojemine,
de Parkplatz der war frei,
ja jetzt versteh ich gar nix me.
Des es e Sauerei,
sie es donn ab zur Polizei,
den Diebstahl ogemeldt,
de Spaß vum owend war vorbei,
do hads ichs hergestellt.
Nimmt sich e Taxi un fährt hom,
legt sich gonz ruhig ins Bett,
de negste Doch hod sies erfahrn,
noch bod Homburg hanses obgeschleppt.
Jetzt trink ich noch e groß Glos Woi,
un die Musik speelt flink,
Trink, Trink Brüderlein trink.

Lied: Trink, Trink Brüderlein trink

Dir Frucht es ob, die Ährn es rum,
sie hod gonz gut gedrosche,
Doch moncher Fahrer stellt sich dumm,
un macht so dumme Bosse.
Fährt seu Maschin dorchs gonze Ort,
un Stunne dunn vergehe,
Er find doch do den Acker net,
dort wo die Rolle stehe.
So seun halt mol die junge Leid,
dess kennt er mer ruhig glawe,
fer die zehlt doch des one nur,
hauptsach die Stunne lafe.

+++

En Feuerwehrmann, gonz weiß un hell,
fährt of e Übungstur,
un wie des so es, des geht gonz schnell,
mit 100 Sache nur.
Of omol merkt er daß de Tacho fällt,
es Auto werd als kleiner.
Sie henke drin bis iwwer de Ohrn,
zu helfen weiß sich keiner.
E Lichtche geht dem one off,
ei mache mer doch ko Bosse,
um denn Kann eraus zu krige,
misse mer es wasser raus losse.
De Tonk war leer, die Brie war draus,
zum dricke mußte alle dran,
of jeden Fall de Kann war haus,
do sieht mer wos a Lichtche konn.
Un die Musik spelt jetzt brav un klar,
Dann kommt die Feuerwehr Ta tü ta ta.

Lied: Da kommt die Feuerwehr Ta tü ta ta

Wenn der Vater mit dem Sohne,
eine kleine Reise tut,
des geht meistens in die Hose,
un gonz selten werklich gut.
De Bub wollt fliegen, in die Staate,
Zwa Auto voll hon ehn begleit,
sie wollte winke un ach wade,
bis der Abflug ist soweit.
Zum gucke gings dann durch de Zoll,
of die Terrass hinauf,
Damit se frei von Waffe sin,
un glone Bombe auch.
De erste war de Krämer Klaus,
der segt doch werklich doll un plump,
ich hob nix, ich mach ach kon Flaus,
awer der letzte hod e Pistol im Strump.
Des war de Vater vun dem Bub,
Do hin bleiwe se hocke,
sie kumme net enaus zum Flug,
do hed der do vorne es Maul hale solle.
Aus war der Traum vom Abschied nehme,
wonn de net ruhig best holle mer die Polizei,
un donn kame fast die Träne,
de Bub war fort, un er wirrer frei.

+++

Heiser Kafe, seun die Renner,
awwer Halle baue noch veel schenner,
Had en Bauer bisje Geld of de Hond,
fährt er schnell dorchs gonze Lond,
besichtig Halle kreiz un quer,
die gefellt mer, die baue mer.
Baut so e Ding, gonz rießegroß,
die Sparrn seun druf, es war famos,
of omol kimmt de Bauherr gerent,
seid er verrickt, hed ergepennt.
Betrocht eich mol den one Storz,
un die gonze Sparrn seun so korz.
Jetzt misse se wirrer alles runner baue,
so esses hald wonn mer e Hall dut baue.
O Glück es es noch net bekonnt,
ich glab dem seu Geld hod net gelongt.
Un wehrend ich meu Kehl dunn eele,
dut die Musikver den spele,
Halle baue des seun Quale,
wer soll das bezahle.

Lied: Wer soll das bezahlen

In Bonn gehts weiter wie eh und je,
Kartoffelpreise hon mer des es nemme schee,
in alle Ecke herrscht Hungersnot,
de Streik es rum, die Gewerkschft halb tot.
Die Diana krigt a Kind, de Charls es heiter,
Richard Burton is gestorwe, de Junke seift weiter,
Erschosse hod seu Frau de Scholz,
die Nicole hod geheiert, un es gonz stolz,
Björn Borg werd geschiede,
Fürst Rainer will heiern, des find ich gonz doll.
In de Oste dunn se Milliarde neudunnern,
mer breichtese selbst, des es doch klar,
wonns emol kracht, derfe se sich net wunnern,
die rüste domit of, des es werklich wahr.
Für uns is doe Olympiade ach vorbei,
es wurd zwa viel geschowe,
en Haufe Medallie hannse debei,
mer müsse se ach mol lowe.

+++

Nun kumme noch e paar Glonigkeite,
die so im Ertche seun bassiert,
es gab kon Bangkrott un ach ko Pleite,
Des hed sich fer uns ach net rentiert.
De Deiwel es ausem Volkshaus draus,
de Zeitz der war glei drin,
jetzt horrer in Wolfskehle e Futterhaus,
do gehert er ach enin.
De Moaster hod e Quellelädsche,
Schröppels Walter war in Kur,
de Kremer had die Bo kaputt,
des war e greßer Tur.
De Onner hod seun Koffer vergesse,
in Ungarn lies ern steh,
er segt, un war net druff besesse,
des dewje fliege mer nemme he.
De erste wird der letzte seu,
wos ich noch soche derf,
Donn trink ich noch e Gläßje woi,
es war Vorsjohr on de Kerb.
En Kerweborsch es es kon dofe,
war vollgesoffe bis enoff,
es offem Scheißhaus eugeschlofe,
un wacht vor mojend nemme of.
Des wer jo alles net so schlimm,
wonns gewäse wer dehom,
awwer so wars in de Tornhall,
es war kon beese Trom.

+++

Un nun es Schluß, er liewe Gäst,
mit dem Gered vun mir,
jetzt feiern mer unser Kerwefest,
denn deßhalb seun mer hier.
Ich lod eich eu fer in die Hall,
er werds ach net bereue,
es werd ach schee of jeden Fall,
do dunn die Kerweborsch fer soje.
Un die Musik speelt zum Schluß gonz froh,
wehrend ich meu Gloß schluck unner,
die Büttelborner Kerb es do,
die Büttelborner Kerb es unser.

Lied: Kerwemarsch

  • Aus der Feder von
    Phillip Göbel
  • Kerwevadder
    Rainer Göbel
  • Beivädder
    unbekannt
  • Kerwewatz
    unbekannt
  • Schmuddels
    unbekannt