Kerwespruch 1994

Ehr liewe Leit, ich bitt´ um Ruh´,
losst mich eich mol wos verzehle,
seid schee Still un horscht gut zu,
donn muß ich mich net so quele

Es ess wos los, seit Woche schun
bei uns in Viddelborn
in jedem Haus un runderum
ess gekehrt, gebutzt, gewienert worn

Es Örtche strahlt in voller Pracht,
mit Birke foi geschmickt
wenn de Bojemoaster doann soi Runde macht
werd zufriede nur genickt

Die Männer geh´n jetzt öfter fort
jed´ frei Minut werd hart trainiert
daß die Geuel, die verdorrt
ehr Kondition aach net verliert

Die Fraue in de Wechseljohrn
die wern goanz hibbelisch
die renne in de Gejend rum
wie bei´me Wespestich

Des sin die Zeiche unverkannt
ess Fest der Feste es goanz noh
ess raubt de Leit fast de Verstoand
die Biddelberner Kerb es wirrer do

Drum grieß ich Eich, ehr liewe Leit
hier, wo de Kerwespruch werd verlese
ich grüß Eich all von weit und breit
ob Eskimos, Worfeller orrer Chinese

Seid all willkomme hier im Ort
un feiert mit es Kerwefest
ich bin debei, ich geb moi Wort
wenn mich moi Kerwemodder läßt

Jetzt reicht mer mol es Gloas mit Kerwewoi
un dut kräftisch mit mer singe
die Musik bläst die Rohr´n jetzt Freitag
un läßt de Kerwemarsch erklinge.

Lied: Kerwemarsch

Mim Kerwespruch geht´s jetzt erst mol rund,
denn der es diesjor goanz kunterbunt
ob Kriminelle, Dabbesse orrer Vereine
e paar wern nochher in de Eck steh´ un greune

Aach die, die jetzt noch hämisch lache
sollte sich ersthaft Gedanke mache
un des letzte Johr mol Revue passiern losse
vielleicht hot mer jo a de Vojel abgeschosse.

Wer jetzt goanz nervees zu soim Biergloas greift
un unschuldisch in de Luft errum pfeift
Wer mit hochrotem Kopp goanz noch hinne geht
der konn sicher soi, daß er aach droi steht

Oaner kimmt frisch aus em Urlaub hoam
total erholt - es war en Droum
glei in die Stubb un die Fieß hochgelegt
noch em Urlaub net glei so hastisch bewegt

Un weil mer seit Woche koan Ferseh geseje
durrer glei mol oam Programmknebbsche dreje
er guckt schun goanz komisch, weil sich do nix dut
doann kreischt er dorum "die Kist is kabutt"

Die Fraa goanz ratlos im Deer-Rohme steht
"Ei, woas mache mer doann, woann de Fernseh net geht?"
"Sebst ist der Mann", segt doann der Seckel,
"Die Axt im Haus ersetzt de Jäkel"

Es Werkzeig ess in de Stub rumgefloue
Drei Schrauweziern warn schun verboue
do hot´s halt geleje - des Fernsehgerät
in soi Bestandteile harrer´s zerlegt

"Ich kriggs nemmee soamme" ruft er in de Not
"De Noachbar muß bei - ich frejen um Rot"
Als er die Geschicht doann verzehle dut,
schmeißt de Noachbar sich he un lacht sich kaputt

"Moin liewer Freund, ei bist du Meschugge,
seit zwaa Doach koann hier koan Mensch Fernseh gugge
Irgendwo hot en Bagger es Kabel gefetzt"
Ich glaab, do hot der sich erst mol gesetzt

Wer de Schoade hot, brauch fern Spott net zu soje
drum denk net oan gerstern, denk liewer on moje
genauso wie der junge Kerl hier im Ort
der im letzte Johr geheiert hot.

De Polterowend wurd groß geploant
mit veel "Trara" hot er gemoant
"Do mache mer e Festche, wie´s noch koaner geseje"
Es Wetteramt meld, es geb aach koan Reje

"Doch wie stell ich moi Disch, daß es aussieht aach schee
wie weit fliegt de Dreck un wo fliegt er hee"
Do driwwer hot er sich Gedoanke gemocht
"Ich probiers oafach aus" hot er sich doann gesoat

Stellt sich in Hof mim Stapel voll Teller
schmeißt se doann off, immer schneller un schneller
mit Maurerdiel wurd doann de Platz oabgestellt,
genauso hot er sich´s vorgestellt

Wär do en Fremme vorbeigekumme
der hätt den net fer voll genumme
der hätt gesoat mit betender Hand
"ehr Leit, wo bin ich hier geland"

Woann mer sunst koa Soje hot
do koann merm Doanke em liewe Gott
des denkt sich so moancher Bauherr jetzt aa
nochdem woas diesjohr geschehe war

Die Scheier wurd halb oabgerobbt
un off de Ställ groad offgestockt
ogefoange wurd ach gonz schnell
un glei e morz Gerüst gestellt

Do es geschafft worn wie verrickt
Stoa gewucht un hochgedrickt
Nur ess Gerüst net festgemoacht
des hannse off nächst Woch´ verdoacht

Es dut en Schloach en laute Knall
Die Volksbank moant es wär en Üwwerfall
In de Stoga wackele die Schränk
un driwwe de Sattler kriegt die Kränk

Do hot´s geleje off de Gass
ess groß Gerüst - des war koann Spaß
und die Musik speelt jetzt fer die Schlaue
. . . schaffe, schaffe Häusle baue

Lied: schaffe, schaffe Häusle baue

Lotto speele - des es in
Millione Mark als Hauptgewinn
Doch mancher Gauner denkt sich do
oan Bargeld kum ich schneller dro

Üwwerfällt die Sparkass hier im Ort
klaut paar tausend Mark, unn schwupp war er fort
un weil des so glatt ging, hot der sich gesoat
werd des in paar Woche groand nochmol gemoacht

Doch des war genau oamol zu veel
er werd geschnappt, aus war des Speel
En oannern der wurd aach erwicht
beim Opel war des - in de Schicht.

Er war zu spät un in de Not
stellt er soin Kann ins Parkverbot
De Pförtner kimmt, krischt "des gibt Zoff"
un schreibt die Autonummer off

Wie die Nummer doann beim Werkschutz landt
war des Auto wohlbekannt
weil des en Kann vum Opel ess
der seit zwaa Johr wird vermißt

De Werkschutz hot sich schwer blamiert
so was war noch net bassiert
Zum Verhör musst er doann zur Polizei
un beim Opel ess jetzt en Awweitsplatz frei

Doch gibt´s hier im Ort noch goanz oanner Kanone
die zwar freidlich un brav in erm Heisje wohne
dochtief im Innern net wie unseroans
do soin se Rambo unn Indiana Jones

Wie der oane Moann schun e bißje älter
der streift als drauße dorch die Wälder
goanz harmlos geht der dort spaziern
doch eines tages dut´s passiern

E Auto kreuzt soin Weg im Wald
de Blick werd starr un doann eiskalt
er denkt, eich Berschjer erschreck ich mol
unn helt aus de Dasch soi groß Pistol

Genau gezielt un unverdrosse
hot er hinnerm Auto in de Wald geschosse
de Qualm es noch aus em Colt rauskumme
do war der Karrn aach schun verschwunne

Doch war der Spaß goanz schnell vorbei
in dem Auto war nämlich Zivil-Polizei
die funke oans Revier un berichte korz um
im Griesemer Wald rennt en Verrickte erum

Doann ging alles goanz schnell - sie hatt´n umstellt
un zurück oans Revier Entwarnung gemeldt
die Pistol die werd glei eubehaale
un e paar tausend Mark mußt er Strof bezoahle

Weil mer groad redde vun krumme Sache
do will ich aach glei weiter mache
Es werd geklaut bei uns im Ort
schließt eu euern Krom - sunst isser fort

Iwwerführt im Plus-Markt soin se worn
die Dame-Mafia vun Biddelborn
mit doppelte Borrem in de Eukaafsdasch
un em oannern Preisschild off de Cognac-Flasch

Fast e Dutzend Bürgerinne
ließe im plus die Sache verschwinne
Nur aus Gier ich mach e Wett
Weil so arm soin die werklich net

Do wunnerts mich net warum do vorne im Markt
alle drei Johr en neie Pächter hockt
bei so marode Umsatzzahle
do koann sich koaner länger haale

Ich wern jetzt mol e Schlückche trinke
un moine Musikante winke
fer all die, wo die Zech geprellt
werd jetzt es Lied vum Geld gespeelt

Lied: Wer soll das bezahlen

Vun de Handballer do gibt`s jed Johr zu berichte
die Pleite, Pech und Panne Geschichte
So stand des große Pokalpeel o
gejen Erstligist un all warn se froh

"Do kenne mer ne haufe Kaade verkloppe
un dodemit unser Finanzlöcher stobbe"
nur hatt mer die Größe der Hall net bedacht
un veel zu veel Kadde in Umlauf gebracht

Der Doach war gekumme die Hall war randvoll
drauß vor de Deer stande Leit noch wie doll
Die Ordner warn ferdisch un batschnaß geschwitzt
hon die Leit vor de Tribün off de Borrem gesetzt.

Es speel war gelaafe, verlorn ess es worn
doch geje Großwallstadt es des werklich koa Schoan
Die Hoandballrund ging doann aach noch vorbei
unn die Spieler warn froh - endlich frei

En Urlaub den hat mer sich redlich verdient
noch Ibiza gings mit ´ner große Maschin´
wo de Dorscht groß es weil die Luft so trocke
un knackisch braune Strandhase hocke

Zum Euchecke es die Mannschaft zum Flugplatz gerennt
"honn mer aach werklich oan alles gedenkt"
nur oaner wurd grie unn geel im Gesicht
"Vier Tickets leie dehoam off em Kischedisch"

Des konnt natürlich nur dem oane bassiern
er dut mol wirrer die goanz Innung blamiern
Iwwerhaupt steht der des muß aach gesoat soi
verdächtich oft im Kerwespruch droi

So Leit wern gebraucht des es doch klor
So en richtiche Kerwespruch-Matador
Aach bei de Spitzereiter goanz weit vorn
soin die Kerweborsch vun Biddelborn

Im letzte Johr im Volkshaus drunne
hon sich die Kerweborsch zusammegefunne
un beschlosse, daß se sich treffe wolle
um drauß´ im Wald ehrn Boam zu holle

Es kam der Doach, all war´n se do
mit Jeans, alt Hemb un feste Schuh ´
nur oaner kam um die Eck erum
un hatt es rote Bändche um

Der Kerl war komplett ausstaffiert
unnerum gewesche, die Schuh lackiert
in de Sektbar wollt´ er Hütcher saufe
un mit de Jungs im Saal eulaufe

E Mißverständnis - klipp un klar
des dem Kerl unnerlaufe war
doch wär des nur es oanzichste gewese
wär der Spruch schnell vorgelese

Es kam noch dicker fer die Genosse
die Kapell hatt de Vojel oabgeschlosse
oan Kerb war die "Traffic Line" verpflicht
die hoan vum Hasselhoff e Lied umgedicht

Des speele se immer in Crumscht off de Kerb
un sie speeltes aach do - off Gedeih un Verderb
un im Volkshaus war doann als Refrain
"Mer feiern Kerb in de Tornhall" zu heern

Doch hon sichh net nur die Kamerade blamiert
bei uns es aach genuch passiert
So ess Vorsjohr beim Kerwevadder noacht´s dehoam
gestellt worn unsern Kerweboam

Nur owwe horrer e bisje gewackelt
de Kerwevadder hot net loang gefackelt
ins Haus kimmt noch en Hooke eneu
zur Sicherheit muß des noch soi

Die Hilti mußt soamt em Bohrer drof
un mit große Schritt gings de Laader nof
doann dut er bohr nun beißt off die Zee
doch off oamol hot er koan Wiederstand meh

Er konnt´s net me annern es war gescheje
in de Schlofstubb vun de Eltern hon die Brocke geleje
un die Musik speelt wie alle Jahre wieder
die Kerweborsch soin lust´che Brüder

Lied: Kerweborsch soin lust´che Brüder

Woas vorgeht hier bei uns im Ort
will ich berichte Wort für Wort
Als die Entscheidung gefalle im Bürgerbegehre
wurd einem Mann zu Teil die Ehre

Er wurd gefeiert wie de King
es stand sogar im Spiegel drin
De Bojemoaster wußt er hat verlorn
im kampf vum die Ortsmitte vun Biddelborn

Doch die Entscheidung der Bürger hot er akzeptiert
un mit soine Mitstreiter philosophiert
warum die Abstimmung so ausgegoange
un so veel Leit den Weg gegoange

Vielleicht ess der Grund aach zu finne
daß so veel Heiser dun verschwinne
die einst geprägt des Bild vum Ort
jetzt steht do e Mietshaus - mit vier, fünf Stock

Un beese Stimme hört mer soache
es ging de Kneipe aach on de Kroache
newer de Kerch werd baal koa Bier me fließe
die "Linde" dut die Pforte schließe

Die "Kron" werd verkaaft oan die BGR
des es aach so e Gescherr
aach fer uns´re alte Mietskaserne
steht doann die Zukunft in de Sterne

De "Schröppel" noch zu guter letzt
do greift die Härte vum Gesetz
die Trepp ging do zu steil enoff
unn die Deer geht net noch auße off

de Weg zum Klo der ging dorsch´s Freie
ehr Leit, do fängt mer o zu schreie
wenn mer so en Scheißdreck hört
als hätt des je en Mensch gestört

De "Kiehle" hot schun länger zu
un so verschwind in aller Ruh
wirrer e Stückche Biddelborn
do macht Eich mol Gedoanke drum

So loang die Wertsleit uns noch winke
do wolle mer aach die Schoppe trinke
un die Musik speelt des muß jetzt soi
Jetzt trink mer noch e Flascherl Woi

Lied: Jetzt trink mer noch e Flascherl Woi

Ehr Leit, nach so veel ernste Worte
do gibt´s jetzt Kerwespruchkonsorte
vun ganz besonderer Qualität
horscht woas off moim Zettel steht

E sportlich Fraa in de beste Johrn
rank und schlank mit koarze Hoorn
die steht dehoam vorm Klaarerschrank
guckt owwe - unne - un oam Roand

"Woas zieh ich nur fer Hose oh
ach wenn ich´s wüst, woas wär ich froh
do ess jo oa, ja die ess schee
die dut mer sicher goanz gut steh"

Die Hos war vielleicht e bissje zu eng
mit em Finger in de Lasch hot se sich neugezwengt
beim letzte mol ziehe do war´s geschehe
mit em Kapselriß hot se in de Schlofstubb geleje

En Handwerksbetrieb - aus Biddelborn
es 75 Johr alt worn
do lässt es sich aach koaner nemme
zum gratuliern mol he zu renne

Die Handwerkskammer reiste oo
doch vum Betrieb war koaner do
Sie wollte Sekt un Schnittcher esse
doch die Han´s eigne Jubiläum vergesse

"Woas wollt doann ehr do" ruft die chefin erschreckt
"Ach kummt nächst Woch nochemol, do ess de Disch gedeckt"
Do derf mer nur net die Nerve verliern
womit mer bei de Bauern wärn

Wenn die Sunn goanz hoch oam Himmel steht
do werd im Feld die Frocht gemäht
De Bauer segt "woas ess des Werrer schee
ich loß moi Roll im Freie steh"

Doch bei dere Hitz do muß mer wisse
daß oannern Ploanze berejend wern misse
Un de Kolleesch offem Acker newe dro
stellt aach promt soi Berejenung oh

Die ess gelaafe die goanz Noacht
un hot die Froacht schee naß gemoacht
als er des geseje, denkt´ er, er kriegt de Schiß
die Roll hot gtreppelt wie en Laster mit Kiss

En onnern Bauer vun Biddelborn net weit fort
segt "Ich fahr mol zu Besuch ins Ort"
do kennt ich aach de Sprit mol sparn
un mit moim neue Fahrrad fahrn

Er kimmt zu dem Besuch aach he
un läßt soi Fahrroad groand drauße steh
er wußt net daß er´s do es letzte mol sah
weil oan dem Doach nämlich Sperrmüll war

Doch wie ich den Bruder kenn do drauß
ging der bestimmt net zu Fuß nach Haus
Der es bestimmt dorch´s Ort geflitzt
un hot sich e oanner Road stibitzt

In de nächste Woch esses wirrer soweit
es werd umgestellt off die Winterzeit
Vorsjohr war do oaner goanz schlau gewese
un hot die Zeitung falsch gelese

Er hat die Uhr net wie´s im Bläädsche steht
e Stunn noch vorne anstatt zurück gedreht
am Sunndoag zu Esse war er eugeloade
er steit frieh off unn dut sich boade

Doann dappt er los bis zu dem Haus
un schmeißt die Leit em Bett erraus
de Schlof aus de Aache reibt sich die Fraa
weil´s jo erst halb zeje war

Zum Schluß werd jetzt vun hier bericht´
aus Biddelborn die dolls´t Geschicht
En Teilzeitbauer hot e Waadnoh oam Ort
mit Hinkel vun goanz besonderer Sort

Die laafe goanz normal do erum
doch ich will erzähle wie ich do druf kumm
E Fraa geht mit ihrm Hund drauß spaziern
un macht die Lein ab, es koann nix passiern

Doch als der Hund ein Huhn erblickt
des sich do dorch de Zaun gedrickt
do war´s um des Federvieh aach schun gescheje
es hot verreckt im Feld geleje

Die Fraa die war total geschockt
hot glei ehrn Hund zurück geroppt
ess hoam gelaafe iwwers Feld
un hot´s em Besitzer glei gemeld

Sie hot em die Geschicht aach glei gebeicht
un das er sich koa Gedoanke mache breicht
bringt se em 20 Mark vorbei
do wär die Sach schun in de Reih´

Sie ess noch oan dem Doag, dem gleiche
dort he, um die Schulde zu begleiche
Doch der segt "Fraa mach mol koa Bosse
ich hob mer des nochmol dorch de Kopp geh losse

Bei mer koann so e Hinkel stoa alt wern
dut mir oam Doag zwei Eier beschern
un im Leje war die Henne wirklich stark
des wär´n doan fuffzehhunnert Mark"

Die Fraa, die ruft "Du host en Knall
fer des Geld kriegst de en beheizte Hinkelstall"
Des hot schwer noch Stunk geroche
un en Rechtsstreit wurd vum Zaun gebroche

Wie des ausging, des waas mer net
awwer geht net spaziern, bleibt liewer im Bett
Doch wenn Ihr es seht, geht ihm aus dem Weg,
dem Huhn, das goldene Eier legt.

Vum Kerwespruch wars des gewese
jetzt hob ich aach genuch gelese
Ich fraa mich heit owend in de Tornhall zu soi
un load Eich hiermit alle oi

Feiert mit uns hei tun moje
vergesst mol Eier Alltagssoje
un loasst uns all gemeinsam singe
drum soll de Kerwemarsch erklinge

Lied: Kerwemarsch

• Aus der Feder von
  Fred Kraus
• Kerwevadder
  Jörn Engelter
• Beivädder
  Jens Scheider, Markus Müller
• Kerwewatz
  Guido Krämer
• Schmuddels
  Jörg Raiß