Kerwespruch 1995

Wie jedes Johr um diese Zeit
steht vor Eich oaner hoch zu Roß
so war es immer unn so isses heit
denn do drof is Verloß

Es liegt en Duft hier iwwerm Ort
vun frisch geback´ne Quetschekuche
de Vadder schaft es Sparbuch fort
un die Modder die dut´s suche

So dut sich jeder insgeheim
off dieses Fest hier vorbereite
un selbst de Vorstoand vum Tornverein
dut Frohsinn hier verbreite

Jeder ess heit gut gelaunt
un jedem wird gewunke
jeder Zugeraaste guckt erstaunt
denn mit jedem werd getrunke

So feiern mer bei Tag und Nacht
mit alle Leit unn alle Gäst
bis aach de letzte net mee lacht
unser aller Kerwefest

Drum singt un lacht, seid alle froh
drickt jedem heit en Kuß off´s Maul
un geht fer mich mol off de Klo
denn ich koann net nunner vun moim Gaul

Wenn jetzt de Kerwemarsch erklingt
Nemmt eier Gloas, stoßt mit mer oh
un alles klatscht un alles singt
die Biddelberner Kerb ess wirrer do

Lied: Kerwemarsch

So ehr Leit jetzt geht es los
Ich mach mer jetzt schun in die Hos
wos do so moancher Sprotsgenosse
im letzte Johr hot losgelosse

So mancher vun Eich werd sich wirrer entdecke
werd net glei stinkisch un dut net erschrecke
seht des goanze mit e bissje Humor
so woas kimmt in de beste Familie vor

Doch moant oaner er mißt mich vum Gaul runner zerrn
un mißt mer oa flabsche werrer moi Hern
macht mir defeer moin Kopp net ob
weil ich den Spruch net geschriwwe hob

Awwer wos hier heit werd vorgelese
ess die reine Wahrheit gewese
wenn aach e bissje ausgeschückt
unn hier unn do zurecht gerückt

Es gibt den Spruch vum "Trucker Phil"
der immer des macht wos er will
doch brauch mer do net weirer fort
so oaner gibt´s aach hier im Ort

En junge Mann mit wenisch Haar´n
in "Jockels" dut er Laster fahr´n
verdient sich dodebei paar Mack
immer zur Stell, immer off Zack

De Chef segt zu ihm: "Moje frieh
noch Lüneburg, do fährst de hie
dust dort e Ladung fer uns holle
weil mer die schnell verkaafe wolle"

In aller Früh, wie es besproche
ess er donn aus soim Bett gekroche
un hot gedenkt in soimer Raasch
"Morgenstund hat Blei im Arsch"

Mit so Gedoanke noch im Kopp
ess er in Jockels off de Bock
de Diesel oh un losgefahrn
schun war er off de Autobahn

In de Kassler Berge dann
Denkt er off oamol "Mann o Mann"
Hot sich woas in de Kolbe gedrickt
Weil die Maschin iwwerhaabt net ziggt"

Doch wer loang fregt, der geht long err
es werd gefahrn mit dem Gescherr
In Lüneburg doann ogekumme
hot er de Frachtbrief iwwernumme

Er macht die Ploan off un steht do
Wie in de Wüst en Eskimo
Es zuckt der Schock bis in die Zeh´
der Kann war voll bis ouwwe hee

Do war woas los, ehr kennt mer´s glaawe
de Christian ess drei Doach im Kreis gelaafe
zwaa mol hee un zwaa mol hoam
mußt der mit dem Laster fahrn

un die Musik speelt jetzt des Lied vum Blatt
vun dem, der falsch gelaade hat

Lied: Hab mein Wage voll gelade

Es werd gefahrn, die kürzeste Strecke
mit em Auto, ums verrecke
guck nur mol Samstags Mojens bloß
vor "Hinnerbäckers" off de Stroß

So dut´s im Örtche oft passiern
daß sich so mancher dut blamiern
In´s Auto noi un um vier Ecke
doann lässt er noch de Schlüssel stecke

Der Kurzbesuch, er war vorbei
un off de Gass do dut´s en Schrei
weil er net soine Aache traut
"Ehr Leit, moi Auto ess geklaut"

Der Moann, er hot net long gefackelt
ans nächste Telefon gewackelt
die Nummer vun de Polizei gewählt
un den Kann geklaut gemeld´

Er hot sich fast net hoam getraut
doch wie er in de Hof neu schaut
sieht er do drin soi Auto steh
un versteht die Welt net meh´

Im Hof kimmt ihm soi Fraa entgeje
un fregt "Host du e Gespenst geseje?"
Der bläst sich off wie en Teddybär
un kreischt "Wo kimmt des Auto her?"

Sie segt "Ach ich vun de Marie kumm
denk ich, do steht jo unser Auto rum
un hob mich weirers net besunne
un es korzerhoand mit Hoam genumme"

Ehr liewe Leit ich soag´s wie´s ess
so hot jeder soin eigene Streß
aach wie der Moann, der hot vergesse
daß vor seine Garage die Gass offgeresse

Er setzt sich ins Auto noi
fährt zwaa Meter raus unn schun hing er droi
Es ging nix me vor unn nix mee zurick
un unne war de goanze Auspfuff verdrickt

So ich will zum nächste Verkehrsmittel kumme
es werd doch immer öfter es Fahrrad genumme
Wie die Gymnastikfraue vum Tornveroin
die mit dem Road on de Kloa-Gerer Boahnhof soin

um vun dort en Ausflug mit de Boahn zu mache
drum wurde geradelt, daß die Schwarte krachte
mer wollt sich die Räder net klaue losse
un hot se im Pulk zusoammegeschlosse

Als sie Owends wirrer oagekumme
woar on die Räder en Zettel gebunne
do drof stand geschrewwe, gonz deutlich un groß
"Danke für die Mitbenutzung von Ihrem Schloß

Doch leider hatt´ ich kein Schlüssel dazu
und trug Stöckel- anstatt Wanderschuh"
Da hatte die Fraue, wos gilt die Wett,
e wildfremd Fahrrad mit ogekett.

Drum spielt die Musik fer den Fraue-Clan
des scheene Lied vum Fahrroad fahrn

Lied: Ja mer san mim Radel do

So mancher wird heit vorgelese
weil er so dabbisch ess gewese
doch soach ich eich, ehr Leit, goanz forsch
die schlimmste soin die Kerweborsch

Als vorsjohr die Kolleesche vum Volkshaus drunne
sich vor ehrm Saal zusammegefunne
um euzulaafe un zu singe
do war noch jeder guter Dinge

Als sie sich in de Saal geschwunge
ess glei de Kerwemarsch erklunge
un nooch dem Singe un dem Winke
wollte se e Gläsje trinke

sie soin gerennt off schnellste Sohle
wollte sich e Sektche hole
und standen sprachlos vor der Bar
weil die noch geschlossen war

So mußte se sich soache losse
die Bar die werd erst offgeschlosse
bis fünf mol Eutritt wär kassiert
weil sich des erst doann rentiert

Doch jetzt muß ich faiererweis berichte
vun unserne Garde e paar Geschichte
wos do fer Dinger soin gelaafe
ich soag es eich, mer solls net glaawe

De Ausflug vun de Kerweborsch
der war spitze, dorch un dorch
denn dies Jahr wollte se net sparn
un soin noch München losgefahrn

Die Fahrt die ging schon Super los
mer warn a haln Stunn of de Stroß
off oamol hot´s so streng geroche
do hat de erste schun gebroche

Doann warn mer endlich oagekumme
mer hatt sich jo woas vorgenumme
off die Isar mitem Floß
er liewe Leit do war woas los

Die Sunn, die hot extrem geknallt
es Bier war reichlich unn schee kalt
über Bord ging dann der erste Mann
un so ging des sechs Stunne lang

Nie oagekumme mit dem Floß
soin fünf Brille un e Unnerhos
die leie off em Grund in de Isar dreu
"E bissje Schwund" ess halt immer debei

Als endlich mer in München warn
wollt oaner glei ins Stadion fahrn
"Die Bayern speele hei dehoam
Ich fahr glei mit de Stroßeboahn"

Oan de Ostkurv´ kaaft er sich a Kaat
doan drängelt er un macht sich braat
un fängt noch o do rum zu lalle
do warer a schun offgefalle

En Ordner hot en ogeschisse
un hot soi Eutrittskaat verisse
doch unsern Schoambes, gar net dumm
laaft oamol um des Stadion rum

In de Südkurv´ ogestellt
un noch oa kaaft fer deier Geld
als er dann stolz im Stadion stand
nahm ihn gleich einer bei der Hand

Es war der selwe Kerl gewese
der ihm die Eutrittskaat veresse
un nahm en mit, goanz ohne Hast
enunner in de Stadion-Knast

Nochdem es letzte Tor geschosse
hot mer ihn wirrer laafe losse
Zwaa Kaate kaaft un nix geseje
Wunner dunn immer wirrer gescheje

Mer han uns doann oam Bus getroffe
die meiste die warn vollgesoffe
soin Hoamgefahrn noch Biddelborn
doch drei Stück warn vergesse worn

Die wollte München bei Nacht erlewe
un zentnerschwere Weiwer hewe
wos ess des Städtche doch so schee
nur geseje han die eh nix meh

Oam nächste Doach, konnt mer se seje
dorch´s Örtche laafe, es war schun zeje
un weil se aus München mim ICE kumme sin
warn im Portmonee nur noch Pfennische drin

Doch net nur iwwern Ausflug koann mer herzhaft lache
do gibt´s a noch paar oanner Sache
drum erzähl ich Eich jetzt, es ess net iwwertrewwe
vum diesjähriche Kreiskerweborschtreffe

In de Zeitund konnt mer´s lese
in Dornem war des Fest gewese
es wurd gefeiert un gelacht
un so moancher Humbe leergemacht

Nur oaner vun uns konnt es saufe net losse
un hat sich alle Lichter ausgeschlosse
erst ess er off alle vier offem Boarrem gekroche
un doann in de Eck zusoammegebroche

Do horrer geleje im eigene Saft
er hatt wohl die 12 Liter Bier net verkraft
off oamol segt oaner: "Her, gebt emol Ruh,
der grunst jo wie e hochträchtisch Walroßkuh"

Noch ner halwe Stunn es de Notarzt kumme
un hot en a glei mitgenumme
im Kroankehaus doann en Schlauch neu gestummpt
un mit siwwe Atü de Bauch ausgebummpt

Als er oam nächste Doag offgewacht
hot er sich glei aus em Staub gemacht
hatt die Nadel aus em Arm gezerrt
un ess hoam gelaafe, halb verderrt

Jedoch bei de Wettkämpf oan diesem Doach
hot uns so schnell koaner woas vorgemoacht
die Kerweborsch vun de Tornhall aus Biddelborn
soin hochverdient Sieger worn

Un im nächste Johr, es Kreiskerweborschtreffe
Ess oan uns Biddelberner vergewwe
Off em alte Sportplatz werd e Festzelt steh
Doann losse mer drei Doach die Post abgeh

Deshalb dun mer jetzt schun due Stimme eele
und die Musik dut es Lied vun de Kerweborsch speele

Lied: Kerweborsch soin lust´che Brüder

Wills Du dich heit gesund ernährn
do musst de off doin Dokter heern
Vitaminreich un frisch soll alles seu
drum kaaft mer gern beim Bauer eu

So kimmt´s, daß neilisch so e Fraa
beim Massing eukaaft, wunnerbar
frisch Obst, Gemies, e paar Banoane
un Eier fer em Moann soin Kloane

Wie sie dehoam doann ogekumme
werd aus em Schroank die Ponn genumme
eneugeschlouwe Ei fer Ei
do dut´s aach schun en laute Schrei

Des Fraasche fackelt gar net loang
un schnappt die Eier samt de Poann
rennt zu Massing´s off em schnellste Weg
un stellt den Kroom dort off die Thek

"Guck in moi Poann, kumm her guck do
hier schwimmt ein Hühnerembryo"
die Erna segt "des gibt´s doch net
zeig her die Poann, des glaab ich net"

Wie sie sich des genau betracht
do hot de lauthals losgelacht
"soll ich der soache woas des ess -
en Foarem Woll vun deune West"

Ehr glaabt mers net, woas dere Fraa
die Geschicht so peinlich war
drum braucht ehr eich koa Gedoanke zu mache
beim Bauer gibt´s werklich nur frische Sache

Die meiste vun eich wern´s bedabbelt ho
jetzt soin im Spruch die Fraue dro
drum will ich aach glei weirer lese
wos noch so es im Ort gewese

E Fraa dut Milch un Mehl auspacke
un dut defoo zwaa Kuche backe
fer e Silberhochzeit hier im Ort
un bringt de Kuche a glei fort

Ins Gemeindehaus es sie gefahrn
dort denkt se noch "moin lieber Schwan,
wos hon die fremme Leit geloade
vun dene kenn ich jo koan oane"

Noja, es ess jo aach egal
Un stellt de Kuche ins Regal
Setzt sich ins Auto un fährt fort
Sie will noch eukaafe im Ort

Wie se e zeitlang dehoam schun war
hot ogeruffe, des Silberpaar
"Gell, kimmst a in die katholisch Kersch"
do wurd se blaß wie en Gaadezwerch

Die Kuche, die se hatt gemacht
hot sie off´s falsche Fest gebracht
Die hon dene goanz sicher aach gemundet
un die Feier noch schee oabgerundet

Off de Gemeinde, medde im Ort
saß eine Frau auf dem Apport
sie war warscheuns e bissje Wund
un speelt nervees mit ehrm Schlüsselbund

Doch plötzlich rutscht´rer des Ding aus de Kralle
un ess dorch die Schenkel in die Schissel gefalle
Ich waaß, nochdem der Bund abgetauscht
wer jetzt en neie Schlissel braucht

Mer bleiwe glei off de Gemoa
do werd gebaut mit Zement un mit Stoa
Nur oans des hob ich net gerafft
warum do nur Owends werd geschafft

Doann hab ich bei uns im Ort geheert
en Dokter hätt sich schwer beschwerd
koa Herzfrequenz könnt er meh´ messe
es EKG koannst de vergesse

Hinnenooch, wär´n bei dem Krach do drin
die Leit kränker als se kumme sin
Ich mein bei diesem Durcheinander
die Praxis von "Prinz Alexander"

Doch net nur oam Rothaus werd gebaut
aach wenn mer in Richtung Oste schaut
do sieht mer wie die Wirtschaft blieht
im neie Industriegebiet

So mancher Betrieb hier aus dem Ort
dut sich e Heisje baue dort
bei oam do hot´s net long gedauert
do war de Keller rausgemauert

Un als die Deck doann druffgekumme
ess so en Kerl vum Bauoamt kumme
der setzt sich un guckt in de Bauploan neu
vun em Keller steht do nix dreu

Es wurd dehoam aa net long gefreegt
und glei en Baustopp offerlegt
do war die Hektik wirrer groß
wo ess de Ploan vum Keller bloß

Tage später hoann sen gefunne
er lag in de Schubload, ziemlcih weit unne
do half aa koa bettele un koa hoffe
der war nie offem Bauoamt eugetroffe

Un die Musik speelt jetzt, ess is e Gedicht
Es Lied vum Baue fer moi Eltern un mich

Lied: Schaffe, schaffe, Häusle baue

Schaust du aus em Ort Richtung Weiterstadt hie
do siehst de unser aller Mülldeponie
doch net nur Plastik un oannern Schrott
aach Wohncontainer gibt es dort

un weil mer die koann vun de Stroß aus seje
es noachts do oaner eugesteje
Des war bestimmt en Owwerschlaue
der wollt dort Schmuck un Bargeld klaue

Die goanz Bud hot er off de Kopp gestellt
hot alles gefunne bloß koa Geld
nur drei Flasche Schnaps stande do im Regal
er hatt se gesoffe, es war em egal

Off oamol wars em im Kopp bissje dumm
do denkt er "Ich glaab, ich leg mich mol um"
oam nächste Mojend wurd er entdeckt
un vun zwaa Poliziste aus em Tiefschlaf geweckt

Fer die Polizei war´s en morz Erfolg gewese
so konnt mer´s in de Zeitung lese
"In Biddelborn wurd en Eubruch gemeld´
un der Täter noch vor Ort gestellt"

Jetzt muß ich Eich noch e Stroy erzähle
vun oahm, der hier dut Hoandball speele
die Mannschaft wollt noch Darmstadt reise
um in´rer Wertschaft dort zu speise

Des war so e Kneip wo mer fer zeje, zwolf Mark
sooveel Kroam esse koann, wie mer halt packt
un dieser Kerl, koan kloane Dumme
hat fünf Tubberdibbe mitgenumme

Er hatt soveel gefresse, er war baal verplatzt
un oam Büffett horrer de Rest oabgeratzt
in soi Dibbcher verdaalt un die Deckelcher zu
unner de Jack war des Esse verschwunne im Nu

Off oamol segt er "Des Esse dut dricke,
ich glaab ich muß mol off de Dibbe"
Als er doann off em Klo verschwunne
Hon Hoandball-Kolleeche die Dibbcher genumme

Dem Geier dem werd jetzt oans ausgewischt
Tabasco eneu, e schee dick Schicht
wirrer unner die Jack in de Plastikdott
damit er jo nix merke dut

Oamnächste Doach im Training doann
wos hot der do geschwitzt der Moann
do ess die Brie nur so geflosse
un Floamme aus em Hals geschosse

Soi Kumpels freje "Wos ess en los
war se e bissje scharf, die Soß ?"
er segt: "Dort war des gut des esse,
doch oamol gewärmt konnst es nemme fresse"

Zum Schluß, ehr Leit, du ich berichte
die neueste Lokalgeschichte
Aufgrund rätselhafter vorkommnisse
dut oaner off soine Waad drei Hinkel vermisse

Vermutlich hot se en Fuchs geresse
un off de Stell glei offgefresse
Der Schaden, so stand es im Handelsblatt
Beläuft sich off ca. fünftausend Mark

So ehr Leit des war´s gewese
der Spruch der ess zu End gelese
jetzt brauch ich moi Stimm aach net me zu schone
un koann oaner trinke hier in der Krone

Doch fer heit Owend do load ich eich eu
in de Tornhall unser Gäst zu seu
ehr Mädscher kummt, un geht off die Pirsch
ich steh zur Verfügung als "brünftiger Hirsch"

Un zum Schluß dun mer nochmol zusomme singe
Drum soll de Kerwemarsch erklinge

Lied: Kerwemarsch

  • Aus der Feder von
    Fred Kraus
  • Kerwevadder
    Michael Hirsch
  • Beivädder
    Erik Becker, Mirko Bott
  • Kerwewatz
    Christan Görlich
  • Schmuddels
    unbekannt