Kerwespruch 1962

Jubel, Trubel, Heiterkeit,
endlich es es wirrer so weit,
des ganze Ortsche es of de Boa,
den die Büttelborner Kerb es wirrer do.
Sp grüß ich Euch zum Fest der Feste,
feiert Kerb, des es, es allerbeste,
unn die Musik speelt uns rasch,
"den Büttelberner Kerwemarsch."

Lied: Kerwemarsch

Vergesse es der Ruf aus alter Tage,
siegreich wolle mehr Frankreich schlage.
Em konrad es die Schau geglickt,
wui, wui Mousje, de Gaul der zickt.
Die EWG macht uns veel Meuje,
doch mehr wern do triffer a net sterwe,
de Gus Backus dut fers Weiskraut werwe.
Drum singe mehr jetzt schee und Laut,
" ich esse gerne Sauerkraut"

Lied: Ich esse gerne Sauerkraut

Ich was jo das Eich am meiste intressiert,
woas letztes Johr im Ortsche es passiert.

Kulturell wer des jo e Panne,
wos do owe im Klauer gestanne.
Die Brust raus, die Schut knallrot,
unn wos do alles still gehale hot.
Die feinste Wage seun iwwer unser Feldwä gerauscht,
mer hot den D in de Hundstroß, schunn mimem R vertauscht.
Alle Nummer schilder aus de Bundesrepublik konnt mer lese,
ei, GG war ach debei gewese.
Unn was die Menscher fern Umsatz han,
oan Tempotaschetücher unn Gummiwarn.
Die Industrie werds schunn spärn, seit dem die seun fort,
unn mer hon nicks meh zu schwätze im Ort.
Was wernse ner treiwe wo seunse ner he?
Unn friejer hot mer gesunge, bummsdera die Sahra fingt er Flöh.
Ich hob dorscht unn die Musik speelt,
"Wer kann das bezahlen, wer hat das bestellt."

Lied: Wer kann das bezahlen, wer hat das bestellt

In jeder Gemeindevertretersitzung wird festgestellt,
mer seun e am Gemeunde mehr hoan koa Geld.
Wos die sich nur dobei denke,
wo se jetzt unser Boujemosterei sähe blenke.
Ich bild mer eu,
es weise Haus in Waschingten kennt a net weiser seu.
Unn immer wirrer koann meer hern,
das sich Leit iwwern Fasselstall beschwern.
De Wärter wer gut,
nur der oa Fann det net springe,
unn de Gemeuderot mist die zwa mol of Vordermoann bringe.
Unser Landfrauen die gen jo mit de Zeit,
die bringe wenigstens Geld unner die Leit.
Ausflie mache die, woas kost die welt,
do wert es Fläschje Weu fer 18 Mark bestellt.
Wie soll mer nur das Geld verdiene,
oa Glück das mehr unsern Plan noch hon, den grüne.

+++

Glabbts ewe de Borsch net so mit de Heirote rei,
do muß heit glei e Auto bei.
Do werrn aber donn Kilometer gefresse,
wommer die hert, die warn in oaner Nacht of 3 Kerwe gewese.
Ja woann die in dem Tempo e Mädche suche,
do finne die noch koan Kerwekuche.
Un die Musik speelt jetzt frisch,
"Haben Sie eine Frau für mich."

Lied: Haben Sie eine Frau für mich

Aus Berkof kimmt do neilich soen Vereun,
die wollte mol seje wie dick das in Büttelborn die Ebel seun.
Awwer mehr hon jo a ko Fallobst zu verschenke,
des Ebel euseje wert denne Kerl gedenke.

+++

Handballspiele seun ganz schee,
Schoppe trinke noch veel meh.
Woann offem Hommweg dann in Folge der Promille,
der Köber dir versagt de Wille,
unn du willst es Geld fers Taxi sparn,
do läste dich eufach mirem Gummikann hom fahrn.

+++

Der Porsche geht ab, den hale ko Kette,
do konnt sich neilich ohner groad noch ins Puloch neu rette.
Will halt a gelernt seu die Fahrerei,
o Wunder der Technik, unn es Hoftor war entzwei.
Seit oanich, unn streit Eich doch werklich net meh,
mehr singt doch schunn immer, scheide tut weh.

+++

De nechste Satz es dorschgestreche,
unn ich wern jetzt meun Brand mol lösche,
unn die Musik speelt feer die,
die enn neue Arbeitsplatzsuche wo se ern dorscht kenne pflege.
"Der schönste Platz es immer an der Theke"

Lied: Der schönste Platz es immer an der Theke

Urlaub fahrn de letzte schrei,
unn jeder mecht oam weiteste gewese seu.
Hert mer doch of,
am liebste möchteste schunn of de Mond enoff.
Zum türkische Halbmond dunn se schunn flieje,
hinner - noanner - noch, bisse sich wirrer krieje.

+++

Neilich sieht mer enn Bauer mirem Fahrad ins Feld naus flietze,
der hot seun Taglehner of de Querstang sitze.
Wer jo ganet so schlimmdie Plamag,
dehoam steht es Auto in de Garag.

+++

Das ohner im Rausch seu Hauster einschägt, des konn jo mol seu,
do mußte halt zum Schreuner-Moster, das der wirrer e Glos macht e neu.
Sonntagobens hot sich ohner dorsch e späßje seun Hoamweg verscheenert,
awwer do honem di Ami de Kittel veränert.
Die Moandel wollt er sich a rausnehme lose, er Kinn,
unn debei hot der Borsch iwwerhaupt ko me drinn.

+++

Macht doch so koan vers,
iwwer den Sargelfestkommers.
Allenthalben koann mer hern,
es nechste mol, solls wirrer besser wern.
Unn die Musik speelt uns hier,
"Hinein in das schäumende Bier."

Lied: Hinein in das schäumende Bier

Of de Worfeller Kerb, warn e paar Büttelbörner of de Such noch ner Braut,
awwer do honnse em Mädche die Schuh geklaut.
Unn do hert mehr ewe,
des soll noch e greser Gerichtsacht gewe.

+++

Do hot doch desjor of de Hard,
Ohner seu Spagel mirem Auto gestrat.

+++

De Oaner hot sich noch mol noch seum Mädche umgesäje,
do horer aach schunn in de Speisbitt geleje.

+++

Beim Meschtfahrn gibt's aach dorscht er Leit,
iwwerhabt woann mern schun emol helt so weit.
Awwer mer soll doch net moane, das es sowos gewe derft,
das ohner zwa Rolle Mescht, of oammol umwirft.
Denne ern Rausch war bald verfloe,
bisse die wirrer han ofgezoje.

+++

Bei uns esses a sschunn vorkumme,
das ohner beim angele e Moorbod hot genumme.
Vorjohr honn uns die Panneflicker die Fohn veresse,
woannses des Johr wirrer mache, wernse allminoanner gebesse.

+++

Des wer so die Hauptsach, wos sich hier abgespielt,
ich hpffe jo net das sich ohner betroffe vielt.
Doch fer jeden Fall,
unser Gerichtsstand es Gere des wist er jo All.
Die Flurbereinigung werd jetzt in Angriff genumme,
do werd a noch mansch Oaufregung kumme.
Drum feiert ordentlich Kerb er Leit,
vielleicht heters nächst Johr schunn Zank unn streit.
Tanst mit uns, unn schenkt Eich ohn Eu,
unn jetzt geht's mirem Kerwemarsch in de Soal eneu.

Lied: Kerwemarsch

• Aus der Feder von
  Phillip Göbel
• Kerwevadder
  Wilhelm Klink
• Beivädder
  unbekannt
• Kerwewatz
  unbekannt
• Schmuddels
  unbekannt