Kerwespruch 2004

Die Sunn scheunt wie im Bilderbuch,
koan Räje hier die Stimmung trübt,
Bier unn Woi henn mir genuch
unn es Singe henn mer aach geübt

Drum heiß ich Euch hier all Willkomme,
bei uns im scheene Biddelborn,
ich hoff, Ihr habt Euch frei genomme,
denn unser Kerb is schon enorm.

Mer Kerweborsch, mer grüße Euch,
Die kloane Leit unn aach die Große.
Die mit dinne und die mit dicke Bäuch,
unn die, mim große Hinnern in de Hose.

Ob braade Schultern, ob daabe Ohrn,
die Kerl mi'm große Zinke,
die mit veel und die mit wenisch Hoorn,
all dene, tu ich hier jetzt winke.

En besondre Gruß gilt hier drei Herrn,
die seun seit zäje Johr bei uns debei,
aus dene koann jetzt woas Gescheites wer'n,
denn die Kerweborschzeit is fer die vorbei.

Unser Schmuddels die seun groad so froh,
wie hier meu goanze Kerweborsch,
daß unser Kerb is wirrer do,
drum mache mir jetzt drei Doach dorsch!

Doch wär's nach em Kerwevadder vun vorsjohr gange,
deede mir mit de Kerb erst neegst Woch oofange.
Denn dieser Kerl hat doch echt gedenkt,
daß unser Fest oacht Doach speeder oofängt.

Hat fer Kerwemontag e Sitzung klar gemacht,
Drum wird der Maler jetzt ausgelacht.
Mer gugge moije owend bei de Linde mol neu,
vielleicht hockt er Punkt acht in de Wertschaft dreu.

So Ihr Leit, des war's gewese,
der Vorspann is jetzt vorgelese.
Ich brauch mol schnell en Schoppe Woi,
Der kimmt jetzt in meu Kehl eneu.

Drum nemmt Euer Glas, stoßt mit mir oo,
unser goldisch Kerb is wirrer do.
Und die Musik läßt e laut erklinge -
mir wolle unser Hymne singe!

Lied: Kerwemarsch

+++

En scheene Klopper werd nun vorgelese,
der letzt Johr an Kerb war gewese.
E paar Kerweborsch vun uns Blaue,
wollte Samsdoachs mol ins Volkshaus neuschaue

Sie wollte mol gugge, owends um acht,
wie die oanner Fraktion des Eulaafe macht.
So stande se im Foyer erum,
tranke e Bier unn guckte dumm.

De Volkshaustrupp hat draus gestoanne,
unn is de Ablauf noch mol dorchgegoange.
Do kimmt en Musiker vun de Bühn gerennt,
des war oaner, der uns halt net kennt.

"Wann geht's dann los", hat er gefreegt,
un oaner vun uns Blaue seegt:
"Ei jetzt, sofort, mer laafe eu,
des Volkshaus, des soll unser seu!"

Es ging doann los, es war en Spaß -
im Volkhaus, leeft de Kerwemarsch.
Unn eugelaafe, mit frohem Mut
seun siwwe Blaue, sogar oaner mit Hut!

Die Leit im Saal henn nix kapiert,
was im Volkshaus grad passiert -
awwer schee henn die des schun gefunne,
denn endlich wurd dort mol gescheit gesunge.

+++

Weils Vorsjohr so en haaße Summer war,
kimmt dies Johr en Pool in de Gaade, des is doch klar.
Unn so hat en Mann aus em Gewerbegebiet,
sich schnell um e groß Basseng bemüht.

Der Pool muss sich erst der Umgebung anpassen,
drum darf man noch kein Wasser einlassen!
Mer sollt oa Woche waade, so steht es geschriwwe,
des scheunt awwer ganz schee iwwertriwwe!

Papperlapapp, er tut doch so schwitze,
drum nimmt er de Schlauch unn fängt oo zu spritze.
Die Luftblos do unne, die is wohl net schlimm -
er will nur noch bade, samt seune Kinn'.

Des Becke war voll, woas is des so schee
unn er will sofort ins Wasser geh.
Er steigt hoch die Lader, bis nuff oan de Rand -
bereit zum Sprung, er oben stand.

Er setzt oo zum Köpper, tut noch mol schnuppern,
als irgendwoas anfängt, goanz kräftig zu blubbern.
Doann hat sich ganz plötzlich die Luftblos gesenkt,
unn mit nem riese Schloag des Schwimmbad gesprengt.

Es gab e Flutwell', ohne Spaß,
unn alle warn se klitschenaß.
Unn im Gewerbegebiet, woas isses schee,
gibt's seit do en Boadesee.

+++

Wenn Leit bei uns am Häusle schaffe,
gibt's fast immer woas zu lache.
So wollt en Mann, ohne viel Mühe,
e Kabel durch die Decke ziehe.

De Bauplan wurd noch schnell studiert,
damit er beim Bohrn net de Überblick verliert.
Dann setzt er schun de Bohrer o',
unn macht sich oan die Ärwet dro.

Gebohrt hat er des Loch aach glei
Unn rifft sofort seun Junior bei.
Er sollt mol gucke, in de Wohnstubb drunne,
ob des Loch ach ogekumme.

"Ei Vadder do is nix, ich hab's erkannt,
des Loch is bestimmt mitte in de Wand".
"Ei Mist", seegt er, und setzt sodann,
sein Bohrer halt noch einmal an.

Doch auch diesmal, das ist sonnenklar,
schon wieder kein Loch zu sehen war.
So ging es weiter, noch und nöcher,
in de Deck war'n schun en Haufe Löcher!

Er hat gezweifelt an seum Verstoand,
haacht mi'm Kopp schun an die Wand.
Denn es wollt ihm net gelinge,
in die Wohnstubb euzudringe.

Bis plötzlich die Modder aus de Schlofstubb schreit,
die groad mol fer ihr Schönheit leit.
"Ei Moann, Du Ochs, Du goanzer Schlimmer,
Du bohrst Dein Loch ins falsche Zimmer!"

Unn wärklich war des so gewese,
er hat seun Plan wohl falschherum geläse.
Denn die Zimmer unne war'n oannersd gebaut
unn die Schlofstubb war total versaut.

Es neegste Mol werd ich's selwer mache,
donn tut Ihr net iwwer meun Vadder lache.
Unn fer meun Vadder, dieser Schlaue
Singe mir "Schaffe, schaffe, Häusle baue"

Lied: Schaffe, schaffe, Häusle baue

+++

Woas ich Eich nun jetzt hier bericht,
des is wärklich e doll Geschicht.
Es geht um die Liebe, es is soo schee -
doch manchmal tut die ganz schön weh.

Es war im Friehjohr zwootausendvier
als en junge Mann, noch vier, fünf Bier,
ein Mädchen sieht, so hübsch und fein,
so schön kann nur ein Engel sein.

Sie henn geflirtet die ganze Nacht,
henn e Flasch Champus weggemacht,
es wurd gekuschelt wie verrickt -
goanz klar, des war Liebe off de erste Blick.

Er mißt doann hoam, seegt er zu Ihr,
doch morgen früh, so glaube mir -
komm ich zurück mein Engelein,
dann werd ich wieder bei Dir sein.

Wie er doann so seun Hoamweg nimmt,
ihm plötzlich ein Gedanke kimmt.
Des Mädsche is ja so ne tolle,
dere kennt ich die Sterne vum Himmel holle.

Doch der Himmel ist so weit und fern,
drum tut's auch ein Mercedes-Stern.
Er hat aach glei en Benz gefunne,
unn den Stern defo in Besitz genumme.

Oam nächste Mojend, wie versproche,
kam er zu dem Mädel angekroche.
Als Zeichen der Liebe - er hätt sie doch gern
überreicht er Ihr stolz den Mercedes-Stern.

Er schließt dann die Augen, erwartet 'nen Kuß,
doch jetzt kimmt des, was komme muß.
Sie hält korz aus, unn haacht em of de Backe -
do blinkt jetzt en große, blaue Blacke.

Er wär doch en schlächte, goanz schäbische Hund
Unn er steht nur do, mit offenem Mund.
Sie hat ihm deutlich die Levite gelese -
denn der Mercedes - war vun ihr gewese.

+++

En Moann, der rief die Feierwehr,
Ehr liewe Leit, kummt schnell mol her,
meun Feuerlöscher is schun alt,
jetzt guck mol nach und prüft den halt.

Es dauert net loang, do war'n se schun do,
unn guckte sich des Ding mol o'.
Der müßt iwwerholt wer'n, hieß es kurz und knapp
unn koste deed des rund 80 Mack.

80 Mack sinn fer en Rentner veel Geld,
drum hofft er, daß der Feuerlöscher noch e paar Johr hält.
Die Feierwehr hot er glei hoam geschickt,
unn sich doann in seu Stubb verdrückt.

Oa Woch speeder, es war noch frieh am Doach,
tut's in de Garaasch, en riese Schloach.
Er denkt, oh Gott, die Russe kumme,
rennt enunner, un hoat's Chaos vorgefunne!

In de Garaasch, im Auto, sogar im Gaade,
in alle Ritze, in de schmoale unn de braade,
war alles weiß, mit Pulverschnee
der Ooblick, war iwwerhabt net schee.

Woas war passiert, woas war gewese?
Der Grund hierfür is schnell gelese.
E rostig Schräubche hat wohl kurz gekracht,
und der Feuerlöscher sich selbständig gemacht.

Der Schaden hier war riesengroß,
und dazu zu allem Überfluß,
gibt's für den Geizhals nun die größte Strafe:
Denn er muß en neije Feuerlöscher kaafe.

Meu Gläsje Weu is schun wirrer leer,
bringt mir schnell e neijes her,
Unn die Musik spielt für unsern Held,
Des scheene Lied vum veele Geld.

Lied: Wer soll das bezahlen

+++

Ein Landwirt hatte ein Problem,
er hat dehoam koa Kipproll stehn.
Drum musste eine andre her,
die zu finne, war net schwer.

Oam Sportplatz do hinne, beim Turnverein
Do steh'n immer Rolle, do werd aach so e Kippding sein.
So war es auch, ihr Leut, des stimmt,
er sich vun dort die Kipproll nimmt.

Er macht sich uff seun Acker naus
Und robbt soglei die Riewe raus.
Owends war der Hänger voll,
fuffzeh Tonne warn jetzt uff de Roll.

Jetzt nix wie hoam, unn noch vorm boade,
will er die Riewe schnell oabloade.
Mit der Kipproll sei des schnell gemacht,
vielleicht fünf Minute - es wär jo gelacht.

Doch die Überraschung kam sogleich,
er wurde im Gesicht ganz bleich -
als er so vor der Rolle steht,
unn merkt, daß des "Hochmachding" net geht.

Er Flucht doann rum als wie en Russ,
dass ihm des groad bassiere muß
Unn er musst seu fuffzeh Tonne Riewe,
vun Hoand, mit de Schipp erunner hiewe.

Vielleicht sollt er es nächste Mol,
wenn er sich nimmt vum oannern e Roll
Fräje, ob des Ding ach geht -
damit er net im Spruch drin steht

+++

Jetzt werd von hier mol korz bericht,
wie sich oaner die Schulter bricht.
En Junggeselle aus Biddelborn,
is mitte in de Noacht mol wach geworn.

Die Bierscher vum owend, die henn schwer geschafft,
drum hat er sich halt uffgerafft.
Er reibt sich noch die matzelische Aache
um dann die Schoppe uff de Klo zu traache,

Er schwingt sich aus em Bett, mit nem riese Satz,
fällt iwwers Noachtschränckche, voll uff die Fratz.
E Bild fer die Götter, doch es war net genuch,
denn er erleidet `nen Schulterbruch.

Doch oans tu ich jo iwwerhabt net versteh,
wo hat der Kerl doann seu Noachtschränkche steh?
Doch bevor er sich jetzt es Boa aach noch bricht,
kumm ich glei zur nächst Geschicht!

+++

Bei moanche Leit in Biddelborn,
is bei Räje schun de Keller naß geworn.
So aach dies Johr, in dem feuchte Summer,
mit veel Hagel, Blitz unn Dunner.

Es hat geschütt, als würd die Sintflut glei kumme,
drum hat oaner seun Keller in Augenschein genumme.
Doch alles war trocke, vun Wasser nix zu säje,
endlich hat er mol Glück, bei nem große Räje.

Wie er sich noch fraat, des war halt so,
mußt er mol dringend off de Klo.
Unn er weil er so arg dringend muß,
will er off de Dippe im Unnergeschoß.

Doch die Tür war zu, sie ging net uff -
hockt seun Sohn do off de Schüssel druff?
Du Vogel, mach uff, ich muß uff de Dippe -
mach hie, mach schnell, es tut schun dricke.

Doch koaner macht auf - koaner öffnet die Tür -
is do vielleicht gar niemand hier?
Da wohl offensichtlich die Türe klemmt,
hat er sich voll degäje gestemmt.

Ein fester Stoß - die Tür geht auf,
da nahm das Unglück seinen Lauf.
Was jetzt kam, das hätte er nie gedenkt
denn das Wasser hat sich durch de Klo gedrängt.

E Fontän kam über ihn hergeschosse,
hat ihn vun ouwe bis unne begosse.
Unn de Keller war jetzt endlich voll -
mit Hochwasser, woas war des doll!

Doch Wasser will ich jetzt net genieße
will meun Dorscht mit Woi begieße.
Unn Ihr, ihr stimmt mit mir jetzt eu,
des Lied vom Wasser, und dem goldene Woi.

Lied: Wenn das Wasser vom Rhein goldner Wein wär...

+++

Doch aach vun unsrer Truppe will ich berichte,
insgesamt drei kloane Geschichte.
Vorsjohr beim Beemstelle, do wollt's oaner wisse,
unn hat unbedingt mol Trekker fahrn misse.

Normalerweise fährt er mim Opel umher,
unn Traktor fahrn, is bestimmt aach net so schwer.
Mer henn noch geruffe, mach's besser net,
doch do fährt er schun los, unn will um die Eck.

Er is net weit kumme, hunnert Meeder wohl blos,
denn links und rechts stande die Autos uff de Stroß.
Er wollt se umkurve, ganz elegant,
do war er aach schun degäje gerannt.

Er denkt, woas is doann jetzt passiert,
unn bis er endlich hat kapiert,
daß des Ding aach Bremse hat,
war'n drei Autos längst schun platt.

+++

Die neegst Geschicht werd jetzt verlese,
drei Kerweborsch war'n off em Festival gewese.
In Rothenburg, weit weg von hier,
gab's Musik, Mädscher, Worscht unn Bier.

Doch sie war'n koa drei Minute doo,
do fing der Schlamassel aach schun o.
De Kofferraum off, die Zelte enaus,
de Kofferraum zu - aus die Maus!

Woas war geschäje, ich soachs Eich all
Des is jetzt hier en spezielle Fall
Denn eugesperrt im Autoheck,
lag de Schlüssel, der war jetzt weg!

Weit fort dehoam in Büttelborn,
ist dann ogeruffe wor'n,
De Vadder musst kumme, um die Jungs zu rette,
Dene bassiert des net meh', jede Wette!

+++

Vorsjohr Kerwefreitag war es gewese,
wurd hier in de Kron, de Spruch vorgelese.
Unn Kerwefreitag, des war's jeder vun dene Herrn'n
Derf de Kerwemarsch noch net gesunge wer'n!

Doch alles war still, unn de Beivadder stimmts o'
"Die Biddelberner Kerb is wirrer do".
Mit em hochrote Kopp hat er's glei gemerkt,
dass des goanz schee deier werd!

Die Kron hat gelacht, de Saal hat getobt,
doch fer seu Solo wird er jetzt gelobt.
Und zwar mit oam vun de schennste Lieder,
Kerweborsch seun lustsche Brüder.

Lied: Kerweborsch seun lustsche Brüder

+++

Vun rer Damen-Truppe wird jetzt hier gelese,
die war'n schun jed' Johr im Spruch drin gewese.
Die Gymnastikfraue wollte wirrer mol weg,
nach Bad Kreuznach, des is jo fast um die Eck.

Moijends frieh, do startet die Tour,
und eine fehlt zur Abfahrt nur.
Sie wollt mim Auto speeder kumme,
hat sich moijends noch was anneres vorgenumme.

Doch Middoachs war se noch net do,
do ruffe se mol auf dem Handy o'.
Wo bleibste doann, wo machsten rum,
mir warte hier seit vier, fünf Stunn.

Sie wär baal do, sie käme glei,
oan Kaiserlautern sei se schun vorbei.
Sie henn sie doann mol uffgeklärt,
daß sie seit Stunne in die falsche Richtung fährt.

+++

Im Friehjoahr wird draus geschafft wie doll,
unn is doann mol die Mülltonn voll,
fährt mer des Laub vum Gaade doann,
uff die Müllkaut draus, in Biddelborn.

So wollt des kürzlich aach oaner mache,
zum Glück, sunst hätte mer nix zu lache.
Basst uff, Ehr Leit, des is werklich schee,
Seu Auto hat er in de Garaasch drin steh.

De Auto wurde voll belade,
mim Griezeig aus em Gaade.
De Kofferraum uff, unn alles eneu,
der Gaade, der muß sauber seu!

Er will holle noch de letzte Rest,
alle oannre tritt sich fest.
Unn als er sich noch unne bickt,
merkt er, dass in de Hos was drickt.

Des war de Schalter, des is wohr
fers vollautomatische Garagedoor.
Es senkt sich langsam stets nach unne,
da hat er awwer die Boa in die Händ' genumme.

Und er sieht, als er zum Auto eilt,
wie sich des Tor mi'm Kofferraum verkeilt.
Es hat gekracht und dann verschwand,
das Auto wie von Zauberhand.

Er hoat gezoue, getrete unn gerittelt,
hoat wie verrickt oam Door geschittelt.
Doch es war zu spät, es ging nix meh -
es Auto war drin, unn er tut drause steh.


Doann fing er o zu schnaufe schwer,
denn ihm fiel ein - die Garaasch hat koa Deer!
Er hat e Problem, des war ihm klar,
des net so leicht zu löse war.

Um an sein Auto dran zukomme,
hat er die letzte Möglichkeit genomme.
Unn hot, ehr Leit, es is net gelouwe -
die Gloasbaustoa aus de Wand geschlouwe

+++

Vorsjohr oam Kerwemoandach, es war rischdisch doll,
die Jungs vun de Feierwehr war goanz schee voll!
Die henn die Kerb gefeiert, riesisch groß -
bis plötzlich die Sireen geht los!

Jetzt awwer schnell, mer kumme glei,
"Wert, bring noch fünf Bier vorbei".
De letzte Schobbe in de Hals geschitt,
doann ging es los, mit schnellem Schritt!

Sie warn oam Gerätehaus baal oogekumme,
ohne Verletzte - awwer ziemlich benumme.
Die Unniform wurd angescherrt,
do kam de Kommandant und hat se ogeblärrt.

Ihr seid so voll, woas solle die Bosse,
eich koann mer doch net lösche losse!
Ehr kotzt mer noch die Autos voll,
macht Eich fort - ehr seid jo doll.

E paar oannern warn zum Glück noch fit,
machte die Awweit fer unser Jungs mit.
Und die dachte sich, was macht des schon -
do lösche mer halt de Dorscht - in de Kron.

Doch mer wolle net iwwer die Feierwehr schelle
denn wenn's brennt sinn se immer zur Stelle.
Unn die Musik speelt - des is doch klar
Hier kommt die Feuerwehr - Tatü Tata!

Lied: Hier kommt die Feuerwehr

+++

Katze gibt's, mit asch veel Hoorn -
die seun fer's Kühle nur gebor'n.
Denn im Summer bei recht großer Hitze.
dunn die Viecher goanz schee schwitze.

Unn letztens war's, bei värzisch groad,
do hat de Vadder mol gesoat,
"Ei Kind, hör zu, ich muß mol fort"
Eukaafe wollt er, hier im Ort!

Und seegt zu ihr, jetzt pass gut auf!
Bei däre Hitz, derf die Katz net naus!
Die is hochsensibel und edel-fein -
die darf nur in der Wohnung sein!

Da hat die Tochter mitgedacht,
unn alle Deern schnell zugemacht.
Doch dass die Katz war ausgesperrt,
hat die Tochter net gemerkt!

Des Vieh saß draus uff de Terass'
Es gab koan Schatte - ohne Spaß!
Des Tier fängt o' zu schwitze schnell -
batschnaß war des Angora-Fell!

Die Katz die war schon kochend heiß,
hat verlorn zwaa Lidder schweiß
Des einstige Fell - so hold und schön,
hoat wie es Fußmatt ausgesehn

Sie schnauft, als wie e Wahlrosskuh,
macht sich bereit zur letzten Ruh' -
doch sie wurd am Ende noch entdeckt -
des arme Tier wär fast verreckt!

Und die Moral von der Geschicht:

Bei värzisch groad unn Sunneseit,
e Katz goanz schnell im Koma leit!

+++

Es gibt e Schul bei uns im Ort,
die meiste von uns warn aach schun dort.
Damit die Kinner net wer'n bleed,
lerne se in de erst Klass es Alphabet.

De Unnerricht hat statt gefunne,
der Buchstabe "P" wurd dorchgenumme.
Unn vun hinne rifft de Fridolin,
er seegt dann "'P', wie Pinguin".

Es Fritzje rift "Frau Lehrerin,
ich hoab dehoam en Kinnerfilm!
Mi'm Pinguin als Zeichentrick,
den bring ich moije hierher mit."

Und diese spricht "Ich fraan mich so,
denn moije, Kinners, gucke mer Video."
Mittags geht der Fritz nach Haus
und sucht sofort den Film heraus.

Do hinne im Schrank, do misst er seu,
unn steckt aach schun seu Hand eneu.
Er kann den Film aach schnell erhasche,
und steckt ihn in die Ranzentasche.

Oam nächste moijend in de Schul',
gibt es Fritzche mächtig cool,
De Lehrerin des Videoband,
unn die Kinner sinn schun all gespannt.

"Loaßt Eich vun mir net irritieren,
ich muß e Klasseawweit korrigieren,
Ihr kennt den Film alloa ruhig gucke -
ich dun mich oan meun Pult hier hocke.

Alle sinn se still und leise,
die Lehrerin dut in en Appel beiße.
Der Film der leeft, woas is se froh,
unn macht sich oan ihr Ärwet dro.

Sie guckt doann hoch und denkt sich bloß,
warum seun die Aache vun de Kinner doann so groß?
Unn iwwerhaabt, woas seun des fer Geräusche?
Des hört sich o' wie Rinderseuche.

Alles war schon viel zu spät,
als sie sich dann zum Fernseh dreht.
Die Sache die war ziemlich schlimm -
denn es lief ein Pornofilm.

Do hat es Fritzche aus Versäje,
den Film der näwe dro geläje,
mit Mädscher, die war'n goanz schee nackt,
in seun Ranze eneu gepackt.

Seun Vadder war do gar net froh,
doch mach der nix draus, des is halt so.
Auch mir lasse uns defo net störn -
un Ihr dürft des Lied vum Pinguin jetzt hörn.

Lied: Ein kleiner Pinguin

+++

Fer heit wärs des emol gewese,
ich hoab jetzt aach genuch gelese.
Ich hoff, es hoat Eich Spaß gemacht,
unn hoabt aach als emol gelacht.

Unn fühlt Eich net uff die Fieß getrete,
wenn Ihr wart hier im Spruch vertrete.
Nemmt's locker, Leut, denn oans is klor -
Kerb - is oamol nur im Johr!

Bedanke wollt ich mich noch schnell,
bei unsrer tolle Blaskappell,
uff die mer immer zähle koann -
net nur oan Kerb seun die ganz weit vorn!

Unn wenn vun Auswärts Eich mol oaner freegt,
woann bei uns die Kerb losgeht,
dann sagt ihm, eins ist ganz gewiß -
Kerb is, wenn hier Grobmüll is!

Ich hoff, Ihr kummt heit owend all,
zu unserm schöne Kerweball,
um paar scheene Runde im Saal zu drehe,
un oannern Leit in de Sektbar zu säje.

Seid net mied, bleibt net dehaam,
do deet ich mich ganz furchtbar fraan.
Unn ich soach Eich oans, des is doch klar,
die Kerb bei uns ist wunderbar!

Ich wer'n des Fest jetzt schee genieße,
mi'm gute Tropfe dies begieße:
Hoch die Liebe, hoch der Wein,
die Biddelberner Kerb soll unser sein!

Ehr Musiker, macht Eich schnell bereit,
De Kerwemarsch - fer Eich Ihr Leit!

Lied: Kerwemarsch

  • Aus der Feder von
    Mirko Bott
  • Kerwevadder
    Sebastian Köhler
  • Beivädder
    Stefan Wüstling, Martin Scheuermann
  • Kerwewatz
    Christian Flick
  • Schmuddels
    Robert Hög, Bernd Scheuermann, Jan Kullmann