Kerwespruch 1949

Seid willkommen all er liewe Leit,
denn wir feiern Kerwe heit.
Do werd gehibbt, getanzt un gesprunge,
gelacht, gescherzt un gesunge.
So bleibt es wie es war, es es blos aomol Kerb im Jahr.

Mer wolle den Ofang gleich emol richtig begieße,
daß er hei tun meue die Kerb dut richtig genieße.
Kamerad schenk eu e Gläsje Weu,
es muß emol getrunke seu!
Un die Kapell die es jetzt dro,
mit de Bittelberner Kerb es wirrer do.

Lied: Kerwemarsch

Des alte Johr wolle mer mol in Ruh losse,
awer die Neiigkeite wolle mer doch emol e bisje zusamme fasse.
Am Owerrenn es aner ganz hell, der richt e Totoannahmestell,
die Wäscherei es a noch was vum neiste,
awer des kenne sich jo doch nur die Bessere leiste.

Der Anner kann a net die Finger an Aner losse,
un do deweje vergifte, sein jo a nur so Herrschaftsbosse.
Awer wann de Mann emol e Anner lernt kenne,
esses noch lang kaon Grund zum Landrat zu renne.
Dann ich kaonn der nur des aone saoge,
wann du mich a dust verklaoche,
zeig immer lachend Gesicht, denn alte Liebe rostet nicht.

Un ich will des emol begieße,
un die Kapell spielt: "O Luise, keine küßt wie diese."

Lied: O Luise, keine küßt wie diese

Jetzt kumme mer mol zu de Bauern,
die seun wahrhaftig zu bedauern,
pflichtgetreu erfüllt er seu Soll,
awer schreiwe dut de Hundeverein es Protokoll.

Off de Weiterschterstroß do hot aoner ga kao Benemme,
dann der dut Abebenutzungsgebühr nemme.
Die Spargelährn es jo die Haupteunahmequell,
nur fehlt do die Preisüberwachungsstell.
Die Geschäftsleit mache sich dodebei gesund,
aoner beziehlt 2 Mark 80, der aonner 4 Mark 50 fers Pund.

Jetzt kumme zwaa die honn sich blamiert,
die hon doch zu zweit ao Mädche possiert,
de Vatter festzustelle war net leicht,
deshalb hot mer die Sach gleich em Jugendgericht überreicht.

Dort streite sich beide noch un noch,
awer die Blutprob entscheidets doch.
Die hon die Zeit genosse un bei uns werd des heit begosse.

Kamerad schenk eu vom Saft der Rewe,
jetzt wolle mer mol unser Gläsja hewe.
Un die Kapell die spelt geschwind,
bitte bitte lieber Geiger mach mir doch ein Kind.

Lied: bitte bitte lieber Geiger mach mir doch ein Kind

Die Dreschgesellschaft hot a geglabt sie det waos verbasse,
deshalb hot se er alte Arweiter entlasse,
dann dene hon se netme getraut,
sie hon geglabt sie henen so vel geklaut.

An de anner Maschin war mer a net vel besser drann,
do hat en gonz raffinierte Mann,
die Press verstellt zu erfinne,
daß de Stoga er Kordel net meh dut binne.

Die Stoga macht en mords dam-dam,
awer verher wiegt se die Spargel a ofs Gramm,
un wann aoner net so vel dut wieje,
do muß er gleich in die anner Sort neu fliehe.

Un wann des mit dene Julifäll so weirer geht,
in drei Johr kaon aohne Baum meh steht.
Do wer eigentlich genug Holz dogewese,
wann de Gemeiderat in de Sitzung net so vel het geläse.

Un jetzt drink ich aoner Dienemer Natur,
und die Musik spielt dezu die lustigen Holzhauerbuarn.

Lied: Die lustigen Holzhauerbuarn

Den Gemaoneraot kann mer jo a net immer verklache,
denn mer muß em a emol die gure Worte saoge.
Do wer an erster Stell, daß die Gasse sein wirrer hell,
awer am meiste es zu begrüße,
daß die Fuhrunternehmer die Stroß mit Split dun begieße.

Am Ofang wollt des net so richtig klappe,
do hot jeder gemaont er det em annern die Ärwet eweg schnappe,
bis de Amtmann vun de Gemao dezu es kumme,
un fängt iwer so manches o se brumme.
Awer uff Kerb des losse se sich net nemme,
do wolle se a noch emol in Büttelborn penne.

Des aone es zu begieße,
daß mer so manches mit gut Bier kann genieße,
schee esses daß es 12 Prozent enthält,
awer 35 Pfennig es noch so vel Geld,
doch die Weubauern solle a noch lewe,
deshalb trinke mer emol vum Saft der Rewe,
un daß es fer die Musik net so deuer kimmt,
spelt se jetzt geschwind, zwei, drei, vier, die Musik hat kao Bier.

Lied: Zwei, drei, vier, die Musik hot kao Bier

Awer jetzt uffgebaßt un gelauscht,
jetzt kimmt aoner der hot seu Sach vertauscht,
de Zement strat er uffs Feld, des Thomasmehl sein Pfeiler hält.

Dem Annern es ses net vel besser gange,
der konnt mit de Geil net hantiern,
do hat er se halt eme Annern gewe zum dressiern.

E Fraa un zwaa Männer in de beste Jahrn,
wollte neilich emol noch Trewer fahrn,
unerwegs do hot die Britsch gekracht,
un die Fraa hot etliche Woche im Krankehaus zugebracht.

Der jetzt dro kimmt,
der sich meistens Zeit nimmt,
des es en iwerschlauer,
awer trotzdem verliert er neilich e Raod vun seim Bulldog im Klauer.

Was jetzt kimmt kann mer bezeiche als e Sensation,
do bummt sich de Vatter mit seim Sohn,
weje rer Packung Zigarette,
als ob die zwaa nix anneres zu dun hätte.

Jetzt kimmt Aoner der läßt sich net lumpe,
der dut sogar seu Schwiermotter bummbe,
doch die hot em in de Arm gestoche,
daß es Blut laaft: iwwer alle Knoche.

Awer jetzt losse mer des Blut emol fließe,
un dun des mit eme Tröpfche Weu begieße,
Die Kapell die hot ern Last,
mit dem Lied "Wenn du noch eine Schwiegermutter hast…"

Lied: Wenn du noch eine Schwiegermutter hast

Mit vier Mann es die Polizei in Büttelborn stationiert,
awer Täter hon se bis hei noch kaoner iwerfiehrt,
wie mer noch kao hatte do war noch Ruh,
awer jetzt wird gestohle immerzu,
de Einbrecher macht des jo Spaß,
dann wann se eubreche es kaoner von de Polizei uff de Gass.

Jetzt hommer Aoner notiert,
der hot sich mächtig blamiert.
Die luft hätte se em erausgelosse, so hot er geklaogt,
awer des Gericht hot en gleich zum Deiwel gejaogt.

Off de Hinnergass es was bassiert,
do hot Aoner die Wohnungseinrichtung demoliert,
daß er seine Ehefraa die Brill erunner schlage kann,
des zeichnet en als en tapfere Ehemann.

Jetzt Schluß domit, es wart de Weu,
dann der will jo ach getrunke seu.
Un die Musik spielt jetzt mit Humor,
"De Watz leit hinnerm Tor"

Lied: De Watz leit hinnerm Tor

Des Lewe es ewe iwerhaupt so deier,
do kimmt mer aach noch mit de Kerchesteier.

In Büttelborn werd mer modern uff alle Fäll,
un deshalb hält mer jetzt a schun Hausmaskebäll,
awer bis mer moijens geht noch Haus,
do esses mit de Ehe schon dreivertels aus.

Awer neies muß jo ins Ort ereu,
deshalb baut der anner ach schun e Schwimmbad in sein Garte neu.

Während ich meu Kehl mit Weu dun kihle,
kann die Musik de Samba vom Zuckerhut spiele.

Lied: Samba vom Zuckerhut

Unn noch ebbes wollt ich eich verzehle:
Mer wisse, an D - Mark duts iwwerall fehle.
Deshalb holt eich hinner unsere Deer,
kaoner fer e Mark e Eutrittskart veer.

Drum, wer sparn will - unn des wollt er doch all -
feiert seu Kerb in unsere Hall.
Des mit dem Eutritt seun so neie Bosse,
unn die wolle mer wirrer euschloofe losse.

Dann des Geld, wo er an Eutritt spare dut,
kimmt eierm Esse unn Drinke zu gut.
Fer die Zwo Mark - des was jed Biebche -
ißt mer beim Kullmanns Jean besser e Rippche!!

Un jetzt er Kerweborsch hoch die Flasche, hoch de Weu,
un mit em Biddelberner Kerwemarsch in Saal eneu.

Lied: Kerwemarsch

  • Aus der Feder von
    George Hirsch
  • Kerwevadder
    Peter Jockel
  • Beivädder
    unbekannt
  • Kerwewatz
    unbekannt
  • Schmuddels
    unbekannt