Kerwespruch 1963

Mer feiern dessjohr gonz hauptsächlich,
die Biddelberner Kerb 1963,
noch Quetschekuche richts unn Soss,
bei de Bäcker war de Deiwel los,
unn bei de Metzger wars gonz doll,
do stonde a die Läre voll

Woss renne die Kinn un warum seun die Leit so froh,
alles frat sich, lacht un singt die Kerb iss wirrer do,
unn scheene Biddelberner Mädscher all vornehm frisch geschärt,
stolziern schunn uff de Gasse rum im neije Kerwestod

Unn Kerwegäst wie mer hott vernumme,
solle heit noch mit Sonderzieh kumme,
so ruff ich eich zu er liewe Leit - vereehrte Gäste,
er Biddelberner unn dess drummerumm.

Ich lod eich eu zum frohen Feste,
unn winsch eich herzlichen Willkumm,
doch bevor ich jetzt meu Reed erst schwinge,
losse mer erst emol die Gläser klinge

Zumm Auftakkt speelt die Musik feu,
heit wolle mer lustisch seu

Lied: Heit wolle mer lustisch seu

Mer hatte uns eigentlich vorgenumme,
ess soll niemond me in Kerwespruch kumme,
mer kenne eich jo nix vun onnern Orte bringe,
unn wolle eich a kon Trauermarsch singe,

er wollt jo schliesslich wirrer lache,
unn ko doofe Gesichter mache,
doch jetzt wolle mer emol säje
woss alles ess im Örtsche geschäje

Do hommer onner, er Leit woss a Ding,
der ess awwer a jedes Johr drinn,
er hatt on getrunke - war geistlich verwerrt,
unn hatt uffem Klo die Klaarer ausgescherrt

unn in seum Tremenz Junge Junge,
horrer seu Klaarer nemme gefunne,
wies weira ging mer konns kaum glaawe,
nakisch warer net hom gelaafe.

Und in des Waldes tiefsten Gründen,
in den Sträuchern tief verstekt,
leit oner vumm Ort mit seinen Sünden,
lang im Grase ausgestrekt

Er hatt on gerollt in irgend ner Kneip,
donn tat im so weh seun Bauch unn seun Leib,
uffem Homweg warer bin on Waldsrond kumme,
donn horrer nur noch die Englein hern summe.

Die gonz Nocht harrer dort campiert,
unn gäje Moint esser donn erst horm maschiert.

Jetzt wolle mer ach emol ons trinke denke,
unn unser Schnut ins Weuglos henke,
er Musikonte speelt aus voller Brust - Waldeslust -
oh wie einsam schlägt die Brust

Lied: Waldeslust

Der Wäg noch Griesem war fertig gestellt,
mer durften net fahn - dess hats aus geschellt,
warum diese Reglung dess war idiotie,
mer durft net enaus noch neremol bei die Kieh.

On Biddelberner als Kind schunn en Rakker,
der wollt trotzdem on seun Spaschelacker,
mirrem Auto fuhr er trotz Verbot,
er denkt ess werd klappe - Gott seis gelobt.

Do stokdem de Atem - dort am Horizont,
kimmt Polizei in breiter Front,
uff die Brems rechts ronn nix wie eraus,
unn rebbt oneme Riweacker Schessmelle aus,

denkt eich er Leit die Polizei hett bei dem Rast eugelegt,
der hetts gelernt wie mer Ukraut robbe deth,
wonn dess so kumme wer - er hett den Acker sauwer gemocht,
der Bauer hettsem werklich gedonkt.

+++

De Bauern ern Ausflug er Leit woss e Ding,
fahn de Griesmer Weg enaus weil schneller es ging,
unn wie mer jo wisse, der war doch blockiert,
die Polizei hottse gestoppt - alles war schockiert

Zurück Marsch ihr teure Seelen,
er misst eier Fahrtroute richtig wählen,
alles war bös unn voller Zorn,
zurück er Leit noch Biddelborn.

Uff de Bauern er Wohl wolle mwe erst emol trinke,
drumm muss ich emol meum Kellner winke,
die Musik speelt, das kommt nie wieder,
nach der Heimat ziehts uns wieder.

Lied: Nach der Heimat ziehts uns wieder

Neilich steh ich voller Fraad,
Mittwochs uffem Frekelmaad,
do kaaft oner Frekel so stikker sechs,
pletzlich war de Maad verhext.

Ess essem ons dorch die Lappe gesprunge,
jetzt harrer im Kaste bloss noch 5 Junge,
er erumm wieen geölte Blitz,
unn es dorch Gere hinnermm Frekel hergeflitzt,
ich musst jo weirer - mer werd jo verrickt,
gefonge horrers on de Zockerfabrick.

+++

Die Sparchelzeit leit monchem uffem Mouwe,
do werd ach om meiste gelouwe,
doch woss jetzt kimmt dess es wohr,
do war oner scheinbar nemme gonz klor

Im gresste Gewirrer unn strömende Räje,
honn ich mit eichene Aache gesäje,
wie die Leit seun in e Spargelheisje gesterzt,
no dess ess doch net meglich - dess ess doch en Scherz,
sie kumme schon wirrer raus - mit gurem Gewisse,
ich mach hee, donn ich muss dess jetzt wisse,

Mer derffe net drin bleiwe - dess seun doch Bosse,
mer den unser Holz net bei dem schneire losse,
ich gäbb eich den Roth losst Holz schneire bei dem,
don sitzt er beim Räje im Heisje bequem.

+++

Neilich geh ich dorchs Ort in de Eil,
do war doch äwe en Schrei alleweil,
ich dorch dess Tor unn geh ach ins Haus,
ich betrocht mer dir Fraa ach wie sieht die donn aus

Sie sitzt uffem Stuhl unn kimmt sich wie en Worm,
ich du mer se betrochte - a dess ess jo enorm,
woss denkter er Leit mer glaabt ess kaum,
die hat jo er Meilche gonz voller Schaum

Dess kimmt devo ich du mit der Zunge schnalze,
wie konn mer donn ach die Aier mit Omi salze,
unn wonn ich mer so den krom iwwerdenke,
muss ich mer erst emol de Schaum enunner schwenke.
Unn die Musik speelt trari trara,
Imi ess zum Waschen da.

Lied: Imi ess zum Waschen da

Im Winter wonn Schnee leit esses kalt,
unn koa Heidelbeern wochse im Wald,
do hatt ich im Winter meuns entdeckt,
wie oner en Haufe Schnee ostekkt.

Ich hob en beowacht unn steh hinnerm Tor,
awwer ess schlug keine Flamme zum Himmel empor,
fer mich war dess en heide Spass,
sicher warn die Streichhölzer nass

+++

Unn dass die Biebel uns verkündet,
prüfe wer sich ewig bindet,
dess ess doch jedem klor,
dess werd gesproche Johr fer Johr.

Do hommer so e jung verheiert Pärche im Ort,
woss mit dene ess, dess wollter jetzt wisse,
wo Sie her ess ich konns eich net souwe,
gut dun sich die zwaa jo vertrouwe

Sie schaffe minnonner seun fleissig und gut,
bloss wonnse alsemol hommacht do kriegter Wut,
regt eich net uff er fleissige Leit,
ess brauch halt äwwe alles seu Zeit

Unn er Musikonte steht jetzt stromm,
ich hab so Heimweh nach dem Kurfürstendamm

Lied: Heimweh nach dem Kurfürstendamm

Unn unsere liewe Feierwehr, die ess uff zack,
die seun noch schneller wie e Geschoss vunn de Flack,
ihr Schnelligkeit honse schunn oft bewiesen,
wonns brennt orra beim Sportplatz berieseln,
dess ess en Vaeun die losse sich net lumpe,
beim Auto weche orra de Leit die Keller leerpumpe.

Unn vor noch gar net solonger Zeit,
do hatt de klennste vunn de Feierwehrleit,
en Eusatz gefahn unn do esses passiert,
er hat e Verkehrsschild vollkommen abrasiert.

Der Schoure war awwer garnet so schlimm,
er segt, - dass krieg ich schon wirra hin,
geschweisst horras mirrem w lwise Fluuch,
schliesslich ess dess jo dem seun Beruf

+++

Jetzt er Leit horscht mochemol her,
ess kimmt noch oner vunn de Feierwehr,
a so klo Kerlche unn quiklebendig,
fährt mit em Auto ich mecht souwe freihendig

Dorchs Ried in oner Kajer,
do laaft uff de Stross en Hos vorrem her,
er rieftem zu verschwinde du Oos,
schunn gibbts im Auto en wuchtige Stoss

Wie dess passiert ess konn er selbst nemme souwe,
jedenfalls harrer sich e paar mol iwwerschlouwe,
er hatt awwer Glikk, ess durem net veel weh,
Schuld war nur dess Hoseveeh

Dehorm horrer woss so hern kriegt vunn seumem Vadder,
do horrer sich gewunne wie e Ringelnatter,
unn dass mer beim trinke im Trenning bleiwe,
muss ich mer erst emol meu Kehl eureiwe,
unn die Musik speelt jetzt schee,
auf einer langen, langen Schossee

Lied: Auf einer langen, langen Schossee

Dessjohr wochse die Zwewwel Karotte unn Gummern wirrer gut,
do krieje die Bauern trotz wenig Geld wirrer frische Mut,
sie verkaafe die Zwewwel mit de Schlotte,
bloss wollse in Gere ko Karotte

Vor Johrn honse dess Zeig nochfeste verschrottelt,
unn dessjohr honse schunn lengst die Gasse geknoddelt,
ess wochse die Katoffel unn de Salot,
er Leit ess ess werklich en stod

Iwwerhaupt er Bauern - dess macht mer Spass,
dessjohr hetter richtig ochtgepasst,
nur oner nett - en alte Bekonnte,
fährt uffen Kursus hinaus in die Londe

4 Woche lang horrer dort studiert,
unn dehorm esses donn a passiert,
dass mer om schlepper im Winter ess Wasser ablist,
dess hatt der als klo Kind schunn gewisst

Er hats vergesse - kimmt hom wie noch nie,
unnamm Schlepper nix wie Brieh,
seu Modder hotten geherich traktiert,
regt dich nett off - ess werd repariert

Ich hob emol wirrer genung geschwätzt,
erst werd emol wirrer on ogesetzt,
unn die Musik speelt jetzt keck,
Hinaus in die Ferne mit Butterbrot und Speck

Lied: Hinaus in die Ferne mit Butterbrot und Speck

Unn jetzt noch ons er Leit er Leit,
im letzte Winter hatts gonz schee geschneit,
ess war gardisch kalt war alles gefrorn,
beim Kohle vertaale hann sich e paar in de Hoorn

Ess wollt jeder waam, dess ess verständlich,
wonns donn geschellt hatt Briketts seun erhältlich,
do seunse mit de Karn dorchs Ort geeilt,
unn honn die Verteilerstelle o gepeilt

E paar Menner vumm Ort warn voller Fraad,
die honn vorm Ort uffes Oelauto gewaard,
unn als dess in Sicht kam Junge Junge,
do seunse schnell uffs Trittbrett gesprunge,
mirrem Fahrer verhonnelt - sie losse sich net lumpe,
du mer zuerst de Tonk voll pumpe

Sogar die grosse Politik,
ess in Eis unn Schnee erstikt,
die Schule geschlosse - die Kinner durfte hom renne,
donn die hann selwer nnix me so brenne

wonn sich dess wiederholt dess wer jo toll,
hoffentlich hatter fer de Winter die Keller voll,
Er Musikontedie Bo zusomme gepetzt,
stellt eich vor do vorne leije Briketts

+++

Hoffentlich hotter alles bedappelt,
ich hob jetzt grod genung gepappelt,
unn noch zum Schluss er liewe Leit,
unsere holde Weiblichkeit

Ob Neylonstrimp orra Ringelsocke,
er tut eich heit wirra zu uns hockezu uns hocke,
mer lore eich eu unn dess ess wohr,
feiert mit uns unn dess werd klor

Er werd emol säje die Tornhall dut platze,
wonn mer emol richtig oner vajatze,
mer tonze a Walzer Foxtrott unn Schiewer,
dess ess de ältere Generationen jo liewer,
esse unn trinke ess do in reiche Menge,
macht er Leit tut eich in de Sool eneudrenge,

Ich hern jetzt uff meun Hals tut weh,
unn er kennt jo ach nemme richtig steh,
so ruff ich eich zu unn werd mer nett merb,
ich winsch en gute Verlauf unsrer Kerb.

Unn er Kerweborsch macht mer nett schlapp,
unn die Musik speelt jetzt im Trapp,
wies frieher war so musses immer seu,
de Kerwemarsch zum Sool eneu.

Lied: Kerwemarsch

  • Aus der Feder von
    Phillip Göbel
  • Kerwevadder
    Ernst Best
  • Beivädder
    unbekannt
  • Kerwewatz
    unbekannt
  • Schmuddels
    unbekannt