Kerwespruch 2024

Gemoije, Servus unn nadierlisch Gude,
halt jetzt all mol eier Schnude.
Damit ehr heert, woas ich eisch soach,
seid schee still unn macht koan Krach.

Mer feiern Geburtstag unn zwar groß,
75 Joahr Kerb in de Tornhall, des is famos.
Jubiläumsvadder klingt aa ganz nett,
Heit kimmt koaner, frieh ins Bett.

Ich hock heit do, mit Scherp unn Hut,
hoffentlich heert ehr mich all gut.
Jetzt lauscht ehr all mol moiner Stimm,
ich sach eisch jetzt erst, wer ich bin.

Bei de Handballer vun unserm TV,
do kennt mer mich, ziemlich genau.
Diesjoar in de Zwott gewinn ich koan Preis
Vorname Julian, Nachname Raiß

Guggt eisch mol um, woas is des schee,
woann do so veel Altkerwevädder steh.
Bändscher iwwerall unn alles blau-weiß,
Unser Kerb – de geilste Scheiß.

Guggt se eisch oo, moi Jubiläumsborsch,
Prachtexemplare, dorsch unn dorscht.
Ich kennt heit glücklicher net soi,
Kerb in de Tornhall, des is oafach feu.

E Gefühl, als wär mer frisch verknallt,
Jetzt singt mit mer, dass nur so schallt.
Jeder weiß, was jetzt geschieht,
Die Musigg spielt das Kerwelied.

(Lied: Kerwemarsch / Mer Biddelberner Kerweborsch)

+++

En Mädelstrupp, do ausm Ort,
die wolle endlich, aa mol fort.
Frieher hoannse zamme Handball gespeelt,
heit werd nur noch, devo verzeehlt.

Sie froochte sich, wo macher mer hie?
Da fehlt die Antwort, irgendwie.
Sie wolle weider fort, unn zwar net nach Sylt,
es Ziel heißt Malle unn do werd net gechillt.

In de Fliescher gehockt unn uffm Sitz rumgeriggt
Unn glei Prosecco, in de Hals neugedriggt.
Dort ookumme hoannse glei die Idee,
mer speele woas, des wird so schee.

Wer am Boand, als letzt de Koffer kriegt,
Kriegt die erst Rund uffgedriggt.
De erste Doach, all motiviert unn fit,
Zogen se noch alle mit.

Schnell ab ins Hotel unn uff die Zimmer,
Treffpunkt Hotelbar, so wie immer.
Do seegt die oa noch zu de oanner,
ich zeisch dir moi Kleid, des is de Hammer.

Glaabt mers, des koann koaner toppe,
mer versucht de Koffer uffzuroppe.
Mit aller Kraft, degeije gestemmt,
Glaabstes doann, de Reißverschluss klemmt.

Sie ziehe unn zwickern runner unn ruff.
Doch des Scheißding geht net uff.
Rezeption oogerufe, mann-o-mann,
ob hier mol oaner helfe koann?

De Page hoggt sich uff de Koffer druff,
unn kriegt mim Kuhfuß des Ding uff.
De Koffer offenbart doann uffm Bett,
Männerkleidung, schwer adrett.

Glaabstes, dass ich deppert bin?
In dem Koffer soin nur Oozüsch drin.
Ehr Leit, denkt nochmol oan des Spiel.
Beim Kofferroulette, wollt oa bissje viel.

Sie wollt net verliern unn ihr Brill war kabutt
orrer hoattse oafach net rischdisch geguggt?
De falsche Koffer hoattse mitgenumme,
unn is direkt vom Boand verschwunne.

Ehr kennt mers glaawe, ehr liewe Leit
De Kerl trägt jetzt ihr Summerkleid.
Woann de halt so korzsichtisch bist,
hoatts halt aa mol dich erwischt.

+++

Summer, Summer du bist so schee,
woann mer hier leijt am Leehmer See,
Doch net nur do hoatt mer soin Spaß
Im Ried gibt’s noch wo oannerst woas.

De Äpplergaade, Gemarkung zu Trewwer,
do macht mer gern hie, bei gudem Wedder.
Aus Biddelborn paar scheene Borsch,
fuhrn los mim Rädsche unn mit Dorscht.

Am erste Mai bei Sunneschoi,
soll Äbbelwoi in de Hals eneu.
Unn wie mer die junge Buwe kennt,
hoannse wirrer, oaner gebrennt.

Dunkel werds, die Aache werrn klinner,
sie falle schun rum, wie kloane Kinner.
De oa will hoam, unn dut als motze,
de oanner hängt do unn is am kotze.

+++

Normal hoamfahrn geht net, des misster verstehn,
im Suff kumme ihne, die beste Ideen.
De oane seegt, er is so voll
unn bei dem Wedder, schwitzt mer doll.

Ajo, es is halt veel zu warm,
am beste det mer naggisch fahrn.
Ich soachs eisch, es is net geloue,
er hoat dann oafach blank gezoue.

So fährt er uff soim Riemerad,
vum Sattel werrd soin Rieme hart.
Naggisch dorsch Waller, mit de Buwe,
winkter de Leit unn seegt, Ei Gude.

Korz hinnerm Ortsschild, sie wärn glei dehoam,
is de Nacktborsch em oannern, ins Rädsche gefahrn.
Der wurd bitterbees iwwern Lenker geschmisse,
ehr kennt mers glaawe, des war schee beschisse.

Die Schulder wurd glei dick unn fett,
Schlisseboabruch, des isses net.
So war de Spaß doann goanz schnell rum,
Sie wähle de Notruf, sie soin ja net dumm.

Alkohol unn Radfahrrad, is oafach bleed.
Mer sollt nur fahrn, woanns werklisch noch geht.
Die Geschischd, die war net werklisch foi,
Mundschenk, geb mer schnell moin Woi.

+++

Spaschelkerb in diesem Joahr,
war so schee, wies immer woar.
En scheene Sunndoach wars gewäse,
de Spaschelspruch wurd aa verläse.

Die Kapell hat gespeelt, de Landrat war do
unn es war en scheene Duft uffm Klo.
Die Borsch hoann getrunge, die Mädscher aa,
ehr kennt mers glaawe, wunnerbar.

Wie des so is, woann die Borsch frieh tringe
Oowends werd aus laafe, hinge.
3-4 Moann, die hoann sich gedacht,
mer mache noch oaner, es wär jo gelacht.

Schee beim Bauer in de Meenzer Strooß,
in die Scheier gehoggt, ehr Männer Prost.
Eiskalt Bier unn Abbelhut,
des weckt bei moanche, Übermut.

So hoatt oaner vun dene Genosse,
erzählt soi allergrößte Bosse.
Er koann jo alles, is super originell,
Aa Schlepperfahrn koann er, unn des schnell.

„Im Läwe fährst du koan Schlepper net,
ich glaab, du musst baal mol ins Bett.“
„Ehr glaabt mers net, ich zeigs eisch jetzt,
wie ich mim Schlepper, dorsch die Scheier fetz.“

Do hoatt sich unsern Mitteljunge,
Engeltsgleich uff de Bock geschwunge.
Koaner hält en ab devo,
eher feuern sen noch oo.

Unsern Bleedmoannsgehilfe, fährt glei los
Schläschd siehts net aus, er schlägt sich famos.
„So ehr Leit, ich hoabs jo gesacht
Doass ich des koann, woann ich des mach.“

Ich park de Schlepper jetzt vorne vorm Door
Akurat groad, wie nie zuvor.
Korz vorm Zaun, wer koann sichs denke,
hoat unsern Kerl, vergesse zu lenke.

Es dut en Schloag, unn unsern Clown,
fährt mim Schlepper in Nachbars Zaun.
Korz uff den Knall, heert mers schun kreische
„Woas is doann los, woas soll die scheiße?“

De Noachbar der stand unner Schock,
er hoatt direkt, oam Zaun gehockt.
Zum Gligg is beinah nix bassiert,
nur de Zaun war demoliert.

Unsern Kerl der hoat sich schee blamiert
unn hoffentlich, hat ers kapiert.
Drum soach ichs eisch, horscht mer gut zu.
Woann ihr sauft, lasst alles mit Modor in Ruh.

Mer singe jetzt fer die Leit unn fer unsern Peeder.
des bekoannte Lied: Schlepperfahrn kann jeder.

(Lied: Schlepper fahrn kann jeder, außer unsern Grillvertreter)

+++

Jobs gibt’s bei uns wie Soand oam Meer,
moanche leicht unn moanche schwer.
Die meiste vun eisch, werrns jo kenne,
mer muss moijends, uff die Erwet renne.

Doch in oam Vereun, do gehts hoch her.
Ich schwätz, vun unsre Bundeswehr.
Moijends um 4 werste geweckt
unn verbringst doi Zeit im Dreck.

Oan oam Doach, hawwes ses rischdisch gekriegt,
mer hoattse uff Manöver geschickt.
De ganze Doach drauße, medde im Wald,
es hoatt geschdisch gereijent unn war bitterkalt.

Ich koann eisch soache, des war net doll,
unsern Kerl hoatt schnell, die Schnauze voll.
Zwoo Doach speerer, woar endlich Schluss,
auf gehts hoam, mer laafe zum Bus.

Bis in die Kasern, isses e Stigg,
sie alle wollte, schnell zurigg.
Schee uffwärme und Bierche trinke,
unn dusche, weil se gaschdisch stinke.

Unsern Hauptmann, geht voran,
weil er des oam beste koann.
Busschlissel raus unn neugesteckt,
rumgedreht unn glei gecheckt.

Fuck de Modor macht koan Laut,
gugg wie de Kerl, aus de Wäsche schaut.
Woas is do los, woas werd des soi?
Mer gugge mol, in de Modor neu.

Drei Stunn hoatter rumgemacht,
doch des hoat alles nix gebracht.
Druff geschisse, net loang rumgepienzt,
Mer rufe de Bundeswehrpannedienst.

Bis der kimmt, isses net mehr hell,
de ADAC vum Bund, is net so schnell.
Paar Stunn speerer, isser doann do,
woas is doann oan der Kist ner dro?

Des Ding misst laafe, woas schaffter doann?
Bring mer mol de Schlissel vun dem Karrn.
Der Kerl der gibt die Schlissel weider,
woas dann bassiert, machten net heiter.

De Bus springt oo unn zwar sofort,
unn de Kerl, musst zum Rapport.
Woas do bassiert is, ich erzähls eisch im Nu,
jetzt spitzt die Ohrn unn horscht gut zu.

Woas er net wusst, des ging oan em vorbei,
Er hoatt zwaa verschiedene Schlissel debei.
Vun dene zwaa, dut oaner nur basse,
unn zwar der aus de oannern Hosetasche.

So stande se drauß, die ganz Kompanie,
fast bis am nächste Moijend frieh.
Nur weil unsern Spezialist,
net wusst, woas de rischdische Schlissel is.

+++

Uff große Fahrt wollte se geh,
unser Sänger - des werd schee.
En Besuch beim MGV Concordia,
in nur 5 Stunn wärnse da.

Genuch geploant, babbel koan Stuss,
mer buuche jetzt, en Reisebus.
Woann des nur so oafach wär,
wär die Such, aa net so schwer.

Endlich oaner gefunne, der net verneint
weil alle oannern hoann gemeint:
„Koa Kerweborsch orrer Männertrupps,
weil die kotze immer in de Bus.“

Mit Noode unn massisch Proviant,
Treffpunkt um Siwwe, oam Zweckverband.
All sitze parat, die Stimm is geeelt,
halb Stunn zu spät, de Bass hoatt gefehlt.

Los gehts, Rischdung Audoboahn schnell
unn warmsinge, fers Gesangsduell.
Sie wollte sich dort gut verkaafe,
do muss se stimme, die Oktave.

Klar kams oannerst wie geploant,
des hoatt vun dene, koaner geoahnt.
Sie hatte die Rechnung ohne de Fahrer gemacht,
der hatt beim erste Ton, laut durchgesacht:

Noch oan Ton Gesang unn ich bleib steh.
Doann schmeiß ich eisch naus unn ehr kennt geh.
Ich ertrag des net, do platzt mers Ohr,
weil moi Fraa singt Bass, im Männerchor.

Gelaafe war des goanz schee bleed,
weil wenn halt singe schun net geht,
Hoannse sich - ehr habt’s erkannt,
gekümmert um de Proviant.

Schweigend unn beduselt fuhrn se vor,
schun komisch so en Stummechor.
Beim Singe hoatte se doch woas gewunne,
unn hoann de Trostpreis mitgenumme.

Vor de Hoamfahrt noch oaner gesunge,
bevor se wirrer, 5 Stunn verstumme.
Awwer heit sollter, Männer, ein jeder singt:
Dass wir die Sänger vom Finsterwalde sind.

(Lied: Die Sänger vom Finsterwalde)

+++

Hinne in unserne Schnookebastion,
do leit es Moorparkstadion.
En Mehrzweckplatz mit foinem Soand,
im Ort besser als Beachplatz bekoannt.

Unn wies so is, mer kennt druff verzichte,
dut sich de Soand, als weider verdichte.
En Daal ausgewesche orrer fliegt fort,
de Soand bleibt net fer immer dort.

Uff Spielplätz unn im Kinnergaade,
muss mer nur bis Friehjoahr waade.
Do sieht mer bei Spezialiste doann.
wie de Soand, gewesche werrn koann.

Spezialfirma beufftragt vun de Gemoa,
nur Taler fern Beachplatz hatte se koa.
Des lasse mer weg, mer hoann uns vermesse.
falls oaner freegt: Des hoatt mer vergesse.

De Platz is halwer leer unn knochehart,
unn bevor mer uff de Bauhof wart.
Unner Eigenreschie paar zammegerafft,
werd de Platz, in die Reih geschafft.

Unkraut fort, es Groas gemeeht,
unn paar Runde, mit de Fräs gedreht.
Des alles is schee, awwer ännert nix,
mer brauche veel Soand, net nur oa Bix.

E Spezialfirma hoan mer hier im Ort,
die übernimmt de Strandtransport.
Sand is Sand, bringt bei woas ehr wollt,
so kam de Laster, oogerollt.

Der bringt foinste Edelssoand,
direkt frisch vom Kornsandstroand
Abgekippt unn glattgerecht,
ausgesäije, hoatts net schlecht.

Doch Soand is äwe net glei Soand,
Des hoannse erst noochm Räije erkoannt.
So hoatt sich – net wie Rundkornsand –
de Kornsandsand, halt hart verkant.

Soand war jetz halt net meh knapp,
dodefer halt Eisehart.
Jetz isses mit em Sport halt rum.
Mer baue Sandburg, seis halt drum.

Unn weil die Firma es Unheil gepacht,
werrd jetzt im Ooschluss, nochmol gelacht.
Die zwott Hälft kimmt glei, awwer seid mer net bees,
Ich muss mol woas trinke unn mer jucke die Klees.

+++

Weider gehts, mit neuem Elan
Mol wirrer geht’s ums Baggerfahrn.
Weil die Firma macht net nur Transport,
jetzt neu - auch Tiefbau hier im Ort.

Im Vorgaade vum gemietete Haus,
hätt er gern de Bauschutt raus.
Beim Gärtnern kams oans Tageslicht,
woas mer hoatt domols, gut verdicht.

De Altbau vun vor dausend Joahr,
leit im Borrem näwerm Door.
Des muss raus, des stört moin Plan
unn ich derf wirrer Baggerfahrn.

Leitunge werrn im Schutt wohl net soi,
Die wärn im Erdreich unne droi.
De Satz noch net rischdisch ausgesproche,
war die Wasserleidung uffgebroche.

Jetzt gibts am Europaplatz,
en Springbrunne fern Wasserspatz.
Wenn er net gestorwe is, baggert er noch
unn mir singe es Lied vum Baggerloch.

(Lied: Bodo mit dem Bagger)

+++

Woannde besoffe hoamkimmst, die Fraa luurt seit Stunne,
unn hoast es Schlisselloch, net glei gefunne,
Sie dich uff de Kamera sieht
unn du noch net waast woas der glei blieht.

Woannse rauskimmt zu helfe unn du verzichst
während du de Schlüssel im Zylinder abbrichst.
Wenn dir so viel Unheil wiederfährt,
Schloof uff de Gass, des isses net wert.

+++

Immer schwer e End zu finne,
des End, des is de Teil goanz hinne.
Ich hoff, dass eisch gefalle hoat,
weil loangsoam is die Stimm aa platt.

Mer seije uns heit Owend, eh in de Hall,
kummt mol bei misch, ich sauf mit eisch all!
Weil sichs subber saufe lässt,
auf unserm Jubiläumsfest.

Egal ob in de Hall orrer hier uffm Platz,
sag ich eisch jetzt den scheene Satz,
Die Biddelberner Kerb, die is so schee,
die muss fer alle Zeit besteh.

Seid so lieb, singt mol e Lied,
Trinkt mim Nachbar mol en Woi.
So macht mer des bei uns im Ried,
so isses unn so soll’s aa soi.

Männer Obacht, basst gut uff,
mer singes allerschennste Lied.
Weil Kerweborsch is net nur Suff,
Die Kapell speelt, was mer sonst verbiet.

(Lied: Kerwemarsch / Kerweborsch seun lusdsche Brüder)