Kerwespruch 2013

En haufe Leit wolle heit lache
unn sisch e bissje lusdisch mache.
Weil oabb unn zu dutt sisch doch gäärn
die Menschheit gejesaidisch äärn.
So ess dess on de Kerb halt auch,
en gonz besonners scheene Brauch.

Unn ess mer droi in deere Redd
ess dess nedd bees, sondern sehr nett
es lohnt sisch aa nett desdewäje
mi´m roore Kobb sisch offsereije
weil all, die jetz´ verebbelt werrn,
die honn mer gonz besonders gern.

Drum´s Maul gehaale unn gehorscht,
macht schnell noch woas fer eiern Dorscht
ich fonnge neemlisch oo jetz´ glei
mit moiner gaschdisch Hetzerei.

Doch se-erst wolle mer singe
unn uns e kloa Ständsche bringe
Drum singt jetzt laut und nett so lasch
de Biddelberner Kerwemasch

***

Es war e Fraa, die feiert gäärn,
oanstatt dehoam sisch doot zu äärn
´s Okdowerfest hott se besucht -
unn hott er Honddasch oogeguggt.

„Jaja - do geht schee veel enoi“ -
donn trinkt se asch veel Schnabbs unn Woi.
Enn nedde Kerl erkennt die Laache
unn nimmt eern Schlissel fer de Waache.

Er fährt se hoam, doch korz devor
do kotzt die Fraa wie aus em Rohr
medde in ehr Dasch enoi
des musst en scheene Ooblick soi.

Des Kotzlied waa baal ausgesunnge
die Dasch hatt alles uffgenumme.
Oam neegsde Doag betroacht se ääwe
de Dasch eer legger Innelääwe

„Wieso schitt isch - dess ess nett foi -
Saloat in moi schee Däschje noi?“
doch isch glaab, der schmeckt net guud
die Fraa steht doo unn ziggt e Schnut.

***

Als neegstes folgt die neegst Geschicht
vun der ich Eich goanz korz bericht.
Im Summer, wenn die Sunn dut lache,
tut mer im Gaade gern veel mache.

Will mer en schene Rasen hoo,
macht mer e bissje Dinger droo.
Oaner hott dess net vergesse,
unn oamerweise Dinger druffgeschmesse.

Doch der Moann, der guckt goanz err,
weil des Groas, dess werd goanz derr.
Dem Rasen war des net bekumme
Denn statt Dünger, hat er Uukraut-Gift genumme.

***

Open-Air bei de Feierwehr
do muss aa woss se esse her.
Schmegge soll´s unn veel soll´s soi
en Zentner Gyros wär do foi.

Unn fer des Fleisch do nimmt mer doann,
em Wert soi riesisch Gyros-Poann.
Doch die ess goanz schee babbisch noch
de Wert der seegt „die butz isch doch.“
Wie Villa riva unn Villa bacho
do schrubbter se mit veel Karacho.

Die riesisch Poann, die glänzt nur so,
jetz koann die Feierwehr se ho.
Isch soag denne noch schnell Bescheid
doch lag die Nummer nett bereit.

Do scheissder druff, es waa ihm klaa,
die Nummer die haast oans-oans-zwaa.

Bei nem Fest hoat sich aoner e bissje zugerußt,
unn zwische Boadewoann unn Kloo mim Borrem geschmust.
Do steggder droi, kimmt nett-me hoch
stitzt oab sisch uffem Klo,
debai rutscht dief enoi soi Honnd
er kimmt nett me devoo.

Gonz hinne droi im Oabflussrohr
do dunn soi Finger stegge,
er robbt wie will unn kreischt und autscht
soi Fraa dudd bees erschregge.

Nizzt alles nixx,
do ess nur oans woss jetz noch helfe koann,
die Biddelberner Feierwehr
die ess aach glei kumme doann.

Do geht nix off normalem Wäg
do hilft nur roh Gewalt,
sie schloue off die Schissel druff
des hott goanz schee geknallt.

Baal waa die Hond donn wirrer frei
oam liebste deerer bääre,
de Reddungswoue fährten glei
ins Krongehaus noach Geere.

Schnell unnersucht - veel harrer nett -
es Krongehaus waa froh,
fer eehn ess nett goanz billisch worrn
er brauch en naie Kloo.

Die Feierwehr hatt sisch oabgehetzt
drumm singe meer e Ständsche jetzt

 Lied: Feierwehrlied

Ich seun gestärk, die Kehl is geehlt,
de neegste Klopper wird jetzt verzehlt.
En Biddelberner Wert tut gut im Fudder steh
der musst ins Geerer Krongehaus zu ner „OP“

Sie han ihn schun zurääscht gemoacht -
goanz nischdern mussder soi
unn schiewen groad in de OP -
do fällt‘s de Schwesder oi:

Der Moann der is jo viel zu schwer
Is groß unn braad als wie en Bär
nur 130 Kilo hält de OP-Disch aus
drum schiewe sie ihn wirrer naus.

Sie musste de Wert zum obberiern
bis noach Frongfort jetzt kutschieren
dess machdem nix - des muss halt seu,
un denoch, do saift-er Äbbelwoi.

***

Offem-e Fest do sitze zwaa
die saufe, fresse mit trara,
alles woss enoi ess goange
unn honn se kräätsche oagefoange.

Der oa waa voll wie dausend Moan
dasser ned meh offs Fahrroad koann.
Doch er browierts, hott sisch geschunne
unn waa gonz schnell aa wirrer hunne.

Die oannern Leit, des waa goanz klar
erkannten hier die groß´ Gefaah
soi Road des honnsem nemme gäwwe
er hatts mi´m Saufe iwwertrewwe.

Donn laafter halt unn macht koa Bosse
soin Schlissel harrer laije losse.
Dehoam do konner nett enoi
schleeft uffem Gaadebänksche oi.

***

Enn Bauer der ließ sisch nett lumbe
unn hott aa gäärn oaner getrunge
mit soine Awweider aus Pole
die hatte Schnaps, der waa nett ohne.

Er hat des Bier - ´s waa alles doo
donn fonge se zu saufe oo.
E Bier, en Schnaps, en Schnaps, e Bier
wohee des führt, dess wisse mir.

Nischdern waan see all nett meh´
de Bauer der konnt nemme steh.
Sie wollden bringe in soi Bett
doch leider packe se dess nett.

Im Hof do leit a alt Matratz´
do find der Bauersmonn soin Platz.
Er schleeft goanz friedlich unn waa froh
ess Koppweh des waa aa schunn do.

***

Mit 17 Joohr, ess dess nett foi
hatt oaner schunn soin Fiehrerschoi.
Jetzt wollder fahn mit Vadder´s Sprit
de Vadder seegt „do faah isch mit

Unn soin meer schunn beim Faahn debai
do holle mer Getränge glei.“
De Bub der fährt, moant er deet schwewe
enaus nooch Geere unn zum Rewe.

Schnell waan die Flasche droi im Woue
do heert ma schunn de Vadder soue
„wo ess de Audoschlissel - hopp „
de Bub der kriggt en roore Kopp

sie waan schunn nooh oam Audo droo
do seegt de Bub „do esser jo“
inne droi im Schlissel-Loch
unn de Modor - der laaft immer noch.

De Vadder fand des gaa nett schee
„so schnell fährt der koa Audo meeh“
Moi Audo ess mer veel zu schoad
unn de Bub fährt mit soim Road

Lied: Ja meer soim mim Radl do

E Familije schafft sehr gäärn
oan eehrm scheene Haus
Dreckk unn Schdaab unn Uugeziffer
des haale se net aus.

Ausse ess e Kellertrebb
unn die es asch verdreckt
unne ess en Oabfluss droi
e kloa bissje versteckt.

Ver die dreggisch Kellertrebb fällts em Vadder oi.
werdd de Kärscher beigehollt
do werdd se wirrer foi.
Unn sie Kärschern im Galopp
awwer´ s Wasser laaft nett oabb.

Oan dem Oabfluss werdd gerobbt
der ess goanz bestimmt verschdobbt.
Sie wiehle in der dunkle Brieh
so veel Dreck waa do noch nie.

Immer meeh holle se raus
dess sieht sehr bedrohlisch aus.
Der Oabfluss koan so groß nett soi
do fällts em Vadder pletzlisch oi:

„Guck emool, ei wusst´ isch´s doch:
de Oabfluss ess e Sickerloch“

***

Oamool wurd´ im Ort en Monn
dootgesoat - woss macht mer donn?

Der ess rischdisch ruisch geblewwe
Trauerkaade hoann geschrewwe
schunn die Foinde unn Vawonnde
die´s nett besser wisse konnde.

Jetz hatt der Monn, der noch goanz fit
soi eische Trauerkäärdsche kriggt.
„Herzlich Beileid“ steht do druff
doch reegt dess den Moan nett uff

„Isch lääb jo noch“ - seegder begliggt
unn hoatt die Kaad serigg geschickt

***

Enn Hoandballspeeler dutt sisch fraan,
er muss goanz schnell noach Dammschdadd faahn
unn zwaa glei nochem Hoandballschbeel
es wurdem alles veel zu veel

unn er hott leider unnerdesse
die Schlissel in de Hall vagesse
unn aa soi Fraasche unn die Kinn
vergissder in de Sporthall drinn

Er waa schunn long in Dammschdadd droi
do fälldem soi Familje oi.
Er rast zur Sporthall schnell zurigg,
do soin se jo, ach woss e Gligg.

Goanz offesischtlisch waarer froh,
die drei die guggen gaschdisch oo.

***

In „Malle“ ess bekonntlich schee
e paa Sportler die soin hee.
Wollde Spaß unn Party mache
doch es gab e bees Erwache.

Monsche honns schunn iwwertrewwe
unn honn gaschdisch oogegäwwe,
beispielsweise mit eehrm Geld
spucke off die „arme“ Welt.

So oaner waa, eehr denkt´s eisch glei
bei deene Partyjungs debei
unn weiler mit soim Geld so prahlt
honnsem die Buuwe oigedaalt
und wolldem immer gäwwe doan
wonn er nett mee bezoahle koan.

Doch er wollt ALLES wirrer hoo
gibbt wie-e Dott voll Migge oo.
Oam Stroand do waarer aa gonz flott
unn zeigte jedem wosser hott.

Goanz bestimmt honn des Gescheje
aa die falsche Leit gesäije.
Der reiche Moann hott doan geschickt
goanz schnell ooa off die Trumbeet kriggt.

Oam Herrn harrer en riese Knorrn
weil er ess iwwerfalle worrn.
Soi Flogge die waan aa stibitzt
ess Oogäwwe hott nixx genitzt.

Iwwer´s arm-soi harrer bees gehetzt
des durfter selbst erlääwe jetzt.
Soi Freunde die stehn verren groad
unn honn soi Rechnunge bezoalt.

En oannern hatt donn im Hotel
gepisst oan völlisch falscher Stell.
De Borrem der waa zimmlisch nass
unn glitschisch a , dess waa koan Spaß.

Die Pitsch hatt aa nett gut geroche
droi ausgerutscht, die Noas gebroche.
Sunnst waa der Trip e riesisch „Schau“
und des Meer kornblumenblau.

Lied: Kornblumenblau

Die Modder vunnem Keweborsch
hot uffgeregt sisch dorsch unn dorsch
weil des Audo vunn eehrm Bub
hat nett meh Benzin genug.

Sie durft´s benutze, er hott´s erlaabt
´s wär vollgetonkt, hott sie geglaabt
Doch beim Värrerbäcker dann
do wurd´s ruisch, do steht de Kann.

Unn zwaa medde uff de Gass
die Fraa die kriegt den Mega-Hass.
Sie schiebt de Kann off´s Troddewaa,
zum Glick waa glei en Helfer da.

Donn kriggt eehrn Bub erstmool zu heern,
woss sie onn dere Sach´ dutt steern.
Der waa donn aa bissje geknickt
en Freund hott awwer gonz geschickt

erstmool e Schnäpsje oigeschenkt
do esser glei nett mee gekränkt.
In dem Schnäpsje, Gott sei Doank
ess meeh Sprit, wie in soim Toank.

**

Paa Leidscher unn eehr Picknicksache
die wollde gäärn en Ausfluuch mache
in de Rhoigau ging die Faaht
unn all honn sisch druff gefraat.
Doch die Reife, dess ess shit
speelde bei der Sach nett mit.
Off de Hoamfaaht gabs en Pladde
den zwaa vunn deere Gruppe hadde.

Ma fährt-se hoam unn koans begreife
jetz brauche se en neie Reife.
Die drei oannern, die dunn wadde
bei dem Audo mit dem Pladde.

Die, die hoamgefaahn worrn waan
konnde nemme weirer faahn
weil de Modor macht die Grätsch
- Ätsch !!

Die drei die waade, waade noch
de Fahrer braucht en Reife doch.
Den horrer aa baal oigeloade
vum Audo mit dem Modorschoade.

De Reifewechsel waa vorbei
unn aa die elend Waaderei.
Zu viert do brumme se jetz hoam
nix meeh bassiert - ma glaabt´s jo koam.

De Modoschoade-Pladde-Moan
der nimmt sisch halt e Taxi doann.
Unn endlisch soinse oogekumme
unn hoan e Schnäbbsje oigenumme.

***

Enn Kerweborsch hoat iwwertrewwe
em oannern Borsch soi Händsche gäwwe.
Dess waa en „alde“ Kerweborsch
dem junge wurd soi Hoand gonz morsch.

Die Middelhoand, sie waa gebroche,
die Schmerze hoan gaschdisch gestoche.
E paa Bierscher soin doann schee
do dutt´s die neegsde Stunn nett weh.

***

Ehr liewe Leit jetzt seht misch hier
ich brauch goanz dringend zwaa, drei Bier
Moi Gusch die ess goanz trogge schunn
isch moan, isch schwätz schunn seit paa Stunn.

Jetzt loasst uns feiern, saufe, singe
dess soin des Läwens schönsde Dinge.
Doach oans dess liewe meer so asch
de Biddelberner Kerwemasch

Lied: Kerwemarsch

  • Aus der Feder von
    Uwe Plahuta
  • Kerwevadder
    Jan Schneider
  • Beivädder
    Andreas Dörr, Heiko Fischer
  • Kerwewatz
    Kai Ruhland
  • Schmuddels
    10 Jahre: Thomas Funk