Kerwespruch 1955

Willkomme ihr Gäste von fern und noh,
die Biddelborner Kerb es wirrer do.
Er Kerweborsch heit kenne mer genieße,
don ich kon jo meh wie 100 schene Mädcher begrüße.
Fer mich es des en klare Fall,
däßjohr es wirrer wos loß in de Tornhall.
Do werd gehibbt, gedonzt, geschunkelt,
un eifrig mit de Mädcher gemunkelt.
So muß es seu des es klor,
don es eß bloß amol Kerb im Johr.
Jetzt loß ich mer emol e Dreppche die Kehl enunner fließe,
deonn de Ofang wolle mer glei richtig genieße.
Un die Musik speelt jetzt mit Hallo,
Die Biddelborner Kerb es do.

Lied: Kerwemarsch

Feste hatte mer schun 2 Däßjohr,
awer die kenne all net dro dippe an unserm Kerwehumor.
Die vele Fremme seun de Beweiß,
daß mer o vun de schönste Kerwe feiern im Kreis.
Betrocht eich die Gesichter von meim Kerweborschverein,
wie die heit wirrer in Stimmung seun.
Grod wie die Junge so schlag ich vor,
so solle ach die Alte mitmache dasjohr.
In unserne Stimmung seid er all glei dreu,
versuche mer emol unsern Kerweweu.
Der es erwählt vom beste Faß,
drum schenk mer emol wirrer eu vum dem Edle Naß.
Un die Musik speelt jetzt laut und fein,
trinkst du mal Wein vom Rhein.

Lied: Wein vom Rhein

Am Anfang vum meine Glosse,
wern ich mein Blick emol in die Polidick schweife losse.
Vun jedem Staat die Großedes es so meu Jde,
den besser mo of Urlaub geh.
Don die Borsch gewe bloß oh,
awer diejenige wos ausfiern misse, die seun üwel dro.
Jeder bild sich eu er sei der rechte,
awer ehrlich gesot es seun al ko echte.
Die alte Kaiseer un Könige des kennt er glawe,
wan gäje dene die reinste Wunderknabe.
Friede es iwer all - bloß kan rechte,
schun deht mer net meh so vel hern vun de Siegermächte.
Ich mecht soche die ganz Welt rauft un ringt,
in de Zeitung ließt mer daß es in Nordafrika noch Pulver stinkt.
Jedoch ver uns eses best mer losse des seu,
un trinke noch e Gläßje Woi.
Er Musikante speelt jetzt laut und fein,
schütt deine Sorgen in ein Gläßjen Wein.

Lied: Schütt deine Sorgen in ein Gläßjen Wein

Es Läwe es deier,
des merkt mer es erst an de Steier.
Sorte gibt's es es en Wahn,
wie mer nur so veel erfinne konn.
Awer groud wie mit allem so es es a do,
wann die nigs neues erfinne soin´se üwel dro.
Wie mer hert wern en dal fer die Kutte,
ver unserne zukünftige Rekrute.
Un des alles es net so ohne,
wann mer die emol hon do brauche se a Panzer un Kanone.
Jedoch des es noch net so weit,
un schließlich feiern mer Kerb heit.
So vergist mer alles wos seue bringt,
un wan mer noch e Gläsche dringt.
Er Musiker speelt jetzt fein,
Laß die Sorgen, Sorgen sein.

Lied: Laß die Sorgen, Sorgen sein

Politik un Steier wern ich jetzt verlässe,
don so allmählich muß ich mich mit meine Ortssünder befasse.
In frühere Johrn war´s schun so,
am Anfang kumme die Weibsleit dro.
Do is so e Herd die hon ich notiert,
die hon nehmlich nachst oner offgeführt.
Die hon do Ohns gefoppt,
un hon dem on de Loure geglobt.
Die Fraa kam in Wut im Nu,
bedingt durch die Sterung der nächtliche Ruh.
Sie reißt es Fenster uff macht er riesig Geschrei,
un meldt den Fall de Polizei.
Die ame Mädcher voller Forscht,
musste Strof bezohle wäje so em Honsworscht.
Offem Straußkaffe wollt e jung Fraa es Hoflicht odrehe,
un sie hta sich jo in de Schalter versehe.
Anstatt des Hoflicht bringt se die Pulpump in Schwung,
und hat sich von Kop bis Fuß besudelt mit flüssigem Dung.
Mit em Mercedes zu fahrn es bestimmt e vergnieche,
doch an rer Kurf muß mer rechtzeitig einbiege.
Die Liebe auf Rädern des is ganz klar,
die bringt fer Auto un Fahrer gefahr.
Daß so was net meh so oft basiert,
werd die Erfindung vun em Biddelborner eugefiert.
Bestimmt was ich nix fun der Gesicht,
awer jedenfals hannelt sichs um e grünlich Licht.
E Biddelborner Mädche er werd Lache,
die macht werklich die dollste Sache.
Die hot sich net scheniert,
un hot üwer er seitherige Liebhaber Buch geführt.
Kamerad schenk ein,
es muß einmal getrunken sein.
Un die Musik speelt off dere ern Wahn,
ja ja die Liebe war schuld daran.

Lied: Die Liebe war Schuld daran

Wonn mer Heiern will des es klar,
braucht mer als 1. e Fraa.
Jedoch empfindlich ist,
wenn man beim traue es Pukett vergißt.
4. Mehdrescher hon mer hier,
un ehr Besitzer mache ofe e Nachtpartie.
Do werd gefeiert bis tief in die Nocht,
un schließlich mit em Auto noch en Ausflug gemocht.
Zu 2. of em Quickly - des geht net gut,
weil mer sich do leicht was beschädige dut.
Wos werd dem Mädche seu Modder denke,
wann se im Schrok deß verreßene Klad sieht henke.
Ich muß meu Kehl e mol wirrer ele,
un die Musik dut en schene Walzer speele.

In Worfele hots emol gebrennt,
do es en eifrige Feierwehrmann mit em Motorrad e niwer gerennt.
In de Kla Gerer Kurv er was net wie,
uf amol sitzt er im Kornacker of de Knie.
Un seun Beifahrer de Klaus,
der lacht en owedrein noch aus.
In Weiterscht war emol was los,
do hat en Biddelbörner e Maul so groß.
Er hot sich gewaltig offgefiert,
un 1, 2. Gerer o runner geschmiert.
Doch die wan ach net faul,
un hon em es Fell verdrosche mit seum große Maul.
Off de Kiwat hot oner gezackert,
ich will net wirrer iwwern scherze,
awer vum Kraftheber de Hewel hat em o geflabscht,
Ich glab er hot heit noch Schmerze.
vorsjohr war e große Schmach,
ver uns der vielumstrittene Weißkrautbeitrag.
E Pund Weißkraut ver 3 pf un es Sauerkraut fer 30 de es e bißje grell,
wo bleibt nur do unser Preisüberwachungsstill.
Motorad fahrn macht werklich Spaß,
bloß net glei mit zuviel Gaß.
Do debei es es basiert,
daß oner sein Soziusfahrer verliert.
Im griene Weg waas neilich schee,
do derf nehmlich Onner net in die Wertschaft geh.
Er es noch net long verheiert des es egal,
jedenfals ver den es die Eh e qual.
Der werd sich vorkumme wie uner Gespenster,
don vergäwens wollt er net dorch e zuen Fenster.
Ich mach ganz korz emol wirrer Rast,
un die Musik speelt wenn du noch eine Schwiegermutter hast.

Lied: Wenn du noch eine Schwiegermutter hast

Es werrer im letzte Johr war ziemlich naß,
deshalb macht die Kartoffelern manchem kann Spaß.
8 zt hot er gesetzt des es ko Schand,
un 1 geernt des es allerhand.
Unsern alte Sportplatz es jetzt primain Stand,
un ver den neue den se baue brauche se noch zoemlich veel Sand.
De Berkoffer Weg den konn bal kaner me fahrn,
am Weitschter Weg es der Sand verschwunne ich gab daß deß die Heinzelmänncher warn.
De Grineweg un de Gässelweg dess seun jetzt 2 Stroße,
awer es seun re noch im Ort die noch vel zu wünsche übrig losse.
Die Feierwehr es hochbeglikt,
dann die hot däsjohr e nei Gerätehaus griggt.
Es Schulhaus es offgestockt des eß e Bracht,
an all dem kann mer sehe daß Biddelborn riese Fortschritte macht.
Bevor ich schließe loss ich mer noch meu Gläsje voll gieße,
Un die Musik speelt des Lied des feine,
Büttelborn du kleine…..

Lied: Büttelborn du kleine...

Hoffentlich honn ich kon betriebt,
des es net der Sinn der Sache,
ganz es gäe dal defo er sollt emol driwwer Lache.
Vun unserem Werrt will ich eich veporre,
er hot sich gesorgt vum Cola bis zum Brore.
Un den Wein deß es en Stoff fer Jedermann,
an dem eß bestimmt alles dran.
Drum hoch die Flasche hoch de Woi,
un mit em Kerwemarsch die Tornhall e neu.

Lied: Kerwemarsch

• Aus der Feder von
  George Hirsch
• Kerwevadder
  Peter Hirsch
• Beivädder
  unbekannt
• Kerwewatz
  unbekannt
• Schmuddels
  unbekannt