Kerwespruch 1987

Hoch zu Roß und stolz vor Freud´,
so begrüß ich heut Euch Alle,
ob alde oder junge Leut,
er dut mir all´ gefalle.

Ich grüß die Freunde und Bekannte,
ob se groß sinn oder gloa,
die Nachbarn und ach die Verwandte,
denn die Biddelberner Kerb es wirrer do.

Die es bekonnt bis Gott was wohe,
des wisse ´se fast Alle,
denn die Biddelberner Kerb es immer schee,
die dut en all gefalle.

Bereut hot´s noch koaner, daß er zu uns es kumme,
mir hatte für jeden e Überraschung bereit,
ob´s die Alde war´n oder die Junge,
für alle war´s e riese Freud.

Aach dees Joar, off jeden Fall,
hon mer uns wirrer woas eufalle losse,
besucht uns nur, do hinne in de Hall,
do lafe wirrer so monche Bosse.

Mer hon lerne donze und ach singe,
geschafft hon mer wie verrickt,
mer wolle Eisch doch wos Gescheides bringe,
des es uns scun jed Johr geglickt.

Jetzt es Schluß mit der Begrüßerei,
doch vorher nemm ich noch ein Schluck,
iwer die Leit im Ort honn ich ach wos debei,
unn die Musik gibt sich jetzt en Ruck,
Wie ich seh, seid alle froh,
denn die Biddelberner Kerb es wirrer do.

Kapelle: Kerwemarsch

So jetzt will ich langsam beginne,
er werd´s versteh, es es nur Spaß,
Name werd Ihr koaner finne,
die suen die seun verwischt, denn de Zettel war naß.

Zur Königin wurde schon manche gekrönt,
ob in Biddelborn oder in de weite Welt,
do werd mer so richtig vun de Leit verwöhnt,
die Hauptsach mer hod´s nötische Geld.

Klarer wern kaft, fer en Haufe Scheu,
de Kopp so richtig ofgebaut,
noch koa fünf Minute in de Tornhall dreu,
hod se schun er Klad versaut.

Hom zum Bügeln und zum Wäsche,
es war jo werklich superbled,
ich muß jetzt fort, hod se gegresche,
nur zur Krönung kam se zu spät.

+++

Wold oner in seum Hoasestall,
mol schnell für Nachwuchs sorge,
er nimmt die Häsin off Knall und Fall,
denkt heut is besser als wie morge.

Setzt se zum Bock, der rührt sich net,
er konn des net versteh,
entwerrer will die Häsin net,
orrer der Bock, er kann net me.

Er läßt se beisamme die ganze Nacht,
und denkt es haut schon hin,
de negste Moirjend hod se Junge gemacht,
sechs Kloane sase drin.

+++

En Bauer hier aus unser´m Ort,
hod Kundschaft über´m Main,
es Auto voll Gemies unn fort,
fängt an mit Flörs, hört auf mit Heim.

Net nur verkafe tut er hier,
doch manchesmol aach zappe,
aus em alte Faß ein frisches Bier,
unn des dut prima klappe.

Dann kam de Tag, wo er Dienst mußt mache,
es war en Schreck mit Weh und Kraus,
er wollt´s net glawe, des seun koa Sache,
koa oanzisch Auto war im Haus.

Plichtbewußt offs Fahrrad gesetzt,
iwwer Risselsem noch Flerschem gewetzt,
er kennt mers glawe, der Wirt war froh,
unn die Musik speelt, ich seun mim Radel do.

Kapelle: Ja mer seun mim Radel do

Jetzt hon ich on, muß ich es bisje schneller mache,
sonst komm ich net zum Schluß mer heit,
weil dene bassiern jo so vel Sache,
gleich werd er's hern, er liewe Leid.

En Bulle wollt er schnell verkafe,
14 Zentner wog er, woas e Pracht,
dut ach schee in Hänger lafe,
off oamol warer soammegekracht.

Er ging nemme vor unn net zurick,
en Schußapparat her, geschosse ins Gnick,
Dreimol geschosse, bis er leije geblewe,
unn doann zum Schuß die Kehl abgeschnerre.

E Notschloachtung so Sache bassiern,
die goanz Familie voll Angst und Bange,
jetzt dunn mer ach noch ein Haufe Geld verliern,
hoffentlich duts fern Polderoawend longe.

Es wern Eulodunge geschickt, dofer es noch Zeit,
do kumme auch net so vel von dene versoffene Leid.
Die oane soawe, mer duns in de Tornhall oabhoalde,
gibt nix, es werd gemacht wie in de Zeite de Alte.

In de Scheier wird gefeiert gell moin Schatz,
die wird ausgeromt, do hon mer Platz,
alles klar, es gibt koa wehrn.
Moije frieh um 4 dunn mer die Spann abkehrn
Unn mittags in de Hitz, dess es net zum Lache,
steht se im Wald un dut Zuckerrübe hacke.

Des kennt er mer glawe, des es ach wohr,
mer maont des Mädche wer net klor.
Sie steht in de Sunn, so brou wie Luis Trenker,
er macht e paar Tog fort, mer moant es wär de Mengler.

So isses Lewe, mol Freud, mol Quale,
ich heb moi Glos unn guck misch um,
die Musik speelt, wer soll da zahle,
Robert am Diensdoag es alles rum.

Kapelle: Wer soll das bezahlen?

Lotto spele unn noch Glick debei,
des bassiert net alle Tage,
es gibt e paar Millione Scheu,
dut se alle Leid doann sage.

Doann dunn mer feiern, Audo kaufe,
wonn ich hon meu Geld im sack,
kommt Brüder losst uns noch on saufe,
unn später kam der große schlag,
fast nix hods gewe, des war schoad,
es hod grod geloangt fer e Reserveroad.

+++

Sache bassier´n wonn die Bauern so flitze,
drum sog ich immer, nemmt eisch Zeit,
dut doch oner die Kerschgass spritze,
wo kon Dreck war weit unn breit.

De Onner lehnt sich beim Nochber e Roll,
er segt, ich krieg meu Korn gemäht,
ich glab der Kerl, der war noch voll,
of em Homweg, hod er's glei gesät,
die Roll war voll, er hat veel droff,
unn im Ort ging em donn die Rückwond off.

+++

Zum Ponyhof offs Reitturnier,
dut sich onner off seu Fahrroad schwinge,
dort dringe mer noch e paar Gläser Bier,
unn seje noch es letzte Springe.

Besser schlescht gefahr´n wie gut gelaufe,
de Himmel war blau, es Werrer schee,
Freibier gibt´s donn noch zu saufe
unn Eudritt bezehlt er ach net me.

Homgefahr´n so voll wie en Russ,
jedem Boam gibt er en Kuss,
die Backe verkratzt, es Hern offgeresse,
do honn sen glei ins Audo geschmesse.

Ins Krongehaus gefahr´n, er dut nix soche,
denn es konn hald net jeder Freibier veredroche
und die Musik speelt, ich sog jetzt Prost,
am liebste saufe mer, wonns nix kost.

Kapelle: Ja wenn das so ist, dann Prost
(Mer saufe gern wonns nix kost)


Ja mit uns Bauern machse woas se wolle,
mer moant groad, die den iwwerhaapt net denke,
mer ernähr´n se doch von unserne Scholle,
unn kenne net alles groad verschenke.

Die Spaschel war´n schlecht, es Hei war nass,
es Korn gewochde unn die Kartoffel leije off de Gass,
do brauch mer sich nett zu wunnern, wenn se de Mut verlier´n,
un hern off bevor se gonz krebbier´n.

De Betrieb werd verpacht, gonz off die Schnelle,
er schafft jetzt in Darmstadt bei de Quelle,
de Onner spekulierd unn hod ach Glick,
bei de Gemeindesitzung erklär´n sen fer verrickt,
de Boijemoster werd als Grundsticksmakler hegestellt,
so Sache gibt´s auf dere Welt.

+++

Es seun bassiert noch monche Bosse,
hod sich w Fraa im Abee eugeschlosse,
drei Stunn long saß se in dem Gestoank,
donn hon se se erausgelosse, Gott sei Doank.

Dinger gibt´s die gibt´s net mee,
statt e Maschin zu holle, fährd der Kerl oa hee,
du best verrickt, hot de alde gegresche,
desd du der mol die Schlappohr´n wesche,
ja mit de junge Leid hod mer seu Seuje,
die wird wirrer homgefahr´n, die onner helsde Meuje.

+++

Heiern heid, des es e Word,
der Bräudigam grinzt unn dut noch lache,
mer drehe noch e Rund im Ort,
denn ohne uns kenne se doch nix mache.

De Parre dut off de Koanzel schwitze,
die Modder denkt, seun die donn bled,
die Leit unruhisch off de Benk do sitze,
e gonz verdel Stunn kame se zu sped.

+++

So jetzt noch e paar Worde zu de Politik,
des es net me schee er leiwe Leit,
die gonz Welt es wie verrickt,
es muß sich ännern, es werd hechste Zeit.

Die EWG es fast bankrott,
des es ko wunner bei dere Leitung,
mer Deitsche derfe alles bezoahle,
herns jeden Doag im Fernseh unn leses in de Zeitung.

Jetzt war de Honnegger wirrer do,
em Kohl werd schee de Schädel brumme,
in de Politik do esses hald so,
ich mescht net wisse, wos er alles hod mitgenumme.

Im Golf do kracht´s, do wern Mine gelegt,
der o hod de Schade, der onner de Sieg,
do werd grod so e Schiff eweggefegt,
mer wolle alles blos koan Krieg.

Liewer es bisje wenischer Geld,
weil en Krieg des es sehr deier,
es gibt nix schenneres, wie e friedlisch Geld,
unn noch dausend Joahr Kerwefeier.

+++

So, des esses, hoffendlich war´s ach schee,
alles konnt ich net berichte,
ehrlich gesoat, ich konn net mee,
des geb ich auch zu e long Geschichte.

Trotzdem hed ich noch ne große Bitte,
feiert mit uns bis iwwermeuje,
denn des es in Biddelborn so Sitte,
iwwer die Kerb vergesse mer die Seuje.

Bevor ich jetzt noch emol trinke,
dunn ich meune Musik winke,
unn die speelt of Deifel und Verderb,
des schene Lied, vonn de BIDDELBERNER KERB !!!

Kapelle: Kerwemarsch

  • Aus der Feder von
    Phillip Göbel
  • Kerwevadder
    Volker Best
  • Beivädder
    unbekannt
  • Kerwewatz
    unbekannt
  • Schmuddels
    unbekannt