Kerwespruch 2022

Guude ehr Leut, schee eich zu sehn,
wie frieher, vor de Kron zu stehn.
Die letzt ordentlich Kerb is veel zu lang her,
Dafür ham mir jetz Bock, unn zwar um so mehr.

Ich hab diesjahr die Ehr fuffzisch Mann zu regiern,
Jungs, seid so gut dut auch reagiern.
So veel Borsch in der Hand eines Mannes,
Derf ich mich vostelle, ich soin Wasserschmidts Johannes .

Dies Joahr is endlich wirrer alles wies woar,
awwer gleichzeitisch aa es letzte Joahr.
Die Kron macht zu, ich mach koan Scherz,
Do blutet jedes blaue Herz.

Des End vun rer Ära es is schun traurisch,
Kerb ohne Kron, des klingt oafach schaurisch.
So stirbt e Stiggsche Tradition,
also all nochmol zum Sider in die Kron.

Es Läwe geht weider, mer tun net verzage
Mer feiern trotzdem die Kerwetage.
Wie's in Zukunft leeft, des werd mehr sehn,
doch unser goldisch Kerb die bleibt bestehn.

Ich leg jetz awwer mit de Geschischdscher los,
Weil ehr kennt mer glaawe, die is eng, so e Hos.
Die Musigg speelt unser Lieblingslied,
singt laut, dass mers heert, im goanze Ried

(Lied: Kerwemarsch)

In em Kinnergaade groad e Stigg weider,
Is woas bassiert, des werd eisch erheidern.
Beim Abholle, ehr werds all schun wisse,
do krieje die Eldern, net immer alles geschisse.

Wo is doann doi Kapp, unn wo soin doi Schuh?
Jetzt heer uff zu zappele und gib halt mol Ruh.
Doann werd noch mit de Erzieherinne diskutiert,
bevor mer doann endgültisch die Nerve verliert.

So is en Klassiker letzt erst bassiert,
do hoatt sich e Fraa wirrer echauffiert.
Sie will de Bub holle unn merkts doann glei,
Die Schuh, die hattste heit moijend gar net debei.

Es is wie immer, soi Schuh warn vertauscht
doann soin se erstmol hoam gerauscht.
De Bub hoatt doann gescholle kriegt,
Warum immer alles in de Kita rumfliegt.
"Jetzt bass mol uff doin Krembel uff,
Sonst kriegste baal, mol rischdisch oa druff."
Am Owwend freegt de Vadder, er kratzt sich oam Kinn
wem die fremme Schuh, vor de Haustür sinn.

"Freeg doch doin Bub", seegt die Mudder glei
"Doin Sohn is wie du, net goanz in de Reih"
de Vadder seegt: "Vun dem bin ich's gewohnt,
awwer du hast dir wohl aa neie Schuh geholt."

Die Mudder hoatt goanz korz gestutzt,
unn war doann glei goanz schee verdutzt.
Ihr Schuh soin fort, sie koanns net fasse
unn die oannern die do stehn, dun net rischdisch basse.

Wer is schun druff gekumme, woas do is bassiert?
die Fraa, die hoat sich goanz schee blamiert.
De Bub noch gescholle, er wär net erzoue,
awwer selbst die Schuh, vun rer annern Mudder oogezoue.

+++

Sechs Fraue, all do ausm Ort
Die wollte endlich aa mol fort,
E Geschenk, des wär noch oizulöse
sunst werrd die Beschenkte böse.

Es gibt do so en neie Trend,
wo die Jugend als hierennt.
Alpaka Wanderung, des wär goanz schee fett,
Also laafe mit Lamas, meh isses halt net.

Doch die Mädscher die fraan sich all schun,
weg vun dehoam unn zwar meh als e Stunn.
Moijends getroffe in Darmstadt am See,
schee Sekt in de Kopp, woas is des so schee.

Die Farm, wo die Alpakas soin,
die is im Orrewald, in so rer alde Scheun.
Also ab in die Audos unn losgebrummt,
Radio aus unn e paar Liedscher gesummt.

Ach ehr Mädscher guggt doch emol naus,
im Orrewald is scheenner als bei uns zu Haus.
Hier gibts gar kaum Häusjer unn veel Natur,
unn die Strooß wo mer fahrn, die hoatt nur oa Spur.

Seit zwaa Stunn, irrn se jetzt baal do rum.
Soin glei schun zu spät unn es knallt die Sunn.
Endlich kumme se oo, an so rem Häusje,
Hier musses soi, erstmol e Päusje.

Sie merke doann glei, do koann woas net stimme,
sie könne die Lamas nirgendswo finne.
Es is en Klassiker im Spruch, do wärste verriggt,
die falsch Adress ins Navi getippt.

Jetzt awwer schnell mer soin glei wirrer fort,
Mer fahrn weider, nur zum rischdische Ort.
Schwupps alle Mädscher wirrer noi in de Karrn,
Rickwärtsgang noi, unn weitergefahrn.

Im tiefste Orrewald, fällts Navigiern schwer
unn so irrn se als weider hie unn her.
Sie finne die Farm net unn dere oa werd schlecht,
allah gut, doann halt wirrer hoam geprescht.

Koa Lamas, Koa Woandern unn aa koan Spaß,
doann liewer an Kerwemontag ab uff die Gass.
Fer die Fraue unn fer all ihrn Frust,
singe mer: Das Wandern ist des Müllers Lust.

(Lied: Das Wandern ist des Müllers Lust)

+++

Wer waas es net, in unserm Ort,
Treibt mer leidenschaftlich Sport.
Am liebste doch beim TVB
Do isses halt besonders schee.

Do gibts e Grupp, e besondres Team,
Die springe so gern Trampolin.
Sie hippe Mini, Einzel unn Dual,
Oamol im Joahr, beim Sauerkraut Pokal.

Unn weil des Dotze hungrisch macht,
Wurd ans Esse aa gedacht.
Worscht, Steak unn Kartoffel Risolee,
Des sollts gewwe unn net meh.

En Bauer do aus unserm Ort,
Der sponsort gern unn zwar sofort.
So hoannse doann, fer ohne Geld
Die gekochte Kartoffel vorbestellt.

De Grill war oo, es werd ihne Angst unn Bange,
Die Kartoffel zu holle, war ihne entgange.
De Hiwi hoannse doann geschickt,
Der is im Audo ausgerickt.

Hiegebrummt, koaner do, nur en Pole,
Egal, er freegt, goanz unverstohle.
Er soll mol gugge, ob im Kiehlhaus woas steht,
Gesucht werrn Kartoffel, in rem Paket.

Gesucht, gefunne, wer hätts gedacht,
awwer liewer net zu früh gelacht.
Er is doann wirrer zurigg ins Ort,
Die brauche jo die Kartoffel, am liebste sofort.

In de Poann sollte die net loang dauern,
Weil mir hoann jo Hightech Bauern.
Die Sportler warn schlau unn hatte fer koa Geld,
Die Kartoffel fix unn fertisch vorbestellt.

Es war doann aa schun Mittachspaus,
unn die Hipper kame raus,
Sie hatte vun dem hoch unn runner,
Alle aa schun gaschdisch Hunger.

Es Fleisch war gar, sunst alles am Start,
Nur warum soin die Kartoffel so hart?
Bestellt warn gekochte, es derf net dauern,
Weil aa des könne unser Bauern.

Wie Oowends die Mess geläse war,
War die Beilage dann gar.
Was war passiert, wie konnt des soi?
Ich soachs eisch, die warn im falsche Kiehlhaus droi.

Zu dick, zu mehlisch unn aa noch roh,
Die gekochte Kloane stande im Kiehlhaus näwedro.
De Landwirt isst doann Kartoffel fer drei Woche,
Weil die braucher jo netmeh koche.

+++

In solche Zeide, heitzudoache,
muss mer sich selwer alsmol fraache,
Wie leg ich moi Geld am besde oo,
doass ich aa woas hoab devo.

Doch Moanche iwwertreiwe, e bissje zu arg.
unn mer kriegt die Quiddung, fer soi eigene Tat.
E ortsbekannt Sparbrötsche hoatt geheiert,
unn hoatt desweije aa bissje gefeiert.

Doch so e Hochzeit, die kost deier Geld,
weil mer aa legger Esse bestellt.
Drum dacht sich unsern Kollesch ich soin jo net bleed,
unn hoatt die Hochzeit oan e bestimmd Datum gelegt.

Owwends noch oigeloade, er hoatts fast versäumt,
uffm Geburtstag vun em gude Freund.
So dacht sich unsern Sparfuchs doann,
moijends werd geheiert, in de Kersch vun Biddelborn.

Unn middoachs gehn mer esse, des reicht doann aa,
awwer nur die Familie, vun mir unn de Fraa.
Do kumm ich billisch weg, so solls laufe,
doann koann mer owwends, fer umme saufe.

So wars doann aa, die Feier war schee,
so jetzt misse die Gäst awwer werklisch geh.
Die Fraa hoamgebracht, ich mach jetzt weider,
zum Kumbel uff Geburtsdoachsfeier.

Fuffzeh Minude speerer, war er wirrer zurigg,
die Fraa sich gewunnert, des is jo veriggt.
"Ei moin Moann, du warst jo net loang fort,
wos war doann los, wars loangweilisch dort?"

Noigelasse uff die Feier, wurd er dort net,
desweije steht der hier in de Kerweredd,
Es woar noch in de schwerste Corona Zeit,
unn unsern Kerl, war halt net vorbereit.

Er hoatt dehoam goanz schwer geschimpft,
denn er war halt net geimpft.
Desweije durft er in die Beiz net noi,
Weil es hoatt, net solle soi.

Hätt er liewer net so rumgeeiert,
unn mit soine Liebste noch bissje gefeiert.
Paar Taler meh, hätt er ausgewwe misse,
dodefer wär soin Oowend, aa net so beschisse.

Jetz basst mol uff unn horscht gut hie,
weil woas jetzt folgt, des gabs noch nie.
Zwaa Bosse, in oaner Geschischd verpackt,
Des klappt nur, woann mers doppelt verkackt.

Auf gehts ihr Männer, mir fahrn in de Schnee,
Schifoahrn unn Saufe, des werd wirrer schee.
So hatt en Biddelberner Trupp de Plan,
Sie wollte nach Österreich, Apres Ski fahrn .

Wer fährt, des brauche se net knobeln,
Sie fahrn mim Firmeaudo, extra Nobel.
In rer Reifefirma war Oaner e hohes Tier,
Do brauchte se koan Sprit berappe, die vier.

So gings los, im voll bepackte Karrn.
Lustisch wurds erst, wie se in Österreich warn.
Es Wetter schlägt um, vor Schnee sieht mer nix mehr,
Do stand aa schun, es Audo quer.

Sie haale liewer oo, des hat so koan Zweck,
sunst hänge se glei am nächste Eck.
Liewer mol e Paus gemacht,
als mim Karrn wo dewerrer gekracht.

Wie se do steh unn gaschdisch friern,
Dut oaner mol die Reife inspiziern.
„Du Idiot, bist Chef beim Reife-Ginther,
Unn fährst mit Summerreife im tiefste Winter“

Mit Summerreife im Schnee zwaahunnert fahrn,
Ei logisch gibts doann Achterbahn.
Hilft jo nix do rumzulamentiern,
sie lasse sich Reifehändler neie Gummis montiern.

Heil, awwer zu spät im Urlaab oogekumme,
Hoannse erstmol paar Schoppe genumme.
Unn weil se gaschdisch dorschtisch warn,
Werrn erstmol paar Willi abgefahrn.

Paar Stunn speerer, wer hätts gedacht,
Hoannses Portemonnaie schun leer gemacht.
Oaner vum Team der war gaschdisch mied,
Die Aache so kloa, dass er nix meh sieht.

So hoatter doann goanz unverdrosse,
Die Oannern heimlich steh geloasse.
Er guckt durch e Fenster, direkt näwerm Scherm,
Do gibt’s e Sauna unn Liege, die hätt er jetz gern.

Zack war er doann im Wellnessbereich,
Schee undercover enoigeschleicht.
Er legt sich ab, im Ruheraum,
Prima geschloofe, woas war des en Traum.

Vier Stunn speerer wachter uff,
Naggisch uff de Liege druff.
Sie wollte schnell fort, er unn soin Suff,
Doch die Ausgangstür, die ging net uff.

Do wurds em aa schun Angst unn Bange,
In de Sauna, warer jetz gefoange.
Die best Idee, in soim Kopp so dicht,
War die Flucht dorschs Owwerlicht.

Die Liege hoat er doann gestapelt
Unn is hackezu, uffs Dach gegakelt.
Soi Jungs, die hatten schun gesucht
Unn sehn en doann, bei soine Flucht.

Eugefoange unn ins Bett gelegt,
Dass er bei Zeit uff de Bretter steht.
So ging die Woch doann aa ins Land,
Gesoffe hamse, allerhand.

So stand doann aa die Hoamfahrt oo,
Jetz all noi ins Dienstaudo.
De Kofferraum schee vollgestoppt
Unn hinne, Arsch oan Arsch gehockt.

Unsern Reifechef tritt doann uffs Gas,
Ehr Leit woas doann passiert, des is koan Spaß.
Es Audo schießt los, ich soachs eisch wies wahr,
Er brummt volle Lotte dorchs Fenster in die Bar.

Fer die Mär, war des es bassende End,
Am liebste hätte se all geflennt.
Die Mussig speelt es Lied vun de Schi,
Unn all singe mit, so laut wie noch nie.

(Lied: Skifoarn)

+++

Es gibt e Städtsche, weit im Oste geleije,
do tut mer immer veel Touriste seije.
Prag, des is so e schee Stadt,
do geht’s awwer, annerst ab.

Paar junge Kerl fahrn do jed Joahr hie,
do kannste schee saufe, do gibt’s gut Brieh.
So dachte sich paar Buwe vun hier,
mer fahrn schnell riwwer unn tringe schee Bier.

Gesacht, getan, zeije Moann, oa Wort,
schee es ganze Wocheend mol fort.
Fraue warn bei dem Trip, do net dabei,
Die Buwe renne glei, in die nächst Brauerei.

Es Bier is gelaafe, all warn se schun bleed,
unn Owends, doann in die Discothek.
Der Oane vun dene war so rischdisch voll,
soin Moue hoatt gerumbelt, goanz schee doll.

Ehr Leit, ich kumm glei wirrer zurigg,
er leeft richtung Klo, des war schun e Stigg.
Doann sieht er, woas sollen des jetz?
Die Klokabine soin all besetzt.

Er muss schnell aus dem Schubbe raus,
weil die Worscht, guggt hinne schun naus.
Jetzt stehter uff de Strooß unn waas net wohie.
Es hoatt nix meh offe, es leeft glei oans Knie.

Druff geschisse, iwwer die nächst Mauer gehibbt,
unn sich doann glei erunner gebiggt.
Laafe loasse, woas war des so subber,
die Konsistenz,die war wie warm Budder.

Als er guggt, nooch soim cremische Schiss,
do merkt er erst, wo er eigentlisch is.
Heiliger Jacob verzeih, ich konnts jo net wisse,
do hoatt er doch glatt vor die Kersch geschisse.

Zu veel Bier ob kalt orrer warm,
schlägt halt gern mol uff de Darm.
Desweije trink ich jetzt moin Woi,
Mundschenk, schenk noch oaner oi.

Die letzte paar Woche, wars soweit
endlich wirrer, Urlaubszeit.
Die Oane fahrn gern regional,
oan die Ostsee orrer nach Wuppertal.

Oannern Leit hoann meh Geld iwwer,
Unn flieje, zu de Amis riwwer.
En Jungunternehmer, ich soach net wie er haast,
Fliegt mit soine Alt, nadierlisch Buisness Class.

Iwwern große Teich, noachts um halwer vier
Excuse me, Saftschubs, i take a Beer.
Die hatte dort paar scheene Doache,
Gut esse und tringe, so koann mers ertroache.

Verlobt hoatt er sich do driwwe aa,
Die Reise war subber, des is jo wohl klar.
Frisch verlobt und noch e bissje stramm,
Tritt mer doann, de Rückflug an.

Nadierlisch wirrer Buisness Class,
do macht es Flieje halt meh Spaß.
Hiegesetzt unn die Nas abgebutzt,
wohie doann aa mit Müll unn Schmutz.

Gugg mol vorne in de Vorrersitz neu
Do misst doch e Kotzdutt soi.
Die nimmter glei, robbt runner unn ruff
awwer die Dutt, geht net rischdisch uff.

Do klebt woas unne, wie kimmt des do hin?
Schwups steckt schun soi Hoand do drin.
Er fühlt doann glei mol rischdisch gut,
warum die Dutt so kläwe tut.

Ehr Leit wos jetzt kimmt, is werklisch bassiert,
Do hoann die Zwaa sich schee geniert.
Die Kotzdutt im Fliescher lag vom Hieflug noch do,
unn was do droi war, macht unsern Kerl net froh.

Er riecht noch dro unn hoatts glei analysiert,
Do hoatt werklisch oaner in die Dutt masturbiert.
Unsern Kerl, der hoatts jetzt oan de Finger,
Ich glaab es geht net werklisch schlimmer.

Jetzt wisst ehrs all, fer die kommende Doache,
Buisness Class is aa net es Woahre.
Unn weil do Oaner sich selwer gemolke,
Singer mer zamme: über den Wolken!

(Lied: Über den Wolken)

+++

So ehr Leit des wars jetzt gewäse,
Die greeßte Bosse soin verläse.
Hoatt sich oaner im Spruch entdeckt,
orrer die Finger in wos Eklisches gesteckt.

So seid net bees und denkt eisch immer,
Irgendoam gehts meistens schlimmer.
Ehr Leit ich load eisch jetzt all oi,
Zu mir in de Hof, des werd rischdisch foi.

Zu Wasserschmidts ehr wisst all wohie,
Do gibt’s esse unn tringe, des werd wie noch nie.
Dut mer en Gefalle unn zwar net nur heit,
Troacht mer die Kerb im Herze ehr Leit.

Singt unn trinkt unn hoabt eiern Spaß,
Egal ob in de Kneipe orrer uff de Gass.
Gebt moine Buwe mol e paar aus,
unn geht erst moije frieh nach Haus.

Hoch die Liebe hoch der Woi,
Die Biddelberner Kerb muss unser soi.
Moin Gruß geht raus an die Kapell,
Mer brauche de Kerwemarsch, jetzt awwer schnell.

(Lied: Kerwemarsch)