Kerwespruch 1992

Wie jedes Jahr um diese Zeit,
tut sich´s immer wiederhole.
Hon mer wirrer Kerwezeit,
vum Volkshaus bis zur Krone.

Es ganze Johr werd gespart defür,
damit mer feiern richtig,
geputzt die Fenster und die Türen,
denn unser Kerb es wichtig.

Begrüße möchte ich alle Leit
und heiß euch all willkumme,
zu unserm schöne Kerwefest,
die Alte und die Junge.

Willkomme es uns jedermann,
egal woher er kimmt,
hauptsach das er Esse und Trinke kann
und uns dann nix fer iwwel nimmt.

Fern Anfang langts, jetzt hob ich Dorscht
un bitt nun unser schee Kapell,
was se speele es mer worscht,
awwer e bisje dalli of de Stell.

Lied: Kerwemarsch

Nun hob ich mol moi Kehl geelt,
was jetzt kimmt werd er wisse.
Jetzt werd was iwwer die Leid verzehlt,
so manches Ding, des wurd gerisse.

Sache gibt's in voller Wucht,
die misse halt bassiern,
sunst gebs jo aach kon Kerwespurch
unn mer deen die Kerb verliern.

Mer kann sich richte wie mer will,
emol zu wenich, emol zu viel,
Vorsjohr on Kerb do war des de Fall
um 11 Uhr war in de Tornhall de Orangesaft all.
Do seun se wie verrickterumgeflitzt
unn hon de Wodka mit Limo gespritzt.

De Kronewirt hot die Biddelberner net gekennt
un hod beim eukafe sicher gepennt.
Beim Frühschoppe wars dann richtich passiert
unn hod sich bis offs Blut blamiert.

Um 11 Uhr owends sagt er ganz kleinlich,
es gibt nix mee, es ess mer peinlich.
Koa Esse mee unn es Bier war all,
e Sauerei of jeden Fall.

Net nur beim Eukaf kann mer sich irre,
auch die Termine könne verwirre.
An Nochkerb war en Saal voll Leit,
alles war lustig unn hod sich gefreut.

Die Gäste wollte danze, schunkele und so,
blos die Musik war net do.
Was honn die sich bloß gedenkt,
hatte die Musik acht Doag sperer bestellt.

Noch so e Ding ganz genau vor em Johr,
es ess net geloge des ess wohr,
honn se beim Kerwevadder so e Ding gemacht,
die ganze Eier gefresse, die zum Verkauf gedacht.
Beim negsde Marktdoag gabs e Geschrei,
sie honn alles nur koa Eier debei.

Jetzt muß ich was trinke, seid all mit mer froh
unn hebt eier Gläser, stoßt mit mir o.
Es ess alles vergesse, des mit de Eier unn de Pann,
jetzt singe mer des Lied vum Eiermann.

Lied: Eiermann

Unn schon gehts weiter mit dene Bosse,
hod oaner seu Erbse dresche losse.
Fährt dorschs Ort mit vollem Stoff,
uff oamol geht die Rückwand off.
Do wars bassiert, er hods net glei geseje,
die halb Roll hod off de Stroß geleje.

Hört mer mojens de Wecker net,
leid 5 Minute zu long im Bett,
eraus unn schnell erumgerennt,
Mensch ich hob jo glatt verpennt.

E Hand voll Wasser unn gewesche,
wo seu meu zeh hod se gekresche.
Es Gebiss geschnabbt unn eneugesteckt,
vorne geschlabbert unn hinne gedrickt.

Des kann net seu, des ess en Flopp,
daß sich's iwwer Nocht verzoge hod.
Ehrn Mann hods geseje und biegt sich vor lache,
ei du host ja ach es falsche in deum Rache.
En Rot vun mir, ich dunns ehrlich moane,
dut nie eier Gebisse zusamme boare.

Irre kann sich jeder aach in de Zeit,
e Klass wollt en Ausflug mache, an de Rheu, net so weit.
Der Mann hod sich geeilt unn war ganz fleisisch,
er war vum Jahrgang zwounndreisisch.

Als Erster am Treffpunkt ogekomme,
ess gar koaner do, denkt er beklomme,
zwaa Stunn gewart, do kimmt de Peter,
Ei Helmut mer fahrn doch acht Doag später.

Jetzt muß ich doch de Musik mol Winke,
unn e Glas mit eich mol trinke.
Gespeeld werd jetzt, ganz schnell und fein,
e Lied zum Schunkle - einmal am Rhein.

Lied: Einmal am Rhein

Noch so e Ding, des ess bassiert,
De Kerwewatz hat sich blamiert.
Vum Polterabend stinkbesoffe,
wollt er heimfahrn mit seum Rad.
Die Müdigkeit hat ihn getroffe,
gestürzt vum Fahrrad des war schad.

In e Loch gefalle, heinein ganz tief,
net loang gedauert un er schlief.
Seu Mutter sucht ihn überall,
der hod doch Arbeit, hod der en Knall?
Mittags endlich wars soweit,
er tritt die Heimfahrt o, es war auch Zeit.

Helfe dut mer wo mer kann,
unn wanns e Roll voll Dreck ess, zum entsoje zu fahrn,
drum rod ich eich dut net iwwerlade,
sunst derft ehr wie der noch en Knolle bezahle.

Net nur e Strof, so´ne richtige harte,
noa er krigt aach noch an zwaa Reife platte,
aach umlade mußt er ehr liewe Leit,
des hod mer fer seu Gutmütigkeit.

Büttelborn ess schon lang bekannt,
weit und breit im Hesseland.
Jetzt stehts awwer endlich fest,
sie kenne uns in Ost und West.

Letzt durchs Fernseh tats erklinge,
e Büttelborner Mädche, mit ner schönen Stimme.
Es werd noch schenner, do mecht ich Wette,
sie kann sich vor Fanpost garnet meh rette.

Jugoslave honn mer veel im Ort,
nur wanns Zeit ess, do misse se fort.
Fährt oaner zwaa noch Frankfurt an de Zug,
trägt aach noch die Koffer neu im Flug,
wie er will aus dem Abteil enaus,
die Deer war zu unn alles war aus.
Ab ging de Zug nach Mannheim hin,
gleich wirrer zurück des war net schlimm.

Wann de Geld host wie en Graf,
Geburtstag feierst net so brav,
lesst en Bus noch Bayern fahrn,
er segt: ich brauch jo net zu sparn.
Hod an de Hose aach schun Franze,
unn lesst dann noch die Boppe donze,
nackte Weiber als Dessert,
ehr leit wo kumme mer dann her.

Striptease ist ja groß in Mode,
aach bei de Männer dene Schode.
Verzeihe konnt mers, bei dere Hitze,
denn mit Klamotte tat mer schwitze.

Zwei Burschen probierten diesen Test,
auf der Heimwärtsfahrt vum Apfelfest.
Klamotte aus, ins Wasser nin,
des war jo weiters net so schlimm.
Dann nackt ins Auto ohne Klarer,
noch Büttelborn die stolze Fahrer.

Zum gute Schluss net zu vergesse,
um naggisch aach noch was zu Esse,
ginge se in die Eisdiel rin,
bei besoffene es des net so schlimm.

Geilschersleit wos e Freid,
kumme meistens net so weit.
Fährt mim Hänger fort zum reite,
off e Turnier in jene Zeite.
Unnerwegs do werrn die Hose verresse,
de Hängermit de Esel umgeschmesse.
Geplatzt wär en Reife, des segt er noch heit
zu schnell gefahrn, dess moane die Leit.
Unn trotzdem geht es Läwe weiter,
die Musik speelt jetzt hoppe Reiter.

Lied: Hoppe Hoppe Reiter

Jetzt hob ich noch e Thema des basst mer net so,
awwer an die Politik do muß ich halt dro.
Do ess was los in dere Zeit,
dess ess allerhand ehr liewe Leit.

Selbst hier im Ort, dut mer de Iwwerblick verliern,
en Haufe Sorte Müll muß mer sortiern,
Biotonne, gelbe Seck,
unn e Tonn fer de Rest vum Dreck.

Holzzerkleinerer, Kompost im Gade,
geweschene Beutel, ohne Marmelade,
beim Grobmüll losse se die Hälft noch leije,
do muß mer do enaus, do esses deier.

Off de Deponie do honn se Preise,
des muß mer laut sage, nur net leise.
Fer e Rollche Hohlblock beziehlt mer 300 Mark,
dess es doch werklich e bissje stark.

Awwer annerswo esses noch veel schlimmer,
wann ich an den Krieg denk unn die Kinner,
denn die Jugoslawe, die seun doch verrickt,
zerstörn ehr läwe unn ehr Glick.

Dann fange die Türke mit de Kurde o,
de Hussein gibt aach koa Ruh.
De Dollar ess im Keller scho,
die rechtsradikale stecke Häuser o.

Em Waigel dut es Geld net lange,
wanns so weiter geht misse mer um die Kerb noch bange.
Drum losse mer uns noch net verdriesse,
dunn unser Fest wanns geht genieße.

Ich lad eich eu, feiert mit uns,
schenkt uns wirrer eure gunst.
Gerüsst sin mer mit Esse unn Trinke,
drum will ich eich mit Hoffnung winke.

Kommt in die Hall unn seid net besorgt,
fer Üwwerraschunge es gesorgt.
Mein letztes Wort gilt der Kapell,
de Kerwemarsch awwer schnell.

Lied: Kerwemarsch

  • Aus der Feder von
    Phillip Göbel
  • Kerwevadder
    Jörg Raiß
  • Beivädder
    Frank Hirsch, Jens Massing
  • Kerwewatz
    Armin Kraft
  • Schmuddels
    Achim Müller, Bernd Schütz