Kerwespruch 1964

Jubel, Trubel, Heiterkeit,
endlich is es wirer so weit,
alt un jung es heit so froh,
denn die Biddelberner Kerb es wirer do.

Die Kerweborsch kunntes garnet abwate,
bis mer do wirer ausgegrawe hatte
un ach die Mädcher voller Freud,
iwers neie Kerweklad,
han wirer of die Kerb gewad.

Un die Modder unverdrosse,
hot ehrn Hausputz abgeschlosse.
De Vadder steckt sich e dick Zigaa o,
daß mer sieht die Kerb es do.

Alle Auswärtige Verwandte kumme uns besuche,
wäjem billiche Kerwekuche,
drum seid herzlich willkumme liewe Gäste,
heit zu unserem Kirchweihfeste.

Un daß ich net die Curasch verliere,
will ich mol schnell unsern Kerweweu probiere.
Die Kerweborsch stimme mir de Musik o:
"Die Biddelberner Kerb es do".

Lied: Kerwemarsch

E gans Joahr hon mer uns wirer um die Ohrn geschlaan,
un manches hot sich zugetraan.
Der Schnellwäg macht de Bauern Verdruß,
weil mer jetzt so vel Umwäg fahrn muß,
doch als Ausgleich hon mer wieder,
Hochkonjunktur fer die Zimmervermieter.

Wer hat dich du schöner Wald,
im Bräuschter Tennohe hot die Axt geknallt,
Maggenroth du leuchtest mir zum frühen Tod,
wie der Dichter hot gesunge,
so hots im Geäst geklunge,
un die meiste hon garnix gemerkt devo,
of amol war kon Ferschter un koo Bräuschter Tennche me do.

Unsere Gemeindeväter, diese Brave,
hon sich neilich spezialisiert im Sand verkaafe,
deßhalb mußt der Wald droo glawe.

Mit dem Geld dhun se jo äwe tüchtig die Strooße renowiern,
un die Hausbesitzer brumme iwer die Anliegerbegührn.
Aach fer die Alte werd wos gedo, dover gibt's Beweise,
ich erinner nur on die Rentnerschneise.

Weil die Bullehaltung nix hot eugebrocht,
drum kriejes die Kieh nur noch kinstlich gemacht.
Froh war mer, daß mer wenigstens on gefunne,
der des Wätzje hot genumme.

Ich muß wos dhu fer meu trocke Kehl,
die Musik speelt uns schnell,
un die Kerweborschsinges im Chor:
"De Watz leit hinnerm Tor"

Lied: De Watz leit hinnerm Door

Im Freibad drowe hot Hochbetrieb geherrscht,
wos hon se dort als so dicht geperscht,
of englisch segt mer Camping driwer,
meu Bett wärm er awer do doch noch liewer.

Zum Beräjene of jeden Fall, war des Loch a Idejal,
wos hatte die Bauern do fern Druck of erne Pumpe drowe,
un kooner hot dort Brunnegäld gehowe.
Ja do driwer seun mer uns doch klar,
es war e furchtbar trocke Johr.

Doch Gott wollt uns domit jo net strofe,
die Biddelberner Bauern hatte nur e bisje long geschloofe.
In de gonz Umgebung seun die Beräjenungen gelaafe,
nur bei uns wollt mer sich absolut so wos net kaafe.

Ich hob schun wirer en Dorscht wie noch nie,
un die Musik speelt den Werbeschlager fun de Beräjenungsindustrie:
"Regentropfen, die an dein Ferster klopfen".

Lied: Regentropfen, die an dein Ferster klopfen

Allen wohl und niemand weh,
däs gilt net nur fern M.C.C.,
däs soll unsern Leitspruch seu,
drum hon mer Däsjohr net alles im Kerwespruch dreu,
Leit die iwer den Bledsinn leicht gerore in Zorn,
seun diesmol net berücksichtigt worn.
So behandelln wir hier of die Schnelle,
garantiert nur Leichte Fälle.

Awer däß war noch in koom Kerwespruch dreu,
am vorige Kerwemontag schafft ooner seun gonze Friehschoppe
als Postwurfsendung in de Briefkaste neu.
En Onnern hat sich beim Rieweabloore in de Zuckerich e bisje longsam besunne
Im Handumdrehe hot er sich unne im Riewebaad gefunne,
Wörtlich genumme,
hot der sich werklich freigeschwumme.

Horch wos kimmt vun driwe reu,
werd doch koon Metzjerborsch gewäse seu,
immer macht der de starke Monn bei de Nocht
un Meujens warer of em Meschthaufe ofgewacht.

Fer die Technik seun unser Bauern jo sehr ofgeschlosse,
do hot sich doch tatsächlich Aaner vun ner Planierraup e Schanz mache losse,
fer en Dippe voll Dickmilch.
Der Hannel war perfekt,
nur hot dem Bauer die Ärwet net so gut, wie dem Fahrer die Dickmilch, geschmeckt.
Un er hot sich lang Gedanke gemoocht,
bis er den Dreck wirer hot on Ort und Stell gebraacht.
Do sieht mer mol wirer, däß de Monn immer de kerzere ziggt,
do mußt ooner of seun Autoradio verzichte,
domit die Fraa en Waamwasserspeicher kriggt.

Ein Prachtkerl durch Schappi, gilt net nur fern Hund,
däß hot neilich ooner vorgefiehrt im "Kiehle Grund".
So en Polterowend wird oft deier,
wollte neilich so e paar besoffene Feier,
ner verheierte Fraa e Ständche bringe,
un ooner wollt absolut dorschs Fenster springe,
doch der ehrn Alte hot kon Sinn fer die Posse
der hot die Zinke fun seune Meschtgawwel säje losse.

De Oone duht wie en Schneekenich sich fraan,
däß er es Feierwehrauto mol durft farhn,
un in seune Raasch
leßt er die Spritz steh mit somt de Bagaasch.

Die Flüchtlinge seun a wirer all do,
do driwer es mer am Unnerrenn, am Owerrenn un sogar mette im Örtche froh,
drum speelt die Musik däß scheenee Lied:
"Büttelborn im Ried"

Lied: Büttelborn im Ried

Nur ooner hot scheunbar die Platt geputzt,
un eß gonz Örtche war verdutzt,
verkracht, geschiede, die Lieb erneiert,
un klei drof schun wirer verheiert.

Däß Tempo war werklich emorm,
mol säje wie longs dauert bis zum nechste Storm.
So e Fensterklopperei geht a net immer goonz glatt,
do hot neilich meujens ooner gonz schee geschwollene Aage gehobt.

De Bauer steht beim Weiher,
un denkt so for sich hin,
die Maschin kimmt jo recht deier,
un do leit de Vertreter a schun im Kuhdreck drinn.

Es eß a schun passiert,
daß e Landfraa mit de Stallschuh in de Tornhall marschiert
doch als bald soe däß entdeckt,
eß se awwer hoom un hot er Fieß in e paar onnern gesteckt.

Während ooner vum Skatspiel gonz berauscht,
hot mer ihm die Fleischworscht mit em Backstoo vertauscht,
dem honse oon eugewickelt, konn mer do sawe,
un der Dappes hot den ach noch hoomgetrawe.

Fer Fälle, wo uns die Beweise fehle,
werd die Musik noch schnell: "Du kannst nicht treu sein" speele.

Lied: Du kannst nicht treu sein

Des süße Leben sollt ooner erlewe,
drum geht der in die Zuckerich schaffe äwe,
doch neilich war er emol gonz schee in Zorn,
do hot der nemlich of em Homweg en Sack voll Zucker verlorn.

Im Winter waarn die Bauern mit de Metzjer of de Jaagd,
in Biddelborn wern nemlich vum ganz Hessenländche die billiste
Bulle geschlocht.
Ja, soje die Metzjer, die hiesiche Bulle warn a net so Klasse,
die redde jo immer nur fer ehr Kasse.

Zwaa Onnern ehrn Sinn vum Bierche e bisje getrübt,
hon in de Wertschaft es Bochse geübt,
Hacke hon die geschosse wie gestoche,
un de Sieger hot de Aam gebroche.
De Onner es jo öfters net mobil,
wann ooner schun in de Wertschaft e Lokomotiv sucht, die er heize will.

Urlaub fahrn der große Schlager,
Portmanne werd do recht mager, des hot ooner bei Zeit erkannt,
der gerreist ins Bayernland, Preise höher wie die Baje,
deshalb hot mern de nechste Taag schun wirer dehoom gesäje,
däß war hortig Dunnerkeil,
alles jubelt Weidmannsheil.

Däß wär jetzt de Schluß,
eß Ende vun meum Pegasus,
un die Moral von der Geschicht,
Mensch ärger dich nicht.
Wem de Schuh paßt, der zieh en sich o,
heit lacht mer mol driwer un meuje denkt kooner meh dro.

So laad ich eich alle recht herlisch eu,
in de Tornhall beim Kerwetanz unser Gast zu seu.
Un die Musik speelt uns jetzt vor de Kerwemarsch in de Saal eneu.

Lied: Kerwemarsch

  • Aus der Feder von
    Phillip Göbel
  • Kerwevadder
    Georg Barthel
  • Beivädder
    unbekannt
  • Kerwewatz
    unbekannt
  • Schmuddels
    unbekannt